Read Ranglong ANLANGNA 20 Bible Online

ANLANGNA 20 - Ranglong bible

ANLANGNA 20

¹Hatuka vanpalai khat ka mu anvan ata ahonga chum, akuta donglui khur chabi le zingzir arik sabak asur.

²Ha dragon ha asura tian laia marul atar ha Diabol, Soitan zingzir le akhita kum asang khat ranga.

³Hatuka vanpalaiin donglui khura amasula, akhara mor azem, namtin ei huang lai nokna rang kum asang khat ansua maseng. Hava suale chomokhat rang zok tot inti.

⁴Hatuka reng sutmun ka mu havana ansut ngai ha ruiril theina anpek.Hatuka Pathian chong sika le adik Isuan ei manlang sika alu antan ngai ratha ka mu. Ha me rang ha amok um umak aramil um amok umaka a machala a bana ite andangnam don u maka. Ahonga dam ret u na Krista bila kum asang khat reng anga rui aril u.

⁵Atei athi ngai chu la hong anthui u maka kum asang khat ansua maseng. Hiva hi athi ngai ei anthui mansana.

⁶Chanasa le borsang atung hiva athi anthui mansana anchel ngai chu. Voi anni thinan achung u na thotheina nei mak; Pathian le Krista chaizung ni unti, hatuka abila kum asang khat rui ril unti.

⁷Kum asang khat ansuale. Soitan lungin ata zok inti,

⁸hatuka namtin ahuang ranga senti, ramual muntina anthek, Gog le Magog. Soitanin munkhata hong ruai inti andui ranga Tipui kola bali ramal dor pei ei tam.

⁹Ramuala anzar u na Pathian mi ngai le ha khopui ei madit ahual u na.Tenchu anvan ata moi achula ahong masiat.

¹⁰Hatuka ha Diabol ahuang u ha moi andila amasul, me arang le deari rothol ngai ei anpeina na han; hatuka asun azana umor umora kang unti.

¹¹Hava suale rengsutmun alian sabak le havana ansut ha ka mu. A maton ata phil le anvan ankhaia amu rang omlai mak.

¹²Hatuka athi ngai dora asin alian rengsutmun matona anding u. Lekha ngai anphonga hanuk khat ret aphonga damna lekha. Athi ngai ha arui anrila asintho u anga ha lekhana anziak.

¹³Tipuia athi ngai chu ahonga suak u na, Athina le mithi khua han athi ngai ahong rasuana. Alom u na asintho u anga arui anrila.

¹⁴Hatuka athina le athi khua ha moi andila a masul. Hiva hi voi anni thina.

¹⁵Hava damna lekhana a raming anziak lui ngai chu moi andila anpei u.