Read Rejang MATIUS 22 Bible Online

MATIUS 22 - Rejang bible

MATIUS 22

¹Yesus miling igai ngen tun dau makei perumpamo,

²“Amen Allah meriteak keadaanne awei perumpamo yo: Rajo de semiyap pesta nikeak utuk anokne.

³Rajo'o mluak pelayan-pelayanne lalau mapet tun-tun de nundang moi pesta'o. Tapi tobo'o coa lok teko.

⁴Sesudo'o rajo mutus igai pelayan-pelayan de luyen. Nadeakne ngen tobo'o: ‘Mlei namen ngen tun de nundang'o: Hidangan pesta bi seniap, kunei sapai, ngen anok-anok sapaiku de kembiak ba'es sudo sembeliak. Kutene teko bi siap maro moi pesta nikeak yo!’

⁵Tapi tamu-tamu de nundang'o, coa miraune. Tobo'o lalau moi penan kerjone dewek-dewek; di kup moi kebunne de luyen murus usahone;

⁶ngen de luyen igai temakep pelayan-pelayan rajo'o, lajau mokoa ngen munuak tobo'o.

⁷Waktau rajo temi'uk hal'o mengiak nien rajo, si kemirim tentrane utuk munuak tun-tun de munuak'o ngen mbem kota tobo'o.

⁸Sesudo'o menok pelayan-pelayanne lajau madeak, ‘Pesta nikeak sudo siap, tapi tun de nundang coa patas.

⁹Lalauba uyo moi dalen-dalen lai, ngen nundangba sekedau-kedaune tun moi pesta nikeak yo.’

¹⁰Mako pelayan-pelayan'o lalau. Tobo'o lalau moi dalen-dalen lai, lajau melungguk kute tun de tobo'o temau neak di, de baik ngen de jahat. Sehinggo penuakba ruangan pesta nikeak'o ngen tamu.

¹¹Waktau rajo'o masuk utuk temau ngen tamu-tamu, si kemliak, ‘Ade suang tun neak pesta'o coa makei keracok pesta.’

¹²Lajau si betanye ngen tun'o, ‘Kuat awei ipe ko dapet masuk moi lem yo ngen coa makei keracok pesta?’ Tapi tun'o coa nam madeak jano-jano.

¹³ Lajau rajo'o madeak ngen pelayan-pelayanne, ‘Neket kekea ngen tangen tun yo, ngen nuang si moi luea moi penan de kelem. Neak di bakea ade indoi ngen saro.’ ”

¹⁴Lajau Yesus semudo perumpamo'o awei yo, “Dau tun de nanggea, tapi didik bae de niliak.”

¹⁵Sesudo'o tun-tun Farisi lalau basen besamo-samo, tetang awei ipe tobo'o dapet jembak Yesus liwet pertanyaan-pertanyaan.

¹⁶Mako tobo'o mutus penotoa-penotoa tobo'o ngen Yesus serpok kekedau anggota golongan Herodes. Tun-tun'o madeak ngen Yesus, “Gu'au, keme namen bak jujur, bak ngajea ngen tetang utang kelok Allah utuk manusio, coa mirau pendapet api bae. Sebab bak coa pandang tun.

¹⁷Kerno'o cubo Bak madeak ngen keme temurut aturan agamo ite: Jano buliak keme masen pajak ngen rajo atau coa?”

¹⁸Yesus namen kelok tobo'o de jahat'o, jijai Si madeak, “Hoi, tun-tun munafik! Getai udi lok jembak Uku?

¹⁹Cubo tunjuk ngen Uku caci de makei utuk masen pajak'o!” Lajau tobo'o melei ngen-Si keping caci pirok.

²⁰Yesus betanye ngen tobo'o, “Gambar ngen gen api dio?”

²¹“Rajo,” tobo'o jemawab. Mako Yesus madeak ngen tobo'o, “Amen awei'o nleiba ngen rajo jano de jijai hok Rajo, ngen jano de hok Allah.”

²²Waktau tobo'o temi'uk hal'o tobo'o heran. Mako tobo'o lalau teminggea Yesus.

²³ Pado bilai'o kulo kekedau tun Saduki teko ngen Yesus. Tobo'o adeba golongan de temuan pendapet bahwa tun matei coa bakea idup igai.

²⁴ “Pak gu'au,” nadeak tobo'o, “Musa majea awei yo: Amen suang semanei matei ngen si coa temuan mok, ngen pasuakne mestai nikeak ngen jandone supayo melei anok ngen tun de sudo matei'o.

²⁵Perneak ade tujuak tun sepasuak de tinggea neak yo. De tuai nikeak lajau matei, coa temuan anok. Jando'o teminggea utuk pasuakne.

²⁶Pasuakne o sudo'o ninggea kulo ngen coa temuan anok. Awei yo kulo tejijai ngen ketelau sapei ngen de ketujuak.

²⁷Akhirne selawei'o kulo meninggea.

²⁸Nah, pado waktau tun matei nidup igai, ngenyan api selawei'o? Sebab ke tujuak-tujuakne bi nikeak ngen si.”

²⁹Yesus jemawab, “Udi kembiak keliru, sebab ko coa ngertai kiteb awei'o kulo kuaso Allah.

³⁰Sebab amen tun matei idup igai, tobo'o coa bakea nikeak igai luyen, tobo'o bakea idup awei malaikat neak surgo.

³¹Jano udi ati perneak mbaco jano de Allah nadeak tetang tun matei de nidup igai? Allah madeak,

³² ‘Ukuba Allah Abraham, Allah Ishak ngen Allah Yakub.’ Allah'o coa Allah tun matei. Si Allah tun idup!”

³³Ketiko tun dau temi'uk ajaran Yesus, tobo'o kembiak heran ngen ajaran-Ne.

³⁴Pado waktau tun-tun Farisi temi'uk bahwo Yesus sudo menea tun-tun Saduki coa dapet miling igai, tobo'o bekopoa.

³⁵ Suang kunei tobo'o, adeba suang gu'au agamo, betanye utuk jembak Yesus.

³⁶“Pak gu'au,” nadeakne, “Periteak ipe de kembiak utamo neak lem ukum agamo?”

³⁷ Yesus jemawab, “Cintoba Tuhan Allahnu ngen sepenuak ateinu, ngen segenep jiwonu, ngen kute akeanu.

³⁸Do'oba periteak de kembiak utamo ngen de kembiak peting!

³⁹ Periteak de keduai samo ngen de pertamo'o: Cintoba sesamonu aweiko cemito di rainu dewek.

⁴⁰Kute hukum agamo de nelei Musa ngen ajaran nebai-nebai tegatung pado keduai periteak'o.”

⁴¹Waktau tun-tun Farisi gidong bekopoa neak di, Yesus betanye ngen tobo'o,

⁴²“Jano pedapet udi tetang Rajo Penyelamat? Anok api Si?” “Anok Daud,” tobo'o madeak.

⁴³“Amen awei yo,” tanye Yesus, “Getai ngen pipinan Roh Daud senbut Rajo Penyelamat ‘Tuhan’? Kerno Daud madeak,

⁴⁴ ‘Tuhan madeak ngen Tuhanku: temotba neak de peak kanen-Ku, sapei Uku menea musuak-musuak-Nu aleak ngen-Ko.’

⁴⁵Jijai amen Daud senbut Rajo Penyelamat'o ‘Tuhan’, awei ipe mukin Rajo Penyelamat'o Anok Daud?”

⁴⁶Coa suang tun kulo dapet jemawab Yesus. Ngen muloi bilai'o coa ade de binai temnai jano-jano igai ngen-Si.