Read Ranglong ANLANGNA 2 Bible Online

ANLANGNA 2 - Ranglong bible

ANLANGNA 2

¹“Ephesina kuibing rang maziak ro: “Arasi sari achangtiang asura rangkachak. Lemchuangna sari akongkara kal achoi koma chong.

²Imo nei tho ka riat; na sintho ka riat itukmo na phuk nei manchual ka riat. Mi salui ngai muthei mak che ti ka riat, hatuka zolai ka ni ati ngai na mansin u zei ka riat tenchu amani ha ni u maka amani ha milak keng ti na riat u na.

³Na diara, ka sika antak na tiara hanum mathan mak che.

⁴Tenchu hiva hi ka na ti u; mana anga lungkham na mu u mak che.

⁵Mandon ta hoten anthuka mo nei chul ani zei! Nei sia ata anhoi tan mankhita nei tho anga tho ro. Nei sia ata nan hoi nok ten, hong ka tia na lemchuangna amun ata khai ka ti.

⁶Tenchu hiva hi nei sa u na; Nikolai ngaiin ei tho koi ka dor pei nei zot u nok.

⁷“Kuar na don u ten rangai u ro Rathan kuibing ranga imo ei ti! “Arat ngai chu damna thing mara asak theina pe ka ti Pathian Paradis malaia om.

⁸“Smurna kuibinga ranga maziak ro: “Hiva hi Alpha le Omega koma chong athina adam ret.

⁹Nei anponna ka riat; Nei anriang ka riat tenchu anei tatak ke na ni! Chong sanok ei na ril u Juda ngaiin tenchu ni u mak; amani hi soitan apholona ngai!

¹⁰Nei tong rang hi achi no ro. Rangai ro! Soitanin lungina ansinna anga na khum inti, hatuka antak ni som pei ni inti. Ka ranga iamrua ni tit ro na thi tenpei. Hatuka damna reng lukhu na pe ka ti nei ratman anga.

¹¹“Kuar adon ngaiin kuibing ranga Rathan imo ei ti rangai rase. Havana arat ngai chu voi anni thinan manna no ni.

¹²“Pergamos kuibing ranga maziak ro: “Hiva hi khendai benni angei akom ata chongbe.

¹³Nei omna ka riat, Soitan chomphanga. Ka rang iamrua na ni, ka rang iamrua mi Antipa, Soitan omna na athat ulai um na heng u mak che ka riat.

¹⁴Tenchu alakte kei na ero u na a om; na kar u na senkhatin Balaam ei manchu ava zi a om, Balak akom Israel mi ngai ei ruai rang dan anchu, ramil matona andar neksak ei man saka asia ei mantho, hatuka hurna diklui ei manchu.

¹⁵Havantin anga han senkhat Nikolai ngai ei manchu azi na om u.

¹⁶Nei sia u ata anhoi uta ro! Hanok ten, anrapa hong ka tia hava mi ngai hong zem ka ti ka mura khendai asuak lehan.

¹⁷“Kuar adon ngaiin kuibing koma Rathan ei ti hi rangai rase! “Arat ngai chu manna anthup pe ka ting, lungavar pe ka ti, hava ha raming athar anziak tuten remak aman ngai rong nok ten.

¹⁸“Thuatira kuibing ngai kom maziak ro: “Pathian nai koma chong, a mit moi anga chuang, a ke darthir antat anga a el.

¹⁹Nei tho ka riat, na lungkham ka riat iamrua nei nina ka riat, na sin tho le nei diarna ka riat. Mana nei tho neka atuna nei tho ka riat.

²⁰Tenchu hiva taka hin ka na dem zot siai; ha nupang Jezebil ei tho na pom Pathian palai ka ni anti. Aman ei manchuna ka suak lampui ateia aruaia hurna dik lui le ramil matona andar asak.

²¹Ansir na her ka la pek tenchu ei dik nok ata anhoi zot mak.

²²Hasik han zamuna pei ka ti ama le a uire pui ngai achan aduk na unti. Atun hava ha tho ka ti anrim u nokten ama le asa nok ei tho u ata.

²³A ruaisi ngai um that ka ti, hava suale kuibing doran koi keng sungril le malung a enpu ka ni ti hi riat unti. Mi dora ei tho anga pe ka ting.

²⁴“Tenchu atei ngai chu, Thuatirana ama ei manchu asiat zi u mak che; min Soitan ‘chongril anthup’ ei ti u ngai anchu u mak che. Nangni kom kei ti ni zei puak atei na pe ulai no ning.

²⁵Ka hong maseng nei don ha surtit u ro.

²⁶Arat ngai ahek tenpei kei zot a tho ngai chu. Ka Pa koma ningneina kei man den ha pe ka ting, Nam tina ruiril na pe ka ti thir raimol le phil bel anga khui inti. Zing Sikhovar pe ka ting.

²⁹“Kuar adon ngaiin rangai rase imo Rathan ei ti kuibing ngai rang!