Read Rejang MATIUS 27 Bible Online

MATIUS 27 - Rejang bible

MATIUS 27

¹Pueng-pueng nien, kute pemipin imem-imem ngen pemipin bangso Yahudi menea putusan utuk munuak Yesus.

²Tobo'o meket Si, lajau mbin-Ne ngen semreak-Ne ngen Gubernur Pilatus, walai negrai'o.

³ Pado waktau Yudas, de mianat'o, kemliak Yesus bi neus hukuman matei, si nyesal. Lajau si melek caci de telau puluak pirok'o ngen pemipin imem-imem ngen pemipin-pemipin Yahudi.

⁴Si madeak, “Uku bi beduso mianat tun de coa besaleak, sapei Si nukum matei!” Tapi tobo'o jemawab, “Jano dulai keