Read Ranglong ANLANGNA 6 Bible Online

ANLANGNA 6 - Ranglong bible

ANLANGNA 6

¹Hatuka Beraten Silmor sari bila angkhat akhuia ei khek ka mu, hatuka ha nukanei manli bila he ka riat arasa khuanri anga “Hongro, hong enro!” ati.

²Ka ena sakor alang ka va mu. Achunga a chuang han saili sur, hatuka reng lukhu apek. Ralrat ral asua ranga achuanga ase.

³Hava suale Beraten silmor anni changna akhek; hatuka nukanei anni changna han “Hongro, hong enro!” ati.

⁴Sakor atei a hong, asen. Havana achuang ha ramuala anduina an om thei ranak apek, mi le mi ei anthat rang. Ama ha khendai alianpa apek.

⁵Hatuka Beraten silmor anthumna amalong; nukanei anthum changna han, “Hongro, hong enro!” ati. Ka va ena sakor ahang ka mu. Achunga a chuang han phalla khat akuta asur.

⁶Rasa khat ka riata he aphua, ha nukanei manli bil ata, havan ei ti chu, “Kilogram khat ata nikhat ruzi, hatuka kilogram anthum barli nikhat ruzi. Tenchu oliv kung le thei rahuan chu masiat no ro!”

⁷Hanuk chu Beraten silmor manli changna amalong; hatuka nukanei manli changnan ati “Hongro, hong enro!”

⁸Ka ena sakor apol ka mu. Achunga a chuang a raming ha Thina, le Athi khua han ei hong zi. Ramual bak manlina bak khat athat theina ei pek antuka, maitama, rikhua le ramsa le.

⁹Hava suale Beraten ranga changna silmor amalong. Maicham thuaia Pathian chong aril ngai le a iamrua ei ni u sika athi ngai ratha ka mu.

¹⁰Anring sabaka ankhek u, “Puma athotheikiar, anthiang le adik! Itukngalmo ei la sot rang ramual rui nei rila koini ana that ngai nei sinsak rang?”

¹¹Puan angui zona angkhat apek, pongansa tot sa u ro atei kuibing ngai amani anga ei thi akip le ati.

¹²Hatuka Beraten silmor aruk changna ei malong ka mu. Ana sabaka ninu ahong, hatuka ani ahonga hang samul puan anga, hatuka tha, thi anga asen.

¹³Arasi phila achul theipui min lui thinthin ana sabaka ei sema achul anga.

¹⁴Anvan anpei lekhanzual anga anzual mual dora le ti malaia tang amun ata ankhai.

¹⁵Hatuka ramuala reng, ram aruai ngai, sipai ulian, anei ngai ranak anei ngai mi dora suak, suaknok, khura anthup unti lung thuaia muala.

¹⁶“Mual ngai apaia, lung ngai koini na deng ro, reng chomphanga ansut a mit mu ata na thup ro. Berate taksit ata na thup ro ati u!

¹⁷A taksit u na nikhua sia ahong atung tumo adui ranga anding thei?”