Read Rejang MATIUS 24 Bible Online

MATIUS 24 - Rejang bible

MATIUS 24

¹Tiko Yesus teminggea Bait Allah, penotoa-penotoa-Ne teko ngen-Si ngen temunjuk ngen bangunan-bangunan Bait Allah.

²Yesus madeak ngen tobo'o, “Jano udi kemliak kutene'o? Udi mestai namen, bahwa coa gen do kulo kunei bangunan-bangunan'o bakea tinggea tesusun neak penanne. Kutene bakea nubuak.”

³Sudo'o Yesus temot lalau moi Tebo Zaitun, gidong Si temot, penotoa-penotoa-Ne teko utuk miling ngen Si seca'o pribadi. “Nadeakba ngen keme, tengen kutene'o bakea tejijai,” madeak tobo'o ngen-Si. “Jano tando-tando de temunjuk teko Bak ngen akhir zaman?”

⁴Yesus jemawab, “Teateiba, jibeak sapei udi te pike.

⁵Sebab dau tun bakea teko ngen makei gen-Ku ngen madeak, ‘Ukuba Rajo Penyelamat!’ Tobo'o bakea mike dau tun.

⁶Udi bakea temi'uk sa'ei-sa'ei ngen kabar prang, tapi jibeak saben. Sebab hal'o mestai tejijai, tapi'o coa beartei sudo waktaune kiamat.

⁷Bangso de do bakea prang mlawen bangso de luyen, negara de do bakea semrang negara de luyen. Neak ipe-ipe bakea tejijai bahayo nyemen ngen gepo.

⁸Kutene'o tembei mulone bae, awei bolon de nidep su'ang selawei waktau lok mlaher.

⁹ Sudo'o udi bakea tenakep ngen semreak utuk senikso ngen nunuak. Ngen kute dunio bakea jemngik udi kerno udi penotoa-Ku.

¹⁰Pado waktau'o dau tun bakea murtad, ngen mianat serto jemngik do ngen de luyen.

¹¹Dau nebai-nebai palsu bakea timboa ngen mike dau tun.

¹²Plep kidek bakea makok kembiak luea biaso sapei tun dau coa nam igai mengasiak.

¹³ Tapi tun de beta'en sapei akhirne bakea senlamat.

¹⁴Ngen Bito Baik tetang kero Allah meriteak bakea ke nabar moi kute dunio supayo kute tun temi'ukne. Sesudo'o kiamat teko.”

¹⁵ “Udi bakea kemliak ‘Plep jahat de ngajua’, awei de nadeak Nebai Daniel, tegok neak penan de sucai.

¹⁶Pado waktau'o, tun de ade neak Kota Yudea mestai melilai moi tebo-tebo.

¹⁷ Tun de berade neak das atep umeak, jibeak tuun utuk mok barang de tenuanne kunei lem umeak.

¹⁸Tun de berade neak kebun jibeak belek utuk mok keracokne.

¹⁹Padeak menyaben bilai-bilai'o bagiak selawei de ngandung, ngen mak de masiak se musu cupikne!

²⁰Bedu'oba supayo jibeak sapei udi harus melilai pado musim ujen atau pado bilai Sabat tun Yahudi.

²¹ Bilai-bilai de menyaben'o bakea ade sikso ngen luea biasoawei de ati perneak tejijai sejok awal dunio sapei uyo ngen de coa bakea tejijai igai.

²²Sekirone Allah coa semiket waktaune; mako coa ade suang kulo de selamat. Tapi kerno umat-Ne, Allah semiket maso'o.

²³Pado waktau'o amen ade su'ang tun ngen tun madeak ngen udi, ‘Keliak, Rajo Penyelamat ade neak yo’ atau ‘Si ade neak di!’ Jibeakba pecayo ngen tun'o.

²⁴Sebab bakea timboa tun-tun de senlamat de palsu ngen nebai-nebai palsu. Tobo'o bakea made plep-plep de luea biaso ngen mujizat-mujizat utuk mike amen mukin umat Allah kulo.

²⁵Jijai, ingetba! Uku sudo melei namen ngen udi telebiak kileak ayok hal'o tejijai.

