Read Ranglong ANLANGNA 22 Bible Online

ANLANGNA 22 - Ranglong bible

ANLANGNA 22

¹Ha vanpalai damna tidung ana manmu, Kristal anga a el Pathian rengsutmun le Berate sutmun ata ahonga luang ana manmu,

²hatuka ha khopuia lampui alai taka aluang. Ha tidung hintiang hintiang damna thingkung, kum khata voi somleianni ratha voikhat, abua ha namtin ei damna rang.

³Hatuka ha khopuia Pathian khomak omlai no ni. Pathian rengsutmun le Berate ha khopuia om intia, asuak ngaiin amok inti.

⁴Amel mu unti, a raming a machal u na anziak inti.

⁵Zan omlai no ni, lem nang lai no ni, ani ra-ang nang lai no ni asik chu Puma Pathian ha a ra-ang ni unti hatuka reng anga umor umora rui ril unti.

⁶Hatuka ha vanpalaiin a na ti, “Hiva chong ngai hi aiamrua le adik. Hatuka Puma Pathian aratha apek han a deari ngai kom, ama han a vanpalai ahong tira anrapa imo a suak rang anmu ranga.”

⁷“Rangai u ro!” Isuan ati. “A hong len rang ka ni! Achanasa ngai chu hiva deari chong anziak atel ngai!”

⁸Koi Johon hiva ngai dora amu le a riat. Ka muna ka rangai kiar suale, ha vanpalai ake kunga kan boka hiva ngai dora anan mu ha, anmok rang kei ti.

⁹Tenchu aman a na ti, “ Hantin tho no ro, koi um na bila suak ka ni hatuka na parual deari ngai le hatuka aloma hiva deari chong atel ngai dora,Pathian amok ro a na ti!”

¹⁰Hatuka aman ka kom ati, “Hiva deari chong lekhana hi thup no ro asik chu a zoro anai zei hiva ngai dora ei ni na rang.

¹¹Asia tho chu tho chian rase, annim chu annim chian rase, asa tho chu asa tho chian rase hatuka anthiang chu anthiang tir rase.”

¹²“Rangai ro!” Isuan ati. “A hong len rang ka ni, ka bila raisanpek hong choi ka ti, mi dora asintho anga pe ka ting.

¹³Koi hi mankhit le nukkhit ei anphutna le ei hekna.”

¹⁴Achanasa ngai chu apuan ansuk ngai ha damna thing mara sak theina man inti, ha khopui makota lut thei inti.

¹⁵Ten ha khopui tual panga ngai chu uire, mitpialdoi atho, ahur ngai tualathat, ramil abiak ngai, oma le chonga milak atho ngai.

¹⁶“Koi Isuan ka vanpalai kei tir ka kuibing ngai kom hiva ngai tang anhai ranga. Koi hi David akhuk ka ni. Koi hi zing sikhovar ka ni.”

¹⁷Ratha le Muisa han, “Hong ro!” ati u! Ariat doran um, “Hong ro!” ti rase.Hong u ro ati anral dora chu, ha damna ti ha man abuia hong nek rase.

¹⁸Koi Johon hiva deari chong lekhana anziak ariat dora kei rakok; hongte mo asap tak chu, Pathianin antak hiva lekhana anziak sap pe inti.

¹⁹Hatuka hongte mo akhai tak chu hiva deari chong hiva lekhana. Pathianin achangai ata khai inti, ha damna thing mara le khopui anthiang hiva lekhana anziak ngai.

²⁰Hiva rui aril han ati, “Tenchu ani! A hong lilip rang ka ni!” ati. “Amen! Puma Isua, hong ta ro.”

²¹Puma Isua Lungkhamna chu mitin kom om rase. Amen.