Read Ranglong ANLANGNA 18 Bible Online

ANLANGNA 18 - Ranglong bible

ANLANGNA 18

¹Hava suale vanpalai atei ret vanram ata ei hong ka mu. Chongneina liantak a don ei lian nan phil chu a el kiar.

²He anringa ankheka, “Babulon chu achim zei! Achim zei! Raluai omna le va annim dora omna ke ani zei ati.

³Ram doran a uain aneka Phila reng ngaiin hurna ei anchu u na hatuka ramuala azuar ngai ahui aheka ei anmang u na na ei hong nei u chachak”

⁴Hatuka anvan ata he atei ka riat reta, “Hong suak u ro ka mi ngai! Ama kom ata hong suak u ro! Asia ei tho bila anchel u no ro A duk tong rang bila anchel u no ro!

⁵Asia ei tho ngai anthuana vanram ava suak zei, Pathianin ei siatna ngai mangil mak.

⁶Ei na tho ang amam tho ro ei tho ngai thep anni thuan ro. A khuri chu thep anni zu thir ro, nangni rang zu ei sin anga.

⁷Malungnana le duk atama pe u ro, anlian le aluna ei anpek anga. A the theia anti: hivan kan sut Rengnu! Koi hi arong nimakung Duk repial no ning!

⁸Hiva sika hin nikhata duk le la chul inti rikhua, maitam, hatuka moia la kang inti asik chu Puma Pathian achunga rui aril hi alian.”

⁹Phila reng anloppui ngaiin ei kanga moikhu ei suak amu ule la chap unti.

¹⁰Ala pana anding u asik chu adukna bila anchel ranga achi u. “Ituk anchi rua mo ha khopui alian Babulon! Dar angkhat sunga duk na tiar zeia!”

¹¹Hatuka azuar ngai um achap u ama sika, asik chu tuten a neinun racho pe ulai maka;

¹²tuten a rangkachak, rupa, lunglu, artikiriak lung racho pe ulai mak, apuan u ngai asen, asenaduk, puan asen, thing marim ahui, saiha, bel, saiha len sin bel tuten racho pe lai mak.

¹³Marim ahui, ahal rua marim ahui, sariak marim ahui, bero, uain, oliv sariak, vaipol phut, bu, serat, bera, sakor, suak hatuka miring nuk tenpei.

¹⁴Neinun azuar ngaiin ati u, “Nei don zot ngai dora anpei zei nei lianna le nei sana dora anpei zei manret lai no ta ni!”

¹⁵Neinun azuar hava khopui ata anei ngai alana anding unti asik chu aduk tong tiarpui mani atina achi u chapa anram unti,

¹⁶hatuka ti unti, “Ituk anchi rua mo! Ituk rathatakna mo ha khopui alian ranga! Puan man alu le anliang chachaka, puan asen aduk le rangkachak le anthopa lunglu le artikiriak lung le!

¹⁷Hatuka dar khat sunga aloma anei anung anpei kiar!” Rakuang dora le aruai ngai havana achuang ngai, avei ngai hava tipuia nek sak aval ngai aloma alapa na anding u,

¹⁸hatuka havana moikhu ei mu ule achap u, “Hiva anga khopui alian la om ngai mak!”

¹⁹A luna philvut abual u na achapa ankhek u na, “Anchi omba! Itukmo ha khopui apuak ei rik! a ti u. Sova khopui son mi doran rakuang ei veina, ha tipui ha ama neinung le ei nei! Tenchu dar khat sunga aloma amachan kiar!”

²⁰O anvan, na rai mansan ro, ei siat sika! Na rai mansan u ro Pathian mi ngai, a zolai ngai, deari ngai! Pathianin achunga rui aril zei, na chunga ei na tho anga!

²¹Hatuka vanpalai alian sabak khatin lung aruta bu anrotna lung tiat alian hava ha tipuia adenga ati, “Hintin hin Babulon khopui chu andeng intia amu rang om lai no ni.

²²Tingtang rasa miring rol theilia tum le totorot rasa na kom ariat rang om lai no ni! Sintho mi na kom amu rang om lai no ni. Sang ansukna rasa ariat rang om lai no ni!

²³Lem ra-ang amu rang om lai no ni; muisa le maksa he ariat rang om lai no ni. Na neinun azuar ngai na ramuala alian ngai ani u na na milak le ramual mi ngai nei huang!”

²⁴Babulon ha antak ei tiar asik chu deari ngai thi le Pathian mi ngai thi ha khopuia amu rua ei om; ani, phila athi ngai dora athisen aluang chu hiva khopui sunga keng ei om zit ati na.