²⁶ Amen tun madeak ngen ko, ‘Keliak, Si ade neak di neak padang gurun!’ — jibeak ko lalau moi mindi. Atau amen tobo'o madeak, ‘Keliak Si bunyin neak lem bilik neak yo!’ — jibeak udi pecayo.

²⁷Sebab teko-Ne Anok Manusio awei cahayo kilet besinea kunei timur, ngen sapei barat.

²⁸ Neak ipe ade bukei, neak di ade burung de mbuk bukei.”

²⁹ “Coa an sesudo maso de saro'o, matai bilai bakea jijai gelep ngen bulan coa becayo igai. Bitang-bitang bakea us kunei lenget ngen paro penguaso lenget bakea kacau balau.

³⁰ Sesudo'o tando anok manusio bakea keten neak lenget. Pado waktau'o kute bangso neak bumai bakea ngindoi. Tobo'o bakea kemliak Anok Manusio teko neak das embun ngen kuaso ngen kemulioanne delai.

³¹Trupet lai bakea sena'ei, ngen Anok Manusio bakea mluak malaikat-malaikat-Ne kemopoa umatne kunei kepat sudut bumai, kunei ujung lenget dedo sapei ujung lenget de luyen.”

³²“Mokba pelajaran kunei pun de senbut ara. Amen dandanne ijo ngen luyek ngen muloi tunes, udi namen kerno musim panes. Bipa'ok.

³³Awei'o kulo amen udi kemliak hal-hal'o tejijai, udi namen kerno waktaune bi pa'ok nien.

³⁴Kelokba ko ngertai! Hal-hal'o bakea tejijai ayok tun-tun de idup uyo matei kutene.

³⁵Lenget ngen bumai bakea nyep, tapi Firman-Ku tep selamo-lamone.”

³⁶“Coa gen de namen tengen bilaine yo ngen jamne, malaikat-malaikat neak surgo coa, ngen Anok Allah kulo coa, cuma Bak dewek de namen,

³⁷ Amen Anok Manusio tekobe, keadaanne awei neak zaman Nuh bel'o.

³⁸Pado bilai-bilai ayok banjir lai'o, tun-tun mbuk menem, ngen nikeak. Awei'oba seterusne sapei pado bilai Nuh masuk moi lem kepea.

³⁹ Pado waktau banjir'o temipo tobo'o kute sadar bakea jano de gidong tejijai, awei'oba kulo keadaanne konyo amen Anok Manusio teko.

⁴⁰Pado waktau'o, duai tun gidong kerjo neak kebun: Suang tun bakea nembin, ngen suang tun igai teninggea.

⁴¹Duai selawei gidong gemiling gendum: Suang tun bakea nembin, ngen suang tun igai teninggea.

⁴²Jijai, teateiba, sebab udi coa namen tengen Tuhannu bakea teko.

⁴³ Ingetba dio! Seandaine temuan umeak namen jam kedau neak bilai klemen maling bakea teko, si coa bakea tidua, supayo maling coa masuk moi lem umeakne.

⁴⁴Sebab'o udi kulo mestai siap. Kerno Anok Manusio bakea teko pado saat de coa udi demugo.”

⁴⁵Nadeak Yesus igai, “Amen awei'o de ipe de setia ngen pacok? Siba de naket tuanne ijai pemipin pelayan-pelayan de luyen supayo si melei tobo'o kembuk pado waktaune.

⁴⁶Padeak bahagiane pelayan'o amen tuanne belek, ngen temau si gidong menea tugasne.

⁴⁷Tuanne bakea cemayo kute hartone ngen pelayan'o.

⁴⁸Tapi amen pelayan'o jahat, si bakea madeak lem ateine,

⁴⁹‘Tuanku masiak an belek,’ lajau si muloi mokoa pelayan-pelayan de luyen, ngen kembuk menem ngen tun-tun pemabuk.

⁵⁰Sesudo'o tuanne bakea belek pado bilai ngen jam de coa te sako-sako.

⁵¹Mako pelayan-pelayan'o bakea mipai ngen tuanne, kunei tuanne, moi penan tun-tun munafik. Tobo'o bakea ngindoi ngen derito neak di.”