Read Ranglong ANLANGNA 9 Bible Online

ANLANGNA 9 - Ranglong bible

ANLANGNA 9

¹Hatuka vanpalai rangana han a totorot amuta, arasi phila achul ka mu, donglui khur chabi apek.

²Ha arasi han donglui khur a malonga havan ata moikhu asuak sabak dura lianpa ata moikhu anga, ani le thinthi azing khap ha donglui khur moikhun ei manzing.

³Moikhu bil ata khai ahonga chum phila, hava ngai ha ainuvet anga thotheina apek.

⁴Hava ngai ha chiak thing kung atei masiat no ro ati pe; miring rong a machala Pathian silmor donlui ngai aman na thei.

⁵Ha khai ngai ha mi athat diai ranga nimaka tha ranga anpangsep duai ranga. Ha anpangsepa ei na chu ainuvet ana kep le ei na anga ana.

⁶Ha tha ranga sung han athina ravan unti, tenchu tok u no ni athi rang zot unti tenchu thina ankhai inti akom u ata.

⁷Ha khai ngai ha sakor anga anlang antuk ranga ansinsua aluna rangkachak lukhu phuazek akhu u, hatuka amai miring mai anga.

⁸A sam nupang sam anga a ha akoibaknei ha anga.

⁹Arop u ngai ha thir roppho le ankhu anga hatuka a mantha rasa ha sakor atampa antukna na atan anga.

¹⁰Ramoi adon u ainuvet anga ana bel thei, hatuka a ramoi lehan keng mi anna theina ei nei u tha ranga aman na.

¹¹Reng adon u achung u na rui aril, hava ha vanpalai donglui khur a en.Hebrai chonga araming chu Abaddon; Grik chonga Apolion ei ti na chu “Ansiatpu.”

¹²Anchirua mankhita chu ansua hava suale anni anchirua ala hong rang ala om.

¹³Hatuka vanpalai aruk changna han totorot amuta he ka riat Pathian matona rangkachak maicham anding kil manli ata.

¹⁴Ha he han vanpalai aruk changna kom, “Euphrates tipuia vanpalai ankhit ngai mazok ro ati!”

¹⁵Ha vanpalai manli ngai ha azok; avian len atun len hiva tha len hiva kuma miring bak anthum athat ranga ansin ira a om.

¹⁶Sipai ansin chit itukmo ana manthei; lak ha asang anni ani u.

¹⁷Hatuka anralna na sakor le achuangpu ka mu; roppho moi anga asen, saphira anga adum, gondok anga a eng. Sakor lu ha akoibaknei lu anga amur ata moi, moikhu, gondok a hong asuak.

¹⁸Miring bak anthum chu ha richul anthuma athi; ha moi, moikhu le gondok sakor mur ata asuk ha.

¹⁹Sakor thotheina ha a mur le a ramoia ke. A ramoi ngai ha marul anga lu don, miring ei man na naranga amang.

²⁰Miring maniang, thilui ngai dora ha, ha richula ei sin u tiang ata anhoi um chu uma. Raluai, ramil, rangkachak, rupa, dar, lung, thing amok tit u, ha muthei lui, rethei lui kal choi thei lui ngai ha.

²¹Hatuka tualathat, mitpialdoi, hurna dik lui, anru ata anrim uma.