Read Rejang MATIUS 18 Bible Online

MATIUS 18 - Rejang bible

MATIUS 18

¹ Pado waktau'o penotoa-penotoa Yesus teko ngen-Si ngen betanye, “Api de manggep kembiak lai neak antaro umat Allah?”

²Yesus menok suang anok titik, ngen mpek si je neak adep tobo'o.

³ Lajau Yesus madeak, “Pecayoba! Amen udi bubeak ngen jijai awei anok titik, udi bakea jijai anggota umat Allah.

⁴Tun de mrendeak diraine ngen jijai awei anok yo, dioba delai neak antaro umat Allah.

⁵Ngen tun de temimo anok de awei yo kerno Uku, taine temimo Uku.”

⁶“Api semaleak do kunei anok titik yo coa pecayo igai ngen-Ku, lebiak baik butau lai neket moi kagenne ngen si ndem neak laut lem.

⁷Padeak celakone dunio yo kerno hal-hal de sembab tun beduso. Hal-hal de awei'o selalu ade, tapi celakoba tun de sembabne.

⁸ Amen tangennu atau kekeanu jemijai ko beduso, notongba ngen nuangba. Kerno lebiak baik baginu idup ngen tangen atau kekea depeak, kunei pado udi nuang moi lem nerako ngen keduai tangen ngen kekeanu.

⁹ Ngen amen matainu de sembab ko beduso, cukea ngen nuangba, kerno lebiak baik bagiaknu idup ngen Allah do matai, kunei pado nuang moi lem nerako ngen duai matai.”

¹⁰“Awas! Jibeak mino suang tun-tun titik yo. Sebab ingetba, malaikat-malaikat tobo'o selalu ade neak adep Bak-Ku neak surgo. [

¹¹ Kerno Anok Manusio teko utuk semlamat de nyep!]

¹²Awei ipe pendapetnu? Amen dikup tun temuan sotos likup domba, ngen dikup neak antarone ade de nyep, jano de bakea nea tun'o? Sahe si bakea teminggea de sembilan puluak sembilan'o neak tebo ngen lalau mesoa de nyep'o.

¹³Pecayoba Uku amen si temau igai domba'o, si lebiak riang das de dikup'o kunei pado de sembilan puluak sembilan de coa nyep.

¹⁴Awei'o kulo Baknude neak surgo kunei tun-tun de tembei pecayo ngen Uku yo nyep.”

¹⁵ “Amen pasuakne menea duso teadep ko, lalauba ngen si tenunjukba saleakne. Meneaba seca'o diem-diem antaro udi beduai bae. Amen si temurut nadeaknu, mako ko berasea temau igai pasuaknu.

¹⁶Amen si coa temi'uk ko, mbinba do atau duai tun igai. Sebab lem kiteb tenulis awei yo, ‘Sekuang-kuangne harus ade duai atau telau tun saksai utuk mutus suang tun de tenuduak be saleak.’

¹⁷Amen si coa lok temimo nasehat tun-tun'o senapei. Ngen amen si coa kulo lok temi'uk nasehat jemaat, tapi anggepba si awei suang tun penagiak ngen tun de coa kemnal Allah.”

¹⁸ “Udi perlu namen: Jano de udi coa meluak benea neak dunio yo kulo coa meluak neak surgo. Ngen jano de benea neak dunio kulo bakea benea neak surgo.

¹⁹Udi perlu namen kulo Uku madeak ngen ko igai: Amen neak antaro udi neak dunio yo, duai tun sepakat tetang jano bae ngen de mu'one, kinoi do'o bakea knabul ngen Bak-Ku neak lem surgo.

²⁰Sebab neak ipe duai atau telau tun bekopoa kerno Uku, Uku ade neak tengeak-tengeak tobo'o.”

²¹ Sesudo'o Petrus teko ngen madeak, ngen Yesus, “Tuhan, amen pasuakku menea duso ngen uku, sapei kedau kilai uku harus mapun si? Jano sapei tujuak kilai?”

²²Yesus jemawab: “Coa, iso sapei tujuak kilai, tapi tujuak puluak kilai tujuak kilai!

²³Amen Allah meriteak, keadaanne awei lem perumpamo yo: Suang rajo lok semlesei utang-utang pegawai-pegawaine.

²⁴Waktau si muloi mrikso suang pegawai nadep ngen si de butang bejuta-juta,

²⁵ngen yo coa dapet mlunasne. Jijai rajo'o mriteak, supayo pegawai'o jenuea serpok ngenyan ngen anokne ngen kute hokne utuk masen utangne.

²⁶Pegawai'o sujud sembeak si, ngen minoi, ‘Sabarba tuan teadepku, uku bakea mlunas kute utangku.’

²⁷Rajo'o kembiak selen kemliakne, si mapus kute utangne.

²⁸Tapi waktau pegawei rajo'o keluea, si temmau ngen pegawai de luyen de butang ngen si kekedau ribau, Si temakep, mecit kuatne'o ngen madeakne, ‘Nasenba kute utangnu!’

²⁹Lajau kuat'o sujud neak adepne ngen minoi, ‘Sabarba kileak kuat, kutenene'o bakea uku mlunas!’

³⁰Tapi pegawai Rajo'o temulok. Saleakne si semreak kuatne moi lem sel sapei si mlunasi utangne.

³¹Tiko pegawai rajo de luyen kemliak jano de tejijai, tobo'o kembiak selen lajau semapei kutene ngen rajo.

³²Lajau rajo menok pegawai de jahat'o ngen madeak ngensi, ‘Hoi pegawai de jahat, kute utangnu sudo kumapus kerno ko minoi ngen uku.

³³Ko kulo harus semlen ngen kuatnu awei uku sudo kemasiakko, au coa?’

³⁴Rajo kembiak mengiak. Pegawai rajo de jahat'o nasuk moi lem sel sapei si mlunas kute utangne.”

³⁵Yesus semlesei ceritone awai yo, “Bak-Ku de neak surgo bakea menea awei yo kulo ngen udi, amen udi coa mapun pasuaknu ngen ikhlas.”