Read Rejang MATIUS 15 Bible Online

MATIUS 15 - Rejang bible

MATIUS 15

¹Sesudo'o tekoba kekedau tun Farisi ngen gu'au agamo kunei Yerusalem ngen Yesus. Tobo'o betanye ngen-Si,

²“Getai penotoa-Nu melanggea adat istiadat ninik puyang ite? Tobo'o coa mpuk tangen lebiak dute ayok mukmei!”

³Yesus jemawab, “Getai kulo udi melanggea priteak Allah, kerno lok temotoa adat istiadat ninik puyangnu?

⁴ Sebab Allah madeak, ‘Hormatba ngen bak maknu,’ ngen ‘Api bae mupet bak makne, harus nukum matei.’

⁵Tapi udi majea: amen tun madeak ngen tun tuaine, ‘Jano de seharusne uku melei ngen bak ngen mak, sudo uku melei ngen Allah,’

⁶tun'o cigai wajib igai menghormati tun tuaine. Ijai kerno adat istiadat ninik puyangnu, udi manggep tembeak priteak Allah.

⁷Udi tun munafik! Beneaba Yesaya semapei pesen kunei Allah tentang udi, dioba,

⁸ ‘Awei yo Allah madeak: Tun-tun'o kanyen nyembeak Uku ngen madeakne bae, tapi ateine uak kunei-Ku.

⁹Gen guno tobo'o nyembeak Uku, amen aturan manusio tobo'o majea aturan manusio.’ ”

¹⁰Lajau Yesus menok tun ngen madeak ngen tobo'o, “Ki'ukba supayo ngertai!

¹¹De masuk moi lem bibia coa menea tun najis, amen de kelua kunei lem bibiane, do'oba de jemijai tun najis.”

¹²Lajau tekoba penotoa Yesus teko ngen betanye ngen-Si, “Namen coa Bak kerno tun-tun Farisi'o gis atei waktau temi'uk Bak nadeak awei'o?”

¹³Yesus jemawab, “Tiep tanem de coa tenanem Bak-Ku neak surgo bakea cenabut.

¹⁴ Jibeakba renyeng ngen tun-tun Farisi'o. Tobo'o pemipin-pemipin buto, amen tun buto mipin tun buto, keduaine bakea us moi lem lubang.”

¹⁵Petrus madeak, “Tulung jemlas ngen keme, Bak!”

¹⁶Yesus jemawab ngen tobo'o, “Jano udi ati ngertai kulo?

¹⁷Coa namenka udi, demasuk moi lem bibia tu'un moi lem tenei ngen keluae igai?

¹⁸ Tapi de kunei bibia, asalne kunei atei. Do'oba de menea tun ijai najis.

¹⁹Kerno kunei atei timboaba pekeran de kidek, ngen lok munuak, menea uleak ngen ngenyan tun, menea uleak kidek, maling, mengike tetang tun luyen ngen fitneak.

²⁰Hal-hal'oba sembab tun ijai najis, ngen coa kerno mbuk ngen tangen de coa mepuk.”

²¹Lajau Yesus teminggea penan'o lalau moi daerah pa'ok kota Tirus ngen Sidon.

²²Suang selawei Kanaan kunei daerah'o, teko magea Yesus ngen mekik, “Anok Daud selenba uku! Kerno anok selaweiku pasuk roh kidek. Keadaanne pae'ak nien.”

²³Yesus coa jemawab samo sekilai, lajau penotoa teko magea Yesus ngen bekinoi, “Bak, mluakba selawei'o lalau. Si gu'ok bae neak belakang te!”

²⁴Jawab Yesus, “Allah de mutus Uku ngen bangso Israel, khususne ngen tobo'o de limau.”

²⁵Selawei'o teko lajau sujud neak adep Yesus ngen madeak, “Tulungba uku, Pak.”

²⁶Jawab Yesus, “Coa benea mok upan anok-anok ngen melukne moi kuyuk.”

²⁷“Benea, Pak,” jawab selawei'o, “tapi kuyuk mbuk ti'eak de cucia kunei meja tuanne.”

²⁸Lajau Yesus madeak ngen si, “Mak, kembiak lai imennu! Kunyauba tejijai jano de udi kemlok!” Waktau'o kulo anok selawei'o kaen.

²⁹Yesus teminggea penan'o, lajau paneu temotoa patoi Deneu Galilea. Ngen kenek das tebo lajau temot neak di.

³⁰Dau tun teko ngen-Si mbin tun-tun de tipang, de sutai, de pakuak, de bisau, ngen dau igai tun bolon de luyen. Tobo'o mletok tun-tun'o neak adep Yesus, ngen Si kemaen tun-tun'o.

³¹Tun dau neak di heran kemliak tun bisau pacok miling, tun tipang kaen, tun pakuak pacok paneu ngen tun sutai ngeliak. Tobo'o memujai Allah bangso Israel.

³²Sudo'o Yesus menok penotoa-Ne lajau madeak, “Uku selen kemliak tun dau yo. Sudo telau bilai tobo'o serepok Uku ngen coa temuan kembuk. Uku coa lok munyau tobo'o belek ngen te'nei nyemen, be tobo'o kelpai neak dalen.”

³³Lajau penotoa Yesus betanye ngen-Si, “Neak ipe ite lok dapet kembuk utuk tun dau yo neak penan sunyai yo?”

³⁴Yesus betanye ngen tobo'o, “Ade kedau ruti ngen udi?” “Tujuak,” jawab tobo'o, “ngen kedau kan titik.”

³⁵Lajau Yesus meluak tun dau'o temot neak das pitok.

³⁶Sudo'o Si mok tujuak ruti ngen kan'o, ngucep sukur ngen Allah. Yesus megit ruti ngen kan'o ngen tangen-Ne, lajau Si melei penotoa-Ne ngen tobo'o magiak ngen tun dau'o.

³⁷Kute tun dau'o mbuk sapei kenyang. Sudo'o penotoa Yesus kemopoa kembuk de lebiak. Kutene ade tujuak bokoa penuak.

³⁸Jumlah semanei de milem mbuk ade pat ribau, coa temasuk selawei ngen tetitik.

³⁹Sudo'o Yesus meluak tun dau'o belek. Si kemnek biduk ngen lalau moi daerah Magadan.