Read Ranglong ANLANGNA 11 Bible Online

ANLANGNA 11 - Ranglong bible

ANLANGNA 11

¹Koi ha hatuka raimol khat ana pek amaina phua zek, hatuka a na ti, “Se tan Pathian biakin le maicham ha va mai ro hanuk anmok ngai dora tel ro.

²Tenchu a tualpang chu mai no ro asik chu aiam nok ngai kom anpek sua zei tha sommanli anni athin unti ha khopui anthiang ha.

³Ka he riat anni mathuan ka tia bosta le anlianga Pathian chong ril unti ni asang khat razanni somaruk sung.”

⁴Ha he riat ngai anni ha oliv kung anni le lem anni ramual reng matona anding.

⁵Anna rang ati uten, moi amur ata ahonga suaka a raldui a masiat; ansiat rang a ti ngai dora hintin hin ei thi u rang.

⁶Anvan akharna anei u, rua ei hong nokna ranga Pathian chong aril u lai.Hatuka ti nar chunga thotheina anei u thisena anchang theina; ramual tak chunga azot dor pei ansinsakna adon u.

⁷Achong ril u aril sua ule ha donglui khur ata sa ahonga suaka anthopui rang. Aman mandok intia that inti,

⁸hatuka a ruak u lampui a antet inti ha khopui alian a Puma u Krosa ei antar na han, ankhina raminga chu Sodom hano Aigupta.

⁹Miring ramtina, namtina, chongtina, chitina ngaiin hong en unti ha aruak u ninthum le atan. Hatuka anphum ranga phal ni no ni.

¹⁰Ramual mi ha anni athi ngai sika a raisan unti. Pham untia alompeia anpek ansiat unti, asik chu ha deari anni han miring tak chunga antak ahong koi sabak u.

¹¹Ni anthum atan suale damna phuk Pathian kom ata ahonga amani sunga alut, hatuka anthui ret u amu ngai doran chu achi u.

¹²Hatuka ha deari anni han he ariat u anvan ata, “Hin hong u ro!” A raldui ngaiin a en u kar anvana alon u ansum bila.

¹³Hava lai tak han achalaka ninu ahonga khopui bak soma bak khat asiat mi asang sari athi. Atei ngai anring sabaka van Pathian lianna a manpak u.

¹⁴Anchirua annina chu atheng zeia, anthumna hong lilip inti!

¹⁵Hatuka ha sari changna vanpalaiin a totorot a muta, vanrama he anring pangai a om, hatuka ati, “Ramual dora chunga rui arilna chu koini na Puma Krista kom keng aman umor taituana op inti!”

¹⁶Hatuka upa somanni manli a reng sutmuna ansut ngaiin Pathian matona andenga anboka Pathian amok u,

¹⁷hintin ati u na: “Puma Pathian Athotheikiar, a om hi a om sua! Na na manpak, nei thotheina liantak nei laka nei op hi!

¹⁸Azinga om ngai chu atak asi u na, asik chu a taksit hun ahonga suak zeia, athi ngai rui azek rang hun a honga suak zeia. Na suak deari ngai raisanpek na hun ahonga suak zeia, miring nang lalchi anatho ngai dora asin alian aloma. Ramual ansiat ngai ansiatna zoro ahonga suak zei!”

¹⁹Pathian biakin vanrama anlong, hatuka ha Chongtinna Sumduk ha havan amu sa. Hatuka khuanlek, ankhek, machek achula ninu honga arial achul sabak.