Read Rejang MATIUS 17 Bible Online

MATIUS 17 - Rejang bible

MATIUS 17

¹ Enum bilai sudo'o Yesus majok Petrus, Yakobus ngen pasuakne Yohanes, lalau moi tebo de lekat. Neak di ade tobo'o bae.

²Neak adep tobo'o, Yesus mubeak rupo; Papeane awei matai bilai ngen bajaune putiak besinea.

³Sesudo'o ketelau penotoa-Ne kemliak Musa ngen Elia miling ngen Yesus.

⁴Lajau Petrus madeak ngen Yesus, “Tuhan, riang nien ite neak yo. Amen Tuhan lok, uku bakea temgok telau kemah neak yo: Do utuk Tuhan, do utuk Musa ngen do igai utuk Elia.”

⁵ Waktau Petrus gidong miling embun de kembiak te'ang kemliling tobo'o ngen kunei embun'o teti'uk sa'ei de madeak, “Dioba Anok-Ku de Ku kemasiak, Si semnang atei-Ku. Teniukba Si!”

⁶Waktau penotoa-penotoa Yesus temi'uk sa'ei'o tobo'o telukup moi pitok kerno kembiak saben.

⁷Tapi Yesus teko ngen megong tobo'o. “Klongonba,” nadeak-Ne, “jibeak saben!”

⁸Waktau tobo'o denong min das, tobo'o coa kemliak api kulo seluyen Yesus.

⁹Sewaktau tobo'o tu'un kunei tebo, “Yesus minget ngen tobo'o, jibeak madeak ngen api bae jano de udi kemliak nano, ayok Anok Manusio de idup igai kunei matei-Ne.”

¹⁰ Penotoa-penotoa Yesus betanye ngen-Si, “Getai gu'au-gu'au agamo madeak, Elia mestai teko lebiak deno.”

¹¹Yesus jemawab, “Benea, Elia teko ngen si bakea mberes kutene.

¹² Tapi Uku madeak ngen ko, Elia sudo teko, namen tun-tun co'a kemnalne. Tobo'o menea si klokne bae. Ngen awei'o kulo tobo'o bakea menea Anok Manusio.”

¹³Lajau penotoa-Ne ngertai amen Yesus miling tetang Yohanes Pembaptis.

¹⁴Ketiko Yesus ngen ketelau penotoa-Ne belek ngen tun dau'o, suang semanei teko, sujud neak adep Yesus.

¹⁵Ngen madeak, “Bak, kemasiakba anokku. Si gilo bukei, olonne'o kembiak pa'eak, si awit us moi api ngen moi bio'a.

¹⁶Uku sudo mbin si ngen penotoa-penotoa Bak, tapi tobo'o coa dapet kema'en si.”

¹⁷Yesus jemawab, “Coa nien udi yo! Udi sungguak tun-tun de telo ulau ngen coa pecayo. Sapei tengen Uku mestai tinggea besamo udi ngen mestai sabar teradep udi? Mbin anok'o miyo!”

¹⁸Lajau Yesus mriteak roh jahat de neak lem anok'o kelua, lajau roh jahat'o kelue ngen anok'o ka'en pado saat'o kulo.

¹⁹Sesudo'o penotoa-penotoa Yesus teko ngen-Si seca'o de dewek ngen betanye ngen-Si, “Bak, jano sebab keme coa dapet musir roh jahat'o?”

²⁰ Yesus jemawab, “Sebab udi ku'ang pecayo. Ingetba! Amen udi temuan imen dekelai soa sawi, udi dapet madeak ngen tebo yo, ‘Baliak moi mini!’ paset tebo'o bakea baliak. Coa ade de coa mukin de dapet udi menea! [

²¹Tapi roh jahat yo nam nusir ngen bedu'o ngen puaso bae.]”

²²Waktau penotoa-penotoa Yesus bekopoa neak Galilea, Yesus madeak ngen tobo'o, “Coa an igai Anok Manusio bakea semreak ngen kuaso manusio.

²³Si bakea nunuak, tapi pado bilai ketelau, idup igai kunei matei-Ne.” Mako penotoa-penotoa-Ne jijai kembiak ibo.

²⁴ Waktau Yesus ngen penotoa-penotoa-Ne sapei neak Kapernaum, penagiak-penagiak pajak Bait Allah teko ngen Petrus ngen betanye, “Guaknu masen jano coa pajak Bait Allah?”

²⁵Petrus jemawab, “Nasen!”, Waktau Petrus belek, Yesus betanye ngen si lebiak deno, “Simon, awei ipe pedapetnu? Api de mestai masen pajak ngen rajo-rajo dunio yo? Rakyat jano tun asing?”

²⁶“Tun Asing,” Petrus jemawab. “Amen awei'o,” nadeak Yesus, “rakyat coa guno masen.

²⁷Tapi jibeakba ite menea tun-tun'o mengiak. Jijai lalauba moi daneu utuk ngeweya, mokba kan de dute ngen ko temakep, neak lem bibiane'o ko bakea temau matai caci de genep utuk pajak ite beduai. Mokba caci'o, nasen ngen tobo'o pajak ite utuk Bait Allah.”