Read Rejang MATIUS 26 Bible Online

MATIUS 26 - Rejang bible

MATIUS 26

¹Waktau Yesus selesei majea kute hal'o, Si madeak ngen penotoa-penotoa-Ne.

² “Udi namen duai bilai igai Bilai Rayo Paskah ngen Anok Manusia bakea tun semreak ngen musuak-musuak-Ne, ngen tobo'o bakea senalib Si!”

³Pado waktau'o pemipin imem-imem ngen pemipin-pemipin Yahudi bekopoa neak umeak lai Imem Lai Kayafas.

⁴Tobo'o basen utuk temakep Yesus ngen diem-diem, ngen munuak Si.

⁵“Tapi,” tobo'o madeak, “Jibeak pado waktau bilai rayo Paskah supayo jibeak timboa ribut neak antaro rakyat.”

⁶Waktau Yesus berade neak Betania, neak umeak Simon de bel'o temuan olon babok de kembiak saben ite kemliakne.

⁷ Tekoba suang selawei ngen Yesus. Si mbin do penan utuk minyak um kunei butau pualam. Minyok um'o la'ang gone. Waktau Yesus temot mukmei, selawei'o me'eng minyok um'o moi das ulau Yesus.

⁸Penotoa-penotoa Yesus kemliak'o ngen ijai mengiak. “Getai si me'eng-me'eng minyok um'o?” nadeak tobo'o.

⁹“Si dapet jemua minyok um'o ngen gone la'ang, cacine pacok nelei ngen tun miskin!”

¹⁰Yesus namen jano pekeran tobo'o, lajau Si madeak, “Bedanba udi semaro selaweiyo? Si bi menea de baik ngen tepujei utuk-Ku.

¹¹ Tun miskin selalu ade neak antaro udi, tapi Uku coa selamone besamo-samo udi.

¹²Si me'eng minyok um'o moi awok-Ku, ngen semiap utuk melayang-Ku.

¹³Pecayoba! Neak kute dunio, neak ipe bae Bito Baik kunei Allah semiar, jano de selawei'o menea bakea cenrito utuk kemnangne.”

¹⁴Lajau suang kunei keduai belas penotoa Yesus, de genne Yudas Iskariot lalau ngen pemipin imem-imem.

¹⁵ Si madeak ngen tobo'o, “Jano de bakea udi melei, amen uku semreak Yesus ngen si?” Tobo'o masen telau puluak caci pirok ngen ko.

¹⁶Sejak'o Yudas muloi mesoa waktau de baik utuk semreak Yesus.

¹⁷Pado bilai pertamo lem bilai rayo ruti coa agai, penotoa-penotoa Yesus teko ngen-Si. Tobo'o betanye, “Neak ipe Bak lok keme semiap kembuk Paskah utuk Bak?”

¹⁸Yesus jemawab, “Lalauba suang tun neak kota ngen madeak ngensi, ‘Nadeak gu'au, sudo sapei waktaune utuk-Ku; Uku ngen penotoa-penotoa lok menea Bilai Rayo Paskah neak umeak-Nu.’ ”

¹⁹Lajau penotoa-penotoa menea awei de neluak Yesus ngen tobo'o ngen lalau semiap kembuk Paskah.

²⁰Klemen'o, Yesus ngen keduai belas penotoane temot mukmei.

²¹Waktau tobo'o gidong mukmei, Yesus madeak, “Tiukba: suang kunei udi bakea hianati Uku.”

²²Temi'uk'o penotoa-penotoa Yesus, lajau tiep-tiep penotoa-Ne betanye ngen Yesus, “Sahe iso de Bak nadeak?”

²³ Yesus jemawab, “Tun de cemlup ruti moi lem makuk serpok-Ku, siba de bakea hianat Uku.

²⁴Anok Manusio bakea matei, awei de tetulis neak lem kiteb. Tapi celakoba tun de semreak Anok Manusio! Adeba lebiak baik utuk tun'o sekirone si coa nlaher.”

²⁵Yudas, de lok semreak Yesus'o jemawab, nadeak-Ne, “Iso uku, au gu'au?” Yesus jemawab, “Awei'oba nadeakne!”

²⁶Waktau tobo'o mukmei, Yesus mok ruti, lajau mucep du'o syukur. Sesudo'o Si megit ruti'o ngen tangen-Ne lajau melei ngen penotoa-penotoa-Ne samo madeak, “Mok ngen kembukba, dioba awok-Ku.”

²⁷Sesudo'o Si mok caker de ijai anggur ngen mucep syukur ngen Allah lajau meleine ngen tobo'o ngen madeak, “Menemba, udi kute.

²⁸ Sebab dioba daleak-Ku, de ijai tando janjai de sah kunei Allah de tenu peak bagiak dau tun utuk mapun duso tobo'o.

²⁹Pecayoba: Uku coa bakea menem anggur yo igai sapei pado waktau Uku menem anggur de belau berpok ngen udi neak Dunio Belau Bak-Ku.”

³⁰Sesudo'o tobo'o nyanyi de buaek legau syukur. Ngen tobo'o lalau moi Tebo Zaitun.

³¹ Lajau Yesus madeak ngen penotoa-penotoa-Ne, “Kelmenyo kulo, udi bakea mlilai teminggea Uku; sebab neak lem kiteb tetulis: Allah madeak, ‘Uku bakea munuak pengingon'o, ngen domba-domba de bekopoa bakea besirok.’

³² Tapi sesudo'o Uku bakit kunei matei, Uku bakea de mute udi moi Galilea.”

³³Petrus madeak ngen Yesus, “Kunyau kute de luyenne teminggea Bak, uku coa bakea perneak teminggea Bak!”

³⁴“Inget,” nadeak Yesus ngensi, “Kelmen yo kulo, ayok monok bekokok, udi bi telau kilei muker Uku.”

³⁵Petrus jemawab, “Sekilaipun uku harus matei bersamo Bak, uku coa bakea madeak bahwa uku coa kenal Bak!” Ngen kute penotoa de luyen madeak awaei'o kulo.

³⁶Sesudo'o Yesus serpok penotoa-penotoa-Ne lalau moi penan de genne Getsemani. Neak di Si madeak ngen tobo'o, “Temotba neak piyo sementaro Uku lalau bedu'o.”

³⁷Si mbin Petrus ngen keduai anok Zebedeus serto-Ne. Mako muloiba Si meraso ibo ngen liseak.

³⁸Lajau nadeak-Ne ngen penotoa-penotoa-Ne, “Atei-Ku kembiak ibo, awei lok matei asaine. Tinggeaba neak piyo, ngen bejago-jagoba ngen Uku.”

³⁹Mako Yesus lalau lebiak uak didik, lajau sujud ngen bedu'o, nadeak-Ne, “Au Bak-Ku, amen buliak ne'uakba kunei-Ku derita de mestai Uku temanggung. Jibeakba awei de Ku kemlok, tapi awei de Bak kemlok.”

⁴⁰Sesudo'o Yesus belek igai ngen ketelau penotoa-Ne ngen kemliak, tobo'o gidong tidua. Si madeak ngen Petrus, “Bejago-jago de jam bae ngen Uku, udi betelau coa sanggup?

⁴¹Bejago-jagoba, ngen beduoba ngen Allah, supayo udi coa bakea tegoda. Rohnu lok taat, tapi udi coa sanggup kerno sifet manusio'o lemah.”

⁴²Debat igai Yesus beduo, nadeak-Ne, “Au Bak-Ku derita yo mestai Uku temanggung, ngen coa dapet Uku me'uak, kunyauba kelok Bak jijai.”

⁴³Sesudo'o Yesus belek igai, Si kemliak penotoa-penotoa-Ne masiak tidua, kerno penotoa-penotoa-Ne kembiak setekuk.

⁴⁴Yesus debat igai teminggea tobo'o lalau bedu'o ngen utuk ketelau kilaine ngen mucep duo de serai.

⁴⁵Sesudo'o Si teko ngen penotoa-penotoa-Ne ngen madeak, “Jano udi masiak tidua ngen istirahat ba? Keliak saatne sudo teko! Uyo Anok Manusio bakea semreak moi tangen tun-tun beduso.

⁴⁶Klongonba, maroba ite lalau. Keliak! Tun de hianat Uku bi teko!”

⁴⁷Sementaro Yesus masiak miling, Yudas, suang kunei keduai belas murid-Ne'o teko. Serpok ngen si teko kulo dau tun de mbin pedang ngen gado. De meluak tobo'o adeba imem-imem kepalo ngen pemipin-pemipin Yahudiba de meluak tobo'o.

⁴⁸Yudas de bakea semreak Yesus bi melei namen tando yo ngen tobo'o, “Tun de bakea ku senium, do'oba Si. Takepba Si!”

⁴⁹Waktau sapei neak di Yudas lajau lalau ngen Yesus ngen madeak, “Salam gu'au!” Lajau si semiyum Yesus.

⁵⁰Yesus jemawab, “Pasuak, utuk jano pasuak teko moi miyo?” Sesudo'o tun dau'o maju, ngen temakep Yesus.

⁵¹Saleak suang penotoa-Ne de berade neak di ngen Yesus, cemabut pedangne ngen mabeak hamba Imem Lai sapei putus tiukne.

⁵²Yesus madeak ngen penotoa-Ne'o, “Seno'ongba pedangne, sebab kute tun de gemuno pedangne bakea matei oleh pedangne dewek.

⁵³Udi kemiro Uku coa dapet minoi tulung ngen Bak-Ku, ngen Si segro bakea kemirim lebiak kunei duai belas pasukan tentra malaikat?

⁵⁴Tapi amen awei'o, ipe mukin tejijai jano de sudo tetulis lem kiteb? Tapi kute de tetulis'o mestai terjijai.”

⁵⁵ Lajau Yesus madeak ngen tun dau'o, “Jano Uku yo penjahat, sapei udi teko ngen mbin pedang ngen gado utuk temakep Uku? Tiep bilai Uku ngajea neak Umeak Allah ngen udi coa temakep Uku!

⁵⁶Tapi kute yo tejijai supayo genepba jano de tetulis ngen nebai-nebai lem kiteb.” Lajau kute murid'o melilai teminggea Yesus.

⁵⁷Tun-tun de temakep Yesus mbin nemoi umeak imem lai Kayafas. Neak di gu'au-gu'au agamo ngen pemipin-pemipin Yahudi sudo bekopoa.

⁵⁸Petrus temotoa Yesus kuneiu'ak sapei moi latet umeak imem lai. Lajau Petrus moi lem latet'o, ngen temot besamo tentra-tentra. Si lok namen awei ipe sudone pekaro'o.

⁵⁹Imem-imem ngen pemipin pengadilan agamo mesoa bukti-bukti de coa benea utuk mukum matei Yesus.

⁶⁰Dau de teko ngen ngike tapi tobo'o coa temau do kulo bukti. Akhirne ade duai tun de teko moi muko.

⁶¹ Tobo'o madeak, “Tun yo madeak, ‘Uku dapet mubuak Bait Allah, ngen lem telau bilai dapet mbangunne igai.’ ”

⁶²Lajau imem lai'o tegok ngen madeak ngen Yesus, “Jano Ko coa melei jawab kunei tuduak-tuduak teadep Ko?”

⁶³Tapi Yesus diem bae. Lajau nadeak imem lai'o ngen Yesus, “Kerno Allah'o idup, nadeakba ngen keme, jano Ko Rajo Penyelamat, Anok Allah atau coa?”

⁶⁴ Yesus jemawab, “Awei'oba nadeaknu. Tapi pecayoba: muloi uyo ko bakea kemliak Anok Manusio temot neak depeak kanen Allah De Kembiak Kuaso, ngen teko neak das mbun-mbun neak lenget!”

⁶⁵ Mako imem lai'o cemaik keracok-Ne, ngen madeak, “Si mehino Allah! Utuk jano ite perlu saksei igai. Uyo bi ko temi'uk hino-Ne.

⁶⁶Awei ipe pedapet udi?” Tobo'o jemawab, “Si besaleak, ngen mestai nukum matei!”

⁶⁷ Lajau tobo'o temkek papea-Ne, ngen mokoa-Ne. Tun-tun luyen tempok Si.

⁶⁸Ngen madeak, “Cuboba kadeak ngen keme, hoi Rajo Penyelamat! Api de tempok Ko?”

⁶⁹Petrus temot neak luea neak latet. Mako tekoba su'ang pelayan selawei ngensi ngen nadeak, “Ko kulo serpok ngen Yesus tun Galilea'o?”

⁷⁰Tapi Petrus ngike neak adep kute tun. Peti, “Uku coa namen, jano nadeak-Nu,” Petrus jemawab,

⁷¹lajau si lalau utuk keluea moi latet. Su'ang pelayan selawei de luyen kemliak Petrus, ngen madeak ngen tun-tun ade neak di, “Tun yo kulo nano serpok ngen Yesus tun Nazaret'o.”

⁷²Lajau Petrus muker janjai igai ngen besupeak, “Uku betoa-betoa coa kenal tun'o!” madeak Petrus.

⁷³Coa an sesudo, tun-tun de je neak di teko ngen Petrus, ngen madeak, “Paset ko kulo saleak suang kunei tobo'o nyato kunei basonu.”

⁷⁴Lajau Petrus muloi semupeak, ngen madeak, “Uku coa namen tun'o!” Pado waktau'o bekokokba monok.

⁷⁵Petrus inget jano de sudo nadeak Yesus ngensi, “Ayok monok bekokok, ko bi muker Uku telau kilai.” Lajau Petrus lalau moi lua, ngen ngindoi ngen ibo.