Read Rejang MATIUS 25 Bible Online

MATIUS 25 - Rejang bible

MATIUS 25

¹ “Amen Anok Manusio teko utuk meriteak, de umpamo awei yo: Ade puluak semulen pengapit pengaten masing-masing tobo'o mok lapu. Lajau lalau semsung pengaten semanei.

²Lemo neak antarone bodong ngen lemo neak antarone pacok.

³Lemo semulen de bodong mbin lapune, tapi coa mbin minyok.

⁴Lemo semulen de pacok mbin lapune ngen kulo minyok neak lem penanne.

⁵Pengaten semanei cendok sapei, lajau semulen-semulen'o muloi setekuk lajau tetidua.

⁶Waktau uak malem ade sa'ei menggang, ‘Pengaten semanei teko! Maro senambut si!’

⁷Puluak semulen'o klongon ngen midup lapu tobo'o.

⁸Semulen de bodong madeak ngen semulen de pacok, ‘Neleiba keme minyoknu didik ngen keme, kerno lapu keme lok padem.’

⁹‘Coa nam!’ jawab semulen de pacok, ‘Kerno be ite kute coa temuan genep minyok. Lalauba tukua neak warung.’

¹⁰Lajau semulen bodong lalau temukuane, waktau tobo'o lalau tekoba pengaten semanei. Lemo semulen semiap lajau serpok ngen pengaten semanei moi penan pesta, lajau bang tekatup!

¹¹ Sesudo'o teko kulo semulen-semulen de bodong'o, tobo'o menggang ngen madeak, ‘Tuan-tuan, nukokba keme bang.’

¹²Tapi pengaten semanei'o jemawab, ‘Uku coa kenal udi!’ ”

¹³Lajau Yesus temutup perumpamo yo ngen madeak awei yo, “Kerno'o bejago-jagoba, kerno udi coa namen bilai ngen waktaune.”

¹⁴ “Amen Anok Manusio teko utuk meriteak, hal'o umpamo awei yo: Su'ang semanei lok berakat moi penen de uak. Si menok pelayan-pelayan semayo hartone ngen tobo'o.

¹⁵Ngen tiep pelayan'o si melei temurut pacokne masing-masing ngen suang tun si melei lemo ribau caci mas. Ngen de luyenne duai ribau caci mas. Ngen de su'ang igai si melei seribau caci mas. Lajau si berakat.

¹⁶Pelayan de temimo lemo caci mas segro lalau jagea, lajau dapet utung lemo ribau caci mas igai.

¹⁷Awei'o kulo pelayan de temimo duai ribau caci mas'o dapet utung duai ribau igai.

¹⁸Tapi pelayan de temimo seribau caci mas lalau ngen mikoa lubang, lajau munyin caci tuanne neak di.

¹⁹An sesudo'o, tuan pelayan-pelayan'o belek. Si menok tobo'o ngen temanye jano de tobo'o menea ngen cacine.

²⁰Pelayan de temimo lemo caci mas'o teko, ngen melei puluak ribau. ‘Tuan,’ nadeakne, ‘Tuan melei lemo ribau caci mas ngen uku. Keliakba uku dapet utung lemo ribau igai.’

²¹‘Baes,’ nadeak tuan'o, ‘Ko adeba pelayan de baik ngen setia. Kerno ko dapet Uku pecayo ngen de didik, uku bakea pecayo dedau ngen ko. Masukba milem beriang-riang ngen uku!’

²²Lajau pelayan de temimo duai ribau caci mas'o, teko nadeakne, ‘Tuan, Tuan bi melei duai ribau caci mas ngen uku. Keliak ba, uku bi dapet utung duai ribau caci mas igai.’

²³‘Baes,’ nadeak tuan'o, ‘Ko pelayan de baik ngen setia. Kerno ko dapet uku pecayo ngen de didik, uku bakea pecayo dedau ngenko. Masukba ngen milem beriang-riang ngen uku!’

²⁴Sesudo'o pelayan de temimo seribau caci mas'o teko, ngen madeak, ‘Tuan, uku namen tuan suang tun de telo. Tuan coa temanem, ngen mungut aseya neak penan Tuan coa semirok semlan.

²⁵Uku saben, jijai uku lalau munyin caci Tuan neak lem pitok. Dioba caci Tuan.’

²⁶‘Ko pelayan de jahat ngen malas!’ nadeak tuan'o. ‘Isokah ko sudo namen bahwa uku mopoa bueak neak penan de coa uku temanem, ngen mungut aseya neak penan uku coa tembea biniak?

²⁷Amen awei'o, harusne ko ma'ik caciku'o neak bang, supayo pado waktau uku belek, uku dapet temimo igai caciku ngen bungaine.

²⁸Kerno'o, mokba caci kunei si, ngen kemleiba ngen temuan puluak caci mas'o.

²⁹ Kerno tun de sudo temuan, bakea melei lebiak dau igai, ngen si belebiak. Tapi tun saro didik gi ade ngen bakea nemok igai.

³⁰ Pelayan yo coa beguno! Sene'et si ngen nuang lem kelem neak luea. Neak di si bakea ngindoi ngen sengsaro!’ ”

³¹“Amen Anok Manusio teko utuk ijai Rajo, kute malaikat-Ne bakea mi'ing Si. Si bakea temot neak penan Si meriteak.

³²Kute bangso bakea kenopoa neak adep-Ne. Lajau si bakea cem'ei jijai duai kopoa awei gembala cem'ei domba kunei kambing.

³³Tun-tun de menea kelok Allah bakea kenopoa neak depeak kanen-Ne, de luyen neak depeak kideu-Ne.

³⁴Sudo'o Rajo'o bakea madeak ngen tobo'o neak depeak kanen-Ne, ‘Maro, udi de melei rahmat ngen Bak-Ku. Masukba neak lem Kerajaan de bi sendio bagiaknu, sejok dunio jenijai.

³⁵Sebab waktau Uku nyemen, udi melei kembuk, ngen Uku aus udi melei bioa. Uku suang tun asing, udi temimo Uku neak umeaknu.

³⁶Uku coa keracok, udi melei keracok, Uku bolon, udi murus Uku, waktau neak sel udi temulung Uku.’

³⁷Lajau tun-tun'o bakea madeak, ‘Tuhan, tengen keme perneak kemliak Tuhan nyemen lajau keme melei Tuhan kembuk atau aus lajau keme melei Tuhan menem.

³⁸Tengen keme kemliak Tuhan awei tun asing, ngen keme semambut Tuhan moi lem umeak keme? Tengen Tuhan coa ade keracok, keme melei Tuhan keracok?

³⁹Tengen keme perneak kemliak Tuhan bolon atau masuk sel, lajau keme temulung Tuhan?’

⁴⁰Rajo'o bakea jemawab, ‘Namenba: Waktau udi menea hal'o sekilaipun ngen pasuak-Ku de tehino, berartai udi menea utuk-Ku!’

⁴¹Lajau Rajo'o bakea madeak ngen tun-tun neak de peak kideu-Ne, ‘Lalauba kunei yo, jahanam! Masukba moi lem opoi de coa nam padem, de sudo sedio bagiak Iblis ngen malaikat-malaikatne.

⁴²Sebab waktau Uku nyemen, udi coa melei kembuk; waktau Uku aus, coa kulo udi melei bioa.

⁴³Uku suang tun asing, udi coa temimo Uku neak lem umeaknu. Uku coa keracok, udi coa melei Uku keracok. Uku bolon ngen neak sel, udi coa temulung Uku!’

⁴⁴Lajau tobo'o bakea madeak ngen-Si, ‘Tuhan, tengen keme kemliak Tuhan nyemen, aus ngen awei tun asing, atau coa ade keracok, bolon atau neak sel ngen keme coa temulung Tuhan?’

⁴⁵Rajo'o bakea jemawab, namenba: ‘Pado waktau udi coa lok temulung saleak suang tun de tehino yo, beartai udi coa lok temulung Uku.’

⁴⁶ Lajau tun-tun'o bakea nukum ngen ukuman de baka, tapi tun-tun de menea kelok Allah bakea idup de baka.”