Read Ranglong ANLANGNA 21 Bible Online

ANLANGNA 21 - Ranglong bible

ANLANGNA 21

¹Hatuka vanram le phil athar ka mu anvan mansa ha anpei sua zei tipuilian ham anpei zei.

²Hatuka khopui anthiang ka mu Jerusalem athar vanrama Pathian kom ata ahong chum ka mu. Muisa aruathar le antong ranga ansina ahong.

³Rengsutmun ata he ka riata: “Pathian in chu miring bila! Abil u na om inti ami ngai ni unti. Pathian apum len amani bila om inti, A Pathian ni pe unti.

⁴A mit rathi hui pe unti, thina omlai no ni malung nana, chapna, ana omlai no ni. Amarua dora chu anpei zei.”

⁵Hatuka rengsutmuna ansut han ati, “Atun chu aloma ka man thar kiar zei!” Aman ka kom ati, “Hiva hi, maziak ro! Hiva chong ngai hi adik le a iamrua.”

⁶Hatuka ati, “Ansua zei! Koi hi Alpha le Omega, mankhit hatuka nukkhit. Koi hi ei anphutna hatuka ei hekna. A ti anral tak chu anek theina pe ka ti ha damna ti ha aman abuia.

⁷Arat ngai chu hiva hi ka kom ata man inti. A Pathian u ni ka ti hatuka ka nai ngai ni unti.

⁸Tenchu achithaiandok ngai, iamlui ngai, annim ngai, tualathat, hurna ngalna, mitpialdoi atho, ramil abiak ngai, milak ngai, amun u rang chu moisumpui, moi le gondok hava ha voi anni thina.”

⁹Vanpalai sari ngai bila angkhat ha khuri sari a don, rikhua sari abit adon ka kom ahonga ati, “Hong ro, Muisa ha na manmu ka ti, Berate a nungak.”

¹⁰Rathan ana maruaia, hatuka vanpalai han mual ansang sabak asipa ana ruai. Khopui Anthiang Jerusalem ha a na manmu vanrama Pathian kom ata ahonga chum,

¹¹hatuka Pathian lianna le a el. Ha khopui ha lunglu anga a el Jasper anga, Kristal anga anthiang.

¹²A bang ansang sabak makot somleianni hatuka vanpalai somleiannin ei rung. Makot lu chunga Israel nam somleianni ngai anziak.

¹³Achang kipa makot anthum a om; sualam tiang anthum, sim tiang anthum, mar tiang anthum, taklam tiang anthum.

¹⁴Ha khopui bang ha lung anphum somleianni a don. Hava han Berate zolai somleianni ngai raming anziak.

¹⁵Ha vanpalai ana chong pui han amaina rangkachak sumpek adon, ha khopui maina rang a suakkhar le abang.

¹⁶Ha khopui ha kil manlin rual adung akhang vanpalai han ha khopui ha a rangkachak sumpek le amaia kilomitar 2400 adung, akhang, ei ansang anrual chianga.

¹⁷Hatuka vanpalai han abang um amai mitar 65 ei ansa ama ei maina manga amaia.

¹⁸Abang ha Jasper le ansin, hatuka khopui ha rangkachak anthiang vang le ansin dapon anga anthiang.

¹⁹Ha lunganphum ngai ha khopui bang ngai ha lunglu achi tampa le anliang ei ni. Lung anphum mansa ha Jasper, annina ha Saphir, anthum changna ha kalkidon, manlina emerald,

²⁰ranga na sardomuk, aruk changna saridon, sarina krusolit, ariat changna berul, akua changna topaz, som changna krusopra, somleikhatna jakintho, somlei anni na amethuto.

²¹Ha makot somleianni ha artikiriak lung somleianni makot kipa artikiriak lung khat le ansin. Ha khopui alampui ha rangkachak anthiang dapon anga anthiang amu sa.

²²Ha khopuia han biakin mu making asik chu Puma Pathian Athotheikiar le Berate ha a biakin u.

²³Ha khopui ha ani, than ei el nang mak asik chu Pathian liannan ei el hatuka Berate ha a lem u.

²⁴Ha ra-anga ramual mi ngai kal choi unti hatuka phila reng ngaiin a anei anung u ngai hong choi unti.

²⁵Ha khopui makot anlong chian inti; asik chu havan zan omlai mak.

²⁶Namtin lianna le neinung ha hong anchoi inti.

²⁷Tenchu annim ei ti ri le anzaknarua atho ngai, milak atho ngai chu hava khopuia lut u no ni. Berate damna lekhana a raming anziak ngai rong hava khopuia lut unti.