Read Ranglong ANLANGNA 3 Bible Online

ANLANGNA 3 - Ranglong bible

ANLANGNA 3

¹“Sardis kuibing ngai rang maziak ro: “Hiva hi Pathian koma ratha sari le arasi sari adon koma chongbe.Nei tho ngai ka riat, athi nei ni tenchu adam raming nei raput.

²Hasik han anthui ro nei la don athi vit ngai mandam ret ro. Nei tho ha Pathian mita lan suamak kei mu anga.

³Imo nei anchu, imo nei riat mangil no ro; tel ro nei siat ata anhoi ro. Nan thui nok ten anru anga hong ka tinga itikmo kei hong ngal re no ta ni.

⁴Tenchu mi tomten Sardisa na puan anthianga nei siak u. Ka bila kal choi u na ti, puan angui ansila, asik chu hantina athorua nei ni u sika.

⁵Arat ngai chu hintin hin puan avar rasil inti, hatuka damna lekha ata araming masiat no ning. Ka Pa le vanpalai ngai matona ka ta ngai keng ti ka ti.

⁶“Kuar a don ngaiin rangai rase imo Rathan ei ti kuibing ngai rang.

⁷“Philadelphia kuibing ranga maziak ro: “Hiva hi anthiang le adik a koma chongbe. Davida koma chabi ha adon suakkhar a malong ten tuten khar theimak, hatuka akhar ten tuten malong thei mak.

⁸Imo nei tho ka riat; ranak alakte na don; kei na manchu ngai na zi ka rang iamrua na ni, na matona suak khar ka malong. Tuten khar thei no ni.

⁹Rangai ro! Hava anchuna muna Soitan ata ngai ha, ha milak ngai ha Juda anti ngai ha tenchu ni u mak hong man hong ka tia na kena hong man bu u ka ting kei na dit atia re unti.

¹⁰Ka he atela adiar ranga nei zot, Antak tika na rung ka ti ramual pumpuia mi dora ansin ranga la hong inti.

¹¹Ahong len rang ka ni, nei don ha siak sadim ro, tuten nei ratna nei man rang ei na pot thei nokna ranga.

¹²Arat ngai chu ka Pathian biakin a chopui manchang ka ti, mathan u lai no ni. Hava han ka Pathian raming maziak ka ti, hatuka ka Pathian khopui raming, Jerusalem athar vanrama ka Pathian kom ata hong chum inti. Ka raming athar um maziak ka ti.

¹³Kuar a don takin rangai rase, Rathan imo kuibing rang ei ti.

¹⁴“Laodekia kuibing rang maziak ro: “Hiva hi Amen akoma chongbe, ha iamrua le amu dik Pathianin ei sin ngai dora abul.

¹⁵Imo nei tho ka riat; ka na riat nang hi lum um mak che dai um mak che. Angkhat pei nei ni kei zot!

¹⁶Tenchu lum um lui dai um lui lumadai nei ni sika ka bai ata na male ka ti!

¹⁷‘Ka nei sum ka don nei ti;’ kei nang dora ka don nei ti. Tenchu itukmo lungkham nei ruai boiadong nei ni! Nang hi anriang, akorong le acho na ni.

¹⁸Kei na ti ani zei, ka kom ata rangkachak racho ro, rangkachak anthiang, nei nei na ranga. Puan avar racho ro saikorong anzakpui rua nei makhu na rang; na mita nei khua rang sariak racho ro, nei mutheina rang.

¹⁹Kei adit ngai chu ka ngona ka zem, taksat ro hatuka nei sia ata anhoi ro.

²⁰Rangai u ro! Suakkhara kan dinga ka tok; ka he ariata a malong ten; a ina hong lut ka tia abila ne ka ting, hatuka ka bila ne unti.

²¹Arat ngai chu ka kola ansutna pe ka ti ka chomphanga, kei rata atun ka Pa kola chomphanga kei ansut anga.

²²“Kuar a don ngaiin rangai rase imo kuibing ranga Rathan ei ti!”