Read Ranglong ANLANGNA 13 Bible Online

ANLANGNA 13 - Ranglong bible

ANLANGNA 13

¹Hatuka tipui ata me rang hong asuak ka mu; lu sari, raki som adon; a raki kipa reng lukhu a om, hatuka alu kipa raming anziak Pathian siat rilna.

²Ha me rang ha a koite phua, a kepha avom anga, a mur akoibaknei anga. Dragon han a koma thotheina apek a sutmun a chongneina tampa apek.

³Hatuka me rang kei mu ha a lu angkhat chu athi rang khopa a pop aphua, tenchu ha lu apop ha adam. Ramual pumpui aboiadonga ha me rang ha azi u.

⁴Mi doran dragon ha amok asik chu a chongneina dora ha me rang kom ei pek sik. Me rang ham amok u, “Tumo hiva me rang anga hin ati u? Tumo ama adui thei?” ati u.

⁵Ha me rang ha chong alian rilna anpek hava ha Pathian siat rilna, hava ha tha som manli anni ranga chongneina anpek.

⁶Pathian khomak asam aphuta a raming, ei omna mun hatuka vanrama om ngai dora.

⁷Pathian mi ngai anthopuia antorna ha ei pek hatuka nam chunga ram chunga, chong, chi ngai chunga chongneina apek.

⁸Phila mi doran la mok inti, tenchu leilung ansin mana damna lekhana a raming anziak ngai hava apuma ha Berate anthat ha amanin chu amok no ni.

⁹“Rangai u ro, kuar na don uten!

¹⁰Ansur rang chu ansur inti; khendai le anthat rang chu khendaia thi inti.Hiva hin Pathian mi ngai rang duk adiar le iamruana om rang anang ti aman lang.”

¹¹Hatuka me rang angkhat ka mu ret phil ata asuak raki anni don bera raki anga hatuka dragon anga a chong.

¹²Ha me rang mansa ha chongneina dora a matona amanga. Therkhaka me rang mansana ha anmok ranga phil le asunga a om ngai rang ati ha apopa adam ha.

¹³Hiva me rang anni nan boidong sin athona anvan ata moi amasul phila mipui dora matona.

¹⁴Hatuka phila adam ngai dora ahuanga boidong sintho le ha me rang mansa a matona antho ei phal lehan. Ha me rang han me rang apop khendai le adam ret, ama lalchi tho ankhina ramil buak u ro ati.

¹⁵Me rang annina ha damna phuk apek theina ha me rang mansa ramila anpek ei ni, hankeng ha ramil ei chong theia anmok nok tak ei that rang.

¹⁶Ha me rang han aloma therkhak athona mi dora asin, alian, anei, anriang, selkei, azok a kuta mo a machala mo mandang rase ati.

¹⁷Hiva andangna abui ten tuten rachok thei mak zuar um thei mak, hava ha, me rang a raming hano a nambar raming rathula.

¹⁸Hianna ei nang anlang. Ahian takin hiva nambar a omzia a rasua thei ha me rang nambar, asik chu ha nambar ha mi raming rathul ke. A nambar chu 666.