Read Rejang MATIUS 1 Bible Online

MATIUS 1 - Rejang bible

MATIUS 1

¹Dioba tembo Yesus Kristus, turunan Daud, turunan Abraham. Kunei Abraham sapei Daud, gen-gen tembo Yesus Kristus adeba:

²Abraham, Ishak, Yakub, Yehuda ngen pasuakne, Peres ngen Zerah (mak tobo'o genne Tamar), Hezron, Ram, Aminadab, Nahazon, Salmon, Boas (makne adeba Rahab), Obed (makne adeba Rut), Isai, Ngen Rajo Daud.

⁶ Gen-gen yo adeba gen-gen kunei maso Daud sapei maso bangso Israel nuang moi Babel tetulis gen-gen berikut yo: Salomo (makne adeba kes ngenyan Uria), Rehabeam, Abia, Asa, Yosafat, Yoram, Uzia, Yotam, Ahaz, Hizkia, Manasye, Amon, Yosia, Yekhonya ngen kute pasuakne.

¹²Gen-gen yo adeba gen-gen kunei maso bangso Israel nuang moi Babel sapei laherne Yesus tercatat gen-gen awei yo: Yekhonya, Sealtiel, Zerubabel, Abihud, Elyakhim, Azur, Zadok, Akhim, Eliud, Eleazar, Matan, Yakub, Yusuf maten Mariam. Ngen kunei Mariam do'oba laher Yesus de senbut Kristus.

¹⁷Jijai kunei Abraham sapei Daud, kutene ade patblas keturunan kunei Daud sapei maso bangso Israel nuang moi Babel ade patblas turunan kulo. Kunei maso bangso Israel nuang moi Babel sapei laherne Kristus ade kulo patblas turunan.

¹⁸ Awei'oba cerito laherne Yesus Kristus: waktau Mariam betunang ngen Yusuf rupone Mariam bi ngandung kunei Roh Sucai kunei Allah ayok tobo'o nikeak.

¹⁹Kerno Yusuf tunanganne tun de malim, si coa lok semelek Mariam nak muko tun dau, ca'o diem-diem si lok mutus hubungan tunanganne ngen Mariam.

²⁰Waktau si meker klokne'o, malaikat Tuhan keten lem mipaine. Malaikat'o madeak, “Yusuf turunan Daud, jibeak saben nikeak Mariam; kerno Anok de neak lem kandungan Mariam tejijai kerno kuaso Roh Sucai kunei Allah.

²¹ Mariam bakea melaher anok semenei. Ko harus melei genne Yesus, kerno Si bakea semlamat umat-Ne kunei duso-duso tobo'o.”

²²Kutene tejijai, supaya jano de nadeak Tuhan liwet nebai-Ne genepba:

²³ “Suang anok semulen'o bakea ngandung ngen melaher anok semanei, tobo'o melei genne Imanuel.” (Imanuel adeba kunei bahaso Ibrani de taine, “Allah ade besamo ite”.)

²⁴Sesudo klongon kunei tiduane, si temotoa periteak malaikat'o. Si nikeak Mariam.

²⁵ Tapi Yusuf coa capua ngen Mariam sapei Mariam melaher anok semaneine, Yusuf pek gen-Ne Yesus.