Read Ranglong ANLANGNA 7 Bible Online

ANLANGNA 7 - Ranglong bible

ANLANGNA 7

¹Hava suale vanpalai manli ramual kil manlina anding ka mu phil thinthi manli asura phila, tipuia thinga thinthi ei hong nokna rang.

²Hatuka vanpalai atei khat sualam tiang ata ahong ka mu Pathian adam a silmor le. Ama han anring pana apaia ha vanpalai manli phil le tipuilian ansiat ranga Pathianin thotheina ei pek ngai ha.

³Ha vanpalai han, “Phil, tipuilian, thing masiat no ro koini na Pathian asuak ngai a machala silmor le na mandang maseng,” ati.

⁴Hatuka Pathian silmor le a machala itukmo ei mandang a na ril hava ha 144, 000. Amani ha Israel nam somleianni ata.

⁵Juda akhuk ata 12, 000 silmor anzema. Ruben akhuk ata 12, 000 silmor anzema. Gad akhuk ata 12, 000 silmor anzema.

⁶Asher akhuk ata 12, 000 silmor anzema. Neptali akhuk ata 12, 000 silmor anzema. Manase akhuk ata 12, 000 silmor anzema.

⁷Simeon akhuk ata 12, 000 silmor anzem. Levi akhuk ata 12, 000 silmor anzema. Issakhor akhuk ata 12, 000 silmor anzema.

⁸Zebulun akhuk ata 12, 000 silmor anzema. Joseph akhuk ata 12, 000 silmor anzema. Benjamin akhuk ata 12, 000 silmor anzema andang sua ani u na.

⁹Hava suale ka ena miring atampa tuten ei tel sua nok! Hava ngai ha namtin, chitin, ramtin chong tina, reng sutmun le Berate matona anding u, Puan angui ansila letum bak akuta asur u na.

¹⁰Anringpa ankhek u na: “ Koini na Pathian a reng chomphanga ansut le Berate kom ke sandamna ei hong,” atina.

¹¹Vanpalai ngai dora reng sutmun ravela anding u, upa ngai um, hatuka ha nukanei manli. Ha reng sutmun matona anboka Pathian amok u.

¹²Ei ti u chu, “Amen! Anpakna, anlianna, hianna, raisanna ril, lalchi, thotheina le ranak chu umor taituana koini na Pathian kom om rase!”

¹³Upa khatin a na rakel, “Hiva puan angui ansil ngai hi tumo, hovan ata ahong u mo?

¹⁴“Re makung ka pu, nangin na riat,” atia ka masang. Aman ka kom ati, “Hiva mi ngai hi ansinsakna ata azoka a hong ngai. Apuan arasuk u na Berate thisen le ei man var u.

¹⁵Hasik han Pathian sutmun matona ei anding u asun azana biakina a dorbo ei adom u. Reng sutmuna ansut son amani chu rung inti a om chunga.

¹⁶Ancham ulai no ni, anral ulai no ni, ani ra-ang alumin ra-em lai no ni,

¹⁷asik chu Berate reng sutmun malaia a om so amani arung ei ni rang, hatuka aman damna tidung tiang ruai inti. Hatuka Pathianin a mitrathi u hui pe inti.”