Read Rejang MATIUS 10 Bible Online

MATIUS 10 - Rejang bible

MATIUS 10

¹Pado sewaktau bilai Yesus medeu keduai belas penotoa-penotoa-Ne bekopoa. Lajau Si melei kuaso ngen tobo'o utuk musir roh-roh jahat, ngen kema'en kute olon ngen kute cacet.

²Gen keduai belas rasul'o: pertamo Simon (de senbut Petrus) ngen Andreas pasuakne, Yakobus ngen Yohanes pasuakne, anok-anok Zebedeus.

³Sudo'o Filipus ngen Bartolomeus, Tomas ngen Matius penagiak pajak, Yakobus anok Alfeus ngen Tadeus,

⁴lajau akhirne Simon de pejuang ngen Yudas Iskariot de menghianat Yesus.

⁵Keduai belas rasul sudo'o nutus Yesus ngen dapet petunjuk-petunjuk yo, “Jibeakba lalau moi daerah tun-tun de coa Yahudi. Jibeak moi neak kota tun Samaria.

⁶Tapi lalauba ngen tun-tun Israel, kerno tobo'o nyep.

⁷ Melei namen ngen tobo'o bahwo Allah mriteak awei Rajo.

⁸Kemaenba tun-tun bolon; midup igai tun-tun matei; kemaenba tun-tun de olon babok de kembiak saben ite kembiakne, ngen nusirba roh-roh jahat udi bi temimo kutene'o ngen coa nasen. Jijai neleiba bae.

⁹Jibeakba mbin caci mas, caci pirok, caci tembagai.

¹⁰ Jibeakba udi mbin katung sedekea, atau duai lembea keracok utuk pemaneunu. Sebab tun de kerjo bi harusne nejamin nafkahne.

¹¹Amen udi sapei neak kota atau sadei, kesoaba neak di suang tun de lok temapung udi. Tingeaba ngen si sapei udi berakat igai.

¹²Waktau udi masuk umeak, nadeakba, ‘Kirone Tuhan melei rahmat ngen udi.’

¹³Amen tun-tun neak umeak'o temimo udi, kunyauba salamnu'o tep ngen tobo'o. Tapi amen tobo'o coa temimo udi, mokba igai salamnu'o.

¹⁴ Amen ade umeak atau kota de coa lok temimo udi atau coa lok temi'uk udi teninggea penan'o ngen kenibasbah debu kunei telapok kekeanu.

¹⁵ Ingetba! Pado Bilai Kiamat tun-tun neak kota Sodom ngen Gomora bakea lebiak Allah mapunne kunei tun-tun neak kota'o!”

¹⁶ “Keliakba: Uku mutus udi awei domba de coa bedayo neak tengeak-tengeak srigala ganas, udi harus pacok awei dung ngen baik atei awei burung daro.

¹⁷ Bejago-jago sebab udi bakea tenakep lajau senreak ngen pengadilan agamo tun Yahudi. Tobo'o bakea semikso udi neak umeak-umeak semyang tobo'o.

¹⁸Kerno udi penotoa-Ku, udi bakea mbin ngen penguaso-penguaso ngen rajo-rajo. Ngen pado waktau'oba, ko bakea jijai saksi-Ku utuk tobo'o ngen tun-tun de coa kemnal Allah.

¹⁹Amen udi nembin utuk nadeak, jibeakba udi temes tetang jano de bakea udi madeak, atau awei ipe udi miling. Sebab jano de harus udi madeak'o bakea nelei namen ngen udi pado waktaune.

²⁰Kerno de miling pado waktau'o iso udi, meluyen Roh Sucai kunei Bak de neak surgo, liwet udi.

²¹ Bakea tejijai amen tun semreak pasuakne dewek utuk nunuak ngen do'o kulo de bakea tejijai neak antaro Bak ngen Anokne. Anok-anok bakea mlawen ngen bak makne, ngen semreak tobo'o utuk nunuak.

²² Kerno udi penotoa-Ku, tun bakea jengik ngen udi. Tapi tun de tep pecayo ngen Uku sapei akhir, Allah bakea semlamat si.

²³Amen udi senikso neak de bueak kota mlilaiba moi kota de luyen. Uku madeak ngen ko: Ayok udi selsei lalau moi kute kota-kota Israel, Anok Manusio bi teko.

²⁴ Suang gu'au lebiak lai kunei penotoa-penotoa-Ne ngen coa gen pelayan lebiak lai kunei tuanne.

²⁵ Bi cukup amen suang murid jijai awei gu'aune, ngen suang pelayan awei tuanne. Amen kepalo keluarga senbut Beelzebul jano igai seisai umeakne. Tobo'o bakea dapet gen de kembiak kidek igai!”

²⁶ “Jibeakba saben ngen manusio coa ade de tekunyin de coa bakea keten ngen coa ade de resio de coa bakea nukok.

²⁷Jano de Uku madeak ngen ko lem kelem harusba udi mulang lem te'ang kebilai. Ngen jano de nisik neak ti'uk melei namenba moi ipe bae.

²⁸Jibeakba saben ngen, tobo'o de munuak awok, tapi coa ade kuaso munuak jiwo. Sabenba ngen Allah de bekuaso mbenaso awok ngen jiwonu lem nerako.

²⁹Duai likup burung pipit nam tenukua ngen de caci de paling titik gone. Coa gen gok dikup neak pitok, amen coa Baknu kemlokne.

³⁰Kute buk neak ulaunu bi teitung.

³¹Kerno'o jibeakba saben! Udi lebiak be go kunei pado burung-burung pipit.”

³²“Api bae makau Uku neak muko umum bahwa si penotoa-Ku, Uku kulo bakea ngakau udi neak adep Bak-Ku de neak surgo.

³³ Tapi api bae de mikar Uku neak muko umum bahwo si penotoa-Ku, Uku kulo bakea mikar udi neak adep Bak-Ku de neak surgo.”

³⁴“Jibeak sako, bahwo Uku teko utuk mbin damoi neak dunio. Uku coa mbin damoi tapi betekea.

³⁵ Uku teko sembab Anok semanei mlawen Bakne, Anok selawei mlawen Makne, setamang selawei mlawen setu'ang selaweine.

³⁶Au de bakea jijai musuak lai adeba anggota keluargonu dewek.

³⁷Tun de kemasiak bak atau makne lebiak kunei Uku, coa patut jijai penotoa-Ku. Awei'o kulo tun de kemasiak anokne semanei atau selawei lebiak kunei Uku.

³⁸ Tun de coa lok musung salibne ngen temotoa Uku, si coa patut ijai penotoa-Ku.

³⁹ Tun de kema'en idupne bakea nyep idupne. Tapi tun denyep idup kerno setia ngen Uku bakea dapet idupne.”

⁴⁰ “Tun de temimo udi temimo Uku, ngen tun de temimo de mutusku, Uku temimo Si.

⁴¹Tun de temimo nebai kerno si nebai bakea temimo upeak suang nebai ngen api bae de temimo suang tun debaik kerno si baik bakea temimo upeak suang de baik.

⁴²Api bae melei bio'a kunyau cuma bio'a sengok bae ngen saleak suang tun-tun de coa penting yo, kerno si penotoa-Ku, pecayoba sahe si bakea temimo upeakne ngen si!”