Read Rejang MATIUS 14 Bible Online

MATIUS 14 - Rejang bible

MATIUS 14

¹Pado maso'o Herodes, penguaso negrai Galilea, temi'uk jano de kenerjo Yesus.

²Herodes madeak ngen pejabat-pejabatne, “Pasti dio Yohanes Pembaptis de bi idup igai! Do'o sebabne Si temuan kuaso menea mujizat.”

³ Kerno ayok'o Herodes meluak temakep Yohanes ngen meket si serto mbin moi lem sel. Herodes menea awei'o kerno sual Herodias, ngenyen pasuakne dewek, Filipus.

⁴ Kerno perneak Yohanes madeak awei yo ngen Herodes, “Coa buliak ko nikeak ngen Herodias!”

⁵Sebeneane Herodes lok munuak Yohanes, tetapi si saben ngen tun-tun, kerno tobo'o manggep Yohanes nebai.

⁶Pado waktau Herodes merayo bilai ulang taunne, anokselawei Herodias na'ai neak adep tamu. Ta'aine kembiak semnang atei Herodes.

⁷Sehinggo Herodes bejanjai ngen si ngen besupeak bahwo jano bae dei si kemlok bakea nelei ngen si.

⁸Kerno nasut ngen makne, semulen'o madeak, “Uku minoi ulau Yohanes Pembaptis nlei ngen uku. Uyo kulo neak das talam!”

⁹Temi'uk kelok ne'o, Herodes ijai kembiak sedih. Tapi kerno si sudo besupeak neak adep para tamune, si meriteak supayo kelok semulen'o kenabul.

¹⁰Si meluak tun lalau moi sel utuk macung ulau Yohanes.

¹¹Sudo'o ulau Yohanes'o nembin neak das talam, ngen nelei ngen semulen'o. Lajau semulen'o mbinne kulo ngen makne.

¹²Sesudo'o penotoa-penotoa Yohanes teko mok mayit Yohanes ngen kemubuane. Lajau tobo'o lalau melei namen hal'o ngen Yesus.

¹³Waktau Yesus temi'uk berita'o, Si kemnek biduk suang ngen teminggea penan'o, utuk lalau moi do penan de sunyai. Tapi ketiko tun-tun temi'uk tetang hal'o, tobo'o teminggea kota-kota tobo'o ngen lalau semusul Yesus liwet dalen daet.

¹⁴Waktau Yesus tu'un kunei biduk ngen kemliak tun dau'o, Si slen ngen tobo'o. Lajau Si kema'en tun-tun de bolon neak antaro tobo'o.

¹⁵Pelbeak bilaine, penotoa-penotoa Yesus teko ngen madeak ngen-Si, “Bilai bi pelbek, ngen penan yo tepecea. Lebiak baik Bak meluak tun-tun yo lalau, supayo dapet temukua kembuk neak sadei-sadei.”

¹⁶“Mbeak tobo'o lalau,” nadeak Yesus, “Udi bae mlei tobo'o kembuk.”

¹⁷“Keme cuma temuan lemo ruti ngen dua ikan!” penotoa-penotoa Yesus'o jemawab.

¹⁸“Mbin do'o mindoi” nadeak Yesus.

¹⁹Sudo'o Si meluak tun dau'o temot neak das dukut. Lajau Si mok lemo ruti ngen duai kan'o, ngen cungok moi lenget, lajau mucep syukur ngen Allah. Sudo'o Si megit ruti'o ngen tangan-Ne ngen mlei-Ne ngen penotoa-penotoa-Ne utuk nagiak-nagiak ngen tun dau'o.

²⁰Tobo'o kutene mbuk sapei kenyang. Sudo'o penotoa-penotoa Yesus kemopoa lebiak kembuk de lebiakne ade duai belas bokoa penuak.

²¹De mbuk pado waktau'o ade kiro-kiro lemo ribau tun, ati teitung selawei ngen anok-anok.

²²Sesudo'o Yesus meluak penotoa-penotoa-Ne kenek moi biduk ngen lebiak dute sembe'ang daneu, sementaro Si meluak tun dau'o belek.

²³Sudo tun dau'o lalau, Yesus kenek moi de bueak tebo suang dirai utuk bedu'o. Tiko bilai bi klemen, Yesus masiak berade neak di suang dirai.

²⁴Sementaro'o biduk de tenupang penotoa-penotoa Yesus, bi uak neak tengeak-tengeak daneu. Biduk'o genuyang umbok de de'es, kerno ibut belawen arah ngen biduk.

²⁵Antaro jam telau ngen jam num petang, Yesus teko ngen tobo'o paneu neak das bioa.

²⁶Tiko penotoa-penotoa-Ne kemliak Si paneu neak das bioa, tobo'o kembiak tekanjet. “Atau!” tobo'o mekik ngen kembiak saben.

²⁷Tapi Yesus lajau jemawab, “Tenangba! Uku Yesus. Jibeak saben!”

²⁸Lajau Petrus madeak, “Amen ko Yesus, meluakba uku teko paneu neak das bioa.”

²⁹“Tekoba!” Yesus jemawab. Lajau Petrus tu'un kunei biduk, paneu neak das bioa ngen teko ngen Yesus.

³⁰Tapi waktau Petrus kemliak padeak laine ibut neak daneu'o, si saben ngen muloi tendem, “Tuhan, tulung!” pekikne.

³¹Yesus segro mulua tangen-Ne ngen temakep si, ngen madeak, “Petrus, Petrus, ko yo kuang pecayo. Getai ko ragau ngen Uku?”

³²Lajau keduaine kenek moi biduk'o, ibut'o bedan.

³³Mako penotoa-penotoa Yesus sujut nyembeak Si. Tobo'o madeak, “Sungguak Tuhan adeba Anok Allah!”

³⁴Waktau tobo'o sapei neak di poa daneu, tobo'o ndaet neak Genesaret.

³⁵Ngen tiko tun-tun neak di kemliak bahwa Yesus, tobo'o semiar berita'o moi kute daerah neak sekitar kota'o. Lajau kute tun bolon nbin ngen Yesus.

³⁶Ngen tobo'o minoi tulung ngen-Si, supayo buliak megong jubah-Ne, kunyau cuma ujungne. Lajau kute de megongne jijai ka'en.