Read Rejang MATIUS 19 Bible Online

MATIUS 19 - Rejang bible

MATIUS 19

¹Sesudo Yesus selesei madeak kutene'o, Si teminggea Galilea lajau lalau moi daerah Yudea neak dipoa Bioa Yordan.

²Dau tun temotoa Si ngen Si kemaen tobo'o neak di.

³Lajau teko tun-tun Farisi utuk jembak Si. Tobo'o betanye, “Temurut ukum agamo ite jano buliak tun semaok ngenyanne ngen alasan jano bae?”

⁴ Yesus jemawab, “Jano udi coa mbaco lem kiteb, Allah de mencipto manusio, sejak mulone jemijai tobo'o semanei ngen selawei?

⁵ Ngen sudo'o Si madeak, ‘Sebab'o semanei bakea teminggea bak makne ngen ijai do ngen ngenyanne, sehinggo keduaine jijai do.’

⁶Jijai tobo'o coa igai duai tapi do. Kerno'o de bijenijai Allah ijai do, coa buliak manusio cemei.”

⁷ Lajau tun-tun Farisi betanye ngen-Si, “Amen aweio getai Musa meluak melei su'et sa'ok, amen tun sema'ok ngen yanne?”

⁸Yesus jemawab, “Musa mijin ko sema'ok ngenyannu kerno udi saro najea, tapi sebeneane coa awei'o pado mulone.

⁹ Jijai teni'ukba dio: Api de semaok ngen yanne, kerno selawei'o coa nyeleweng, ngen si nikeak igai ngen selawei luyen, mako si berzina.”

¹⁰Mako penotoa-penotoa Yesus madeak ngen-Si, “Amen awei yo halne hubungan antaro sematen ngen ngenyan, lebiak baik jibeak nikeak.”

¹¹Yesus jemawab, “Coa kutene tun nam temimo nadeakne'o, cuma tun-tun de sudo Allah tentau.

¹²Ade tun coa dapet nikeak sebab tobo'o memang laherne awei'o, ngen ade kulo de coa nam nikeak kerno si nea awei'o ngen tun luyen. Ade kulo de miliak dewek utuk coa nikeak, supayo dapet melayan Allah. Tun de sanggup temimo ajaran yo kunyau si temimone.”

¹³Ade tun-tun mbin anok-anok titik ngen Yesus supayo Si mletok tangen utuk melei rahmat das tobo'o ngen de mu'o tobo'o. Tapi penotoa-penotoa-Ne mengiak ngen tun-tun'o.

¹⁴Mako Yesus madeak ngen penotoa-penotoa-Ne, “Kunyauba anok-anok'o teko ngen Uku! Jibeakba tengeak tobo'o, Sebab tun-tun de awei yo de jijai anggota umat Allah.”

¹⁵Lajau Yesus mletok tangen-Ne utuk melei rahmat neak das ulau anok-anok'o, sudo'o Si lalau kunei di.

¹⁶Pado do bilai teko ngen Yesus ngen suang semenai nadeakne, “Pak gu'au, jano plep de baik de harus uku menea supayo dapet temimo idup de baka?”

¹⁷Yesus jemawab, “Getaiko betanye ngen Uku tetang jano de baik? Ade Do de baik amen ko lok idup, ko mestai totoa kute periteak-periteak Allah.”

¹⁸ Tanye tun'o, “Periteak de ipe?” Nadeak Yesus, “Jibea munuak, jibeak berzinah, jibeak maling ngen jibeak ngike,

¹⁹ hormatba bak maknu ngen kasiakba sesamo manusio awei dirainu dewek.”

²⁰“Kutene periteak-periteak'o sudo ku temurut,” tun uai'o jemawab. “Jano igai de masiak ku'ang?”

²¹Nadeak Yesus ngensi, “Amen ko lok jijai sepurno, lalauba jenuo kute hoknu. Meleiba caci ngen tun peset, ngen ko bakea dapet harto neak surgo. Sesudo'o tekoba temotoa Uku!”

²²Waktau tun uai temi'uk de nadeak-Ne'o lalauba si ngen ibo, sebab si kembiak kayo.

²³Lajau Yesus madeak ngen penotoa-penotoa-Ne, “Uku madeak ngen ko, kembiak saro utuk tun kayo jijai anggota umat Allah.

²⁴Ngen dio igai de lok Uku madeak ngen ko, lebiak mudeak dikup uto masuk moi lem lubang dolom kunei pado tun kayo masuk dunio belau temuan Allah.”

²⁵Tiko penotoa-penotoa-Ne temi'uk nadeak Yesus'o, tobo'o heran. “Amen awei'o,” nadeak tobo'o, “Api de nam selamat?”

²⁶Yesus denong tobo'o ngen madeak, “Utuk manusio hal yo mustahil! Tapi utuk Allah kutene mukin.”

²⁷Lajau Petrus jemawab, “Kemliakba, keme sudo teminggea kutene utuk temotoa Bak. Jijai jano de bakea keme temimo?”

²⁸ Yesus madeak ngen tobo'o, “Pecayoba: Neak dunio de Belau, Anok Manusio bakea temot neak das kersaine de mulio utuk meriteak. Pado waktau'o udi de penotoa-penotoa-Ku bakea temot neak das keduai belas kersai penan Uku meriteak ngen makim keduai belas sukau bangso Israel!

²⁹Ngen tiep tun de sudo teminggea umeak, pasuak semanei atau selawei, bak, mak, anok-anok atau kebun kerno Uku, tun'o bakea temimo igai sotos kilai lipet. Ngen si bakea temimo kulo idup de baka.

³⁰ Tapi dau tun de uyo yo dute bakea pertamo jijai de kedong ngen de kedong bakea jijai de pertamo.”