Read Rejang MATIUS 20 Bible Online

MATIUS 20 - Rejang bible

MATIUS 20

¹“Amen Allah meriteak keadaanne awei perumpamo yo: Suang tun temuan kebun anggur, keluea pado pueng-pueng mesoa tun utuk kerjo neak kebun anggurne.

²Sudo'o si tujau masen tobo'o de bilai do caci pirok dinar. Si meluak tobo'o kerjo neak kebun anggurne.

³Jam sembilan pueng. Temuan kebun'o lalau kelua igai, kemliak kekedau tun de nganggur neak pasar.

⁴Mako nadeakba tun'o ngen tobo'o, ‘Lalauba udi kerjo neak kebun anggurku, uku bakea masen udi ngen upeak de sesuoi.’

⁵Tobo'o kulo lalau jam duai belas tengeak bilai, ngen jam telau kebilai pelbeak, temuan kebun'o keluea ngen menea hal desamo.

⁶Kekiro jam lemo pelbeak, si keluea igai kemliak masiak ade tun-tun de nganggur. Lajau si betanye ngen tobo'o, ‘Getai udi je bae de bilai lutup neak yo ngen coa menea jano-jano?’

⁷Tun-tun'o jemawab, ‘Coa ade tun de melei upeak keme utuk kerjo.’ ‘Amen awei'o,’ nadeak de temuan kebun'o, ‘lalauba udi kerjo neak kebunku.’

⁸ Waktau bilai pelbeak, de temuan kebun madeak ngen mandorne, ‘Kenokba pekerjo pekerjo'o ngen nasenba upeak tiep-tiep tobo'o, muloi kunei de masuk kedong sapei ngen de pertamo.’

⁹Lajau tekoba pekerjo-pekerjo de muloi kerjo kunei jam lemo pelbeak. Tiep-tiep tobo'o temimo do caci pirok.

¹⁰Sudo'o teko kulo pekerjo-pekerjo de seniwo sejok pueng. Tobo'o peker bakea temimo lebiak. Padahal tobo'o kanyen temimo do caci pirok kulo.

¹¹Waktau temimo cacio, tobo'o gerunyam ngende temuan kebun:

¹²‘Pekerjo-pekerjo tobo'o de teko kedong'o cuma kerjo de jam. Padahal keme de kerjo de bilai lutup neak tengeak panesne matai bilai. Tapi tuan masen tobo'o serai ngen keme!’

¹³Temuan kebun anggur'o jemawab, ‘Ngen saleak suang kunei tobo'o, kuat, uku coa saleak teadep ko. Isoka ite tujau temimo do pirok utuk kerjo debilai, au coa?

¹⁴Nah, mokba upeaknu bagiannu ngen lalauba. Uku lok melei ngen tun de masuk kedong yo upeak desamo ngen ko.

¹⁵Jano uku coa buliak menea kelokku ngen de uku temuan? Jano ko iri kerno uku mudeak atei?’ ”

¹⁶ Lajau Yesus madeak igai, “Awei yo kulo tun de kedong bakea jijai de pertamo, ngen de pertamo bakea jijai de kedong.”

¹⁷Tiko Yesus nujau moi Yerusalem, neak tengeak dalen Si menok keduai belas penotoa-Ne bekopoa dewek. Lajau madeak ngen tobo'o,

¹⁸“Ti'ukba! Ite uyo nujau moi Yerusalem. Neak di Anok Manusio bakea de senreak ngen pemipin imem-imem ngen gu'au-gu'au agamo. Lajau Si bakea de nukum matei.

¹⁹Tobo'o bakea semreak Si ngen bangso-bangso de coa Yahudi, tobo'o kulo mliyam Si, semikso Si ngen semalib Si. Pado bilai ketelau Si idup igai.”

²⁰Sesudo'o ngenyan Zebedeus teko ngenanok-anokne ngen Yesus. Neak adep Yesus si sujud ngen minoi tulung nien.

²¹“Mak lok jano?” tanye Yesus. Mak'o jemawab, “Uku lok keduai anokku yo temot neak kideu ngen kanan Bak, amen Bak kenyo jijai Rajo.”

²²“Udi coa namen jano de udi minoi,” nadeak Yesus ngen tobo'o. “Jano udi sanggup menem kunei caker derito de mestai Uku menem yo?” “Sanggup,” tobo'o jemawab.

²³Yesus madeak, “Memang udi bakea menem kulo kunei caker-Ku. Tapi hal api de bakea temot neak kideu ngen neak kanen-Ku, iso Uku de temtaune. Penan'o adeba utuk tun-tun de sudo Bak-Ku temtau.”

²⁴Waktau de puluak penotoa de luyen temi'ak hal'o, tobo'o mengiak ngen keduai pasuak'o.

²⁵ Kerno'o Yesus menok tobo'o kutene lajau madeak, “Udi namen bahwo pemipin-pemipin bangso de coa kenal Allah temindes rakyatne ngen pejabat-pejabat tobo'o temken tobo'o kulo.

²⁶ Tapi udi coa buliak awei'o. Sebelekne tun de lok jijai lai neak antaro udi, harus jijai pelayannu.

²⁷Ngen tun de lok jijai de pertamo neak antaro udi harus jijai hambanu.

²⁸Samo awei Anok Manusio'o kulo; Si teko coa utuk nelayan, tapi utuk mlayan ngen semreak nyabaine utuk mbebas tun dau.”

²⁹Waktau tobo'o teminggea Yerikho, dau tun temotoa Yesus.

³⁰Duai tun buto gidong temot neak biding dalen, waktau tobo'o temi'uk Yesus liwet, tobo'o menggang, “Anok Daud senlenba keme!”

³¹Tun dau de ade neak di mengiak tobo'o ngen meluak tobo'o diem. Tapi tobo'o mengang tambeak lek, “Tuhan Anok Daud, selenba keme!”

³²Lajau Yesus bedan ngen menok tobo'o. “Jano de kelok udi lok de nea-Ku bagi udi?” tanye Yesus.

³³Tobo'o jemawab, “Tuan, keme lok ngeliak!”

³⁴Yesus selen ngen tobo'o, lajau megong matai tobo'o. Waktau'o kulo tobo'o dapet ngeliak. Lajau tobo'o temotoa Yesus.