Read Ranglong ANLANGNA 8 Bible Online

ANLANGNA 8 - Ranglong bible

ANLANGNA 8

¹Beraten silmor sari changna amalong dar atan vanram adai ruai.

²Hatuka vanpalai sari ka mu Pathian matona anding hava ngai ha totorot sari anpek.

³Vanpalai khat ret marim hui dongna rangkachak asur ha, maicham matona anding. Ama ha marim ahui atampa apek Pathian mi ngai borzong bila asap rang, le rangkachak maichama adar rang reng sutmun matona anding.

⁴Marim ahui akang akhu ha Pathian mi ngai borzong bila ase ha vanpalai Pathian matona anding akut ata.

⁵Hatuka vanpalaiin marim ahui kok alaka, maicham moi le aman bit, hatuka phila ahong pei. Hava han rasa anring sabak khuanri, khuanlek, ninu ei hong om.

⁶Hatuka ha vanpalai sari han totorot sari amut rang ansin u.

⁷Vanpalai mankhita han a totorot amut a arial le moi anlopa thisen le phila ahonga luang. Mun anthuma munkhat phil akanga, thing um mun anthuma munkhat akang hatuka chiak dora.

⁸Hava suale vanpalai anni changna han a totorot amut. Muala moi achuang zuak aphua zeka hava ha tipuiliana andeng. Mun anthuma munkhat tipuilian ha thi a chang,

⁹mun anthuma munkhat tipuiliana nukanei athi, hatuka mun anthuma munkhat rakuang alian asiat.

¹⁰Hava suale vanpalai anthum changna han a totorot amut. Arasi alianpa moiser anga achuang anvan ata tidung le anhora achul.

¹¹Ha arasi araming chu “Akha.” Ti mun anthuma munkhat akha, hava ti neka mi tampa athi asik chu ei kha sika.

¹²Hatuka manli changna vanpalai han a totorot amut. Ani mun anthuma munkhat asiat. Arasim, mun anthuma munkhat asiat a ra-ang ei el na mun anthuma munkhat el mak ra-ang om mak sun mun anthuma munkhat hatuka zan um hantin han.

¹³Hatuka kei va en muliang anvana azuang han anring sabaka ankheka ei ti ka riat, “Antak ba nu! antak ba nu! Ituk antakmo ei la ni rang phila a om ngai rang, totorot anmut rasa ha vanpalai anthumin ei mut rang an muta!”