Read Rejang MATIUS 11 Bible Online

MATIUS 11 - Rejang bible

MATIUS 11

¹Sesudo Yesus melei petunjuk ngen keduai belas penotoa-Ne, Si teminggea penan'o. Si lalau majea ngen semiar kabar kunei Allah neak kota-kota de pa'ok neak di.

²Yohanes Pembaptis gi dong neak sel temi'uk tetang kerjo Kristus, lajau si meluak penotoa-penotoane lalau ngen Yesus utuk betanye,

³“Jano Bak tun de bakea teko temurut janjai Allah'o, atau haruskah keme mbot tun luyen?”

⁴Yesus jemawab, “Lalauba belek ngen Yohanes ngen melei namen jano de udi tem'iuk ngen kemliak:

⁵ Tun buto kemliak, tun pakuak paneu, tun de temuan olon babok de kembiak saben ite kemliakne ka'en;[1] tun setiuk temi'uk, tun matei idup igai, ngen Bito Baik kunei Allah senapei ngen tun peset.

⁶Kirone Tuhan melei rahmat ngen tun de coa temulok Uku!”

⁷Sesudo utusan-utusan Yohanes lalau, Yesus muloi miling ngen tun dau'o tetang Yohanes, nadeak-Ne, “Udi lalau moi padang pasir utuk kemliak jano? Jano utuk kemliak dukut de genuyang ibut?

⁸Udi lalau utuk kemliak jano? Jano kemliak tun de makei keracok baes? Tun-tun de makei keracok baes tinggea neak umeak rajo!

⁹Jijai getai udi lalau moi padang pasir? Jano utuk kemliak suang nebai? Benea, malah lebiak kunei nebai.

¹⁰ Kerno tetang Yohanes'oba de tenulis lem ayat Kiteb Ade yo, ‘Dioba utusan-Ku, nadeak Allah, Uku nutus si lebiak dute kunei Ko, supayo si mukok dalen utuk-Nu.’

¹¹Ingetba! Neak dunio yo coa perneak ade tun de lebiak lai kunei Yohanes Pembaptis. Tapi tun de kembiak titik neak antaro umat Allah lebiak lai kunei Yohanes.

¹² Muloi pado waktau Yohanes kemabar beritane sapei uyo, umat Allah tenetang, ngen tun-tun de berusaho kemuasone seca'o pakso.

¹³Sapei tekone Yohanes kute hukum Musa ngen ajaran nebai-nebai semapei hal-hal de harus tejijai.

¹⁴ Amen udi lok pecayo, Yohanes'oba Elia, de tekone sudo nadeak bakea tejijai.

¹⁵Api temuan tiuk, teni'uk ba.

¹⁶Ngen jano dapet harus Kuumpamo tun-tun zaman uyo? Tobo'o awei anok-anok de temot neak pasar. Tobo'o mengang ngen de luyen,

¹⁷‘Keme kembus suling legau riang utuk udi, tapi udi coa lok na'ai! Keme nyanyi legau sedih, tapi udi coa lok ngindoi!’

¹⁸Yohanes teko si puaso ngen coa menem anggur; ngen tun-tun madeak, ‘Si pasuk semat!’

¹⁹Uyo Anok Manusia teko, Si mukmei ngen menem ngen tun-tun madeak, ‘Keliak tun'o! Rakus, pemabuk, kuat tukang penagiak pajak ngen tun beduso.’ Tapi kepacok Allah tebukti kunei asea-asea-Ne.”

²⁰Lajau Yesus muloi kemutuk kota-kota, neak ipe Si dau menea mujizat. Sebab tun-tun neak kota-kota'o coa lok betobat kunei duso-dusone.

²¹ “Celako ko, Korazim! Ngen celako kulo, Betsaida! Seandaine mujizat-mujizat de nea neak antaronu sudo menea neak Tirus ngen Sidon, sahe tun-tun neak di bi an betobat kunei duso-duso tobo'o ngen makei keracok duko serto mpek abau moi das ulau.

²²Ingetba, pado Bilai Kiamat, tun-tun kota Tirus ngen Sidon bakea lebiak mudeak napun Allah kune udi!

²³ Ngen ko Kapernaum! Jano ko bakea nlekat sapei moi surgo? Coa! Malah ko bakea nuang moi nerako! Sebab seandaine mujizat-mujizat de nea neak antaronu'o sudo nea neak Sodom, Sodom'o masiak ade sapei uyo!

²⁴ Ingetba, pado Bilai Kiamat, tun Sodom bakea lebiak mudeak napun Allah kunei udi!”

²⁵Pado waktau'o Yesus bedu'o, “Bapa, Tuhan de kemuaso lenget ngen bumai! Uku mucep syukur ngen-Ko, kerno kutene'o Ko mresione kunei tun-tun pacok ngen pitar, tapi Ko melei namen ngen tun-tun biaso.

²⁶Do'oba de semnang atei Bak.”

²⁷ Lajau Yesus madeak, kute bi senreak Bak utuk-Ku, “Coa su'ang tun kemnal Anok seluyen Bak. Coa gen kulo de kemnal Bak seluyen Anok ngen tun-tun de niliak Anok'o utuk nelei namen api sebeneane Bak.

²⁸Tekoba ngen Uku kute de litok ngen meding benekne ban; Uku bakea semgar udi.

²⁹ Totoaba periteak-Ku ngen belajeaba kunei pado-Ku. Sebab Uku yo lemah lembut ngen rendeak atei, mako udi bakea meding segar.

³⁰Kerno periteak-periteak-Ku semnang, ngen ban de Uku pek neak das baunu lengan.”