Read Ranglong ANLANGNA 1 Bible Online

ANLANGNA 1 - Ranglong bible

ANLANGNA 1

¹Isua Kristan rui ei manlang, Pathianin ei pek asuak koma ei manmu rang imo anrapa atung rang. Kristan hiva ngai hi asuak Johon akom ei manriat a vanpalai atira.

²Hatuka Johonin ei mu dora ei ril. Pathian koma chong ei riat ha hiva hi ani hatuka adik, Isua Kristan ei manlang.

³Achanasa ngai chu hiva lekha a en ngai, achanasa ngai chu hiva chong alei anril ngai anngaia hiva chong anziak atel ngai! Asik chu a zoro anai zei hiva ngai dora ei tungna rang.

⁴Johon akoma Asia rama kuibing sari ngai rang. Pathian kom ata Lungkhamna le Phukdaina nangni kom om rase, A om sua, a om lai tak, ala honga om rang le a chomphang matona ratha sari,

⁵hatuka Isua Krista aiamrua athi ata anthui mansa ramual reng ngai arung. Ei na dit, athi ei anphalna lehan asia ata ei na mazok.

⁶Hatuka rengrama chaizunga ana sin Pathian le Pa abiak ranga. Isua Krista kom anlianna, thotheina, umor umora om rase! Amen.

⁷En u ro, ansuma hong inti! Mi doran ei mu rang, ankho ngaiin um ei mu rang. Phil chunga miring dora asika la chap inti. Hantin han ei la ni rang!

⁸“Koi Alpha le Omega ka ni Puma Pathian athotheikiar, a om sua, a om lai tak ala om rang.”

⁹Koi Johon na parual Isua azi, antak andoroia na lom, phukanchual sabaka adiara khua le tina antakna ana tiarpui hin Pathian chong le Isua Krista a riatpui sika Patmos mualanlan ei ti u na muna om ka ni na.

¹⁰Puma nikhua Rathan ana maruaia, he anring sabak ka riata Totorot maring anga ka nuk tiang ata a chong.

¹¹“Nei mu ngai maziak ro ana ti, hatuka kuibing ngai kom mathuan ro khopui sari na ngai; Ephesi, Smurna, Pergamos, Thuatira, Sardis, Philadelphia, Laodkei ngai hi.”

¹²Kan hoia ka ena tumo achong, hatuka rangkachak lemchuangna sari ka mu,

¹³hatuka hava bila miring aphua, puan anchual ake suak raka anchual hatuka aropa rangkachak kongkhit le ankhit.

¹⁴A sam ha beramul anga, a var hanuk arial anga var, a mit ha moi anga chuang,

¹⁵a ke dar thir antat anga a el; hatuka a he ti rasa anhum anga.

¹⁶A kut changtiang arasi sari asur, a mur ata khendai benni ngei ahong asuak. Amai sunchima ani anga a el.

¹⁷Kei mu le a kena kan zam rak athi anga. A kut changtiang le ana ton hatuka ati, “Achi no ro, koi hi aphut le ahek.

¹⁸Koi hi ha adam! Kei thi tenchu taituan ranga adam. Athi le athi ramual chabi ka kom a om.

¹⁹Nei mu ngai maziak ro atuna ngai le nangkana a om rang ngai.

²⁰Ka changtiang arasi sari han hiva hi ei tina hatuka rangkachak lemchuangna sari; arasi sari ha kuibing sarina vanpalai ngai hatuka lem chuangna sari ngai ha kuibing sari ngai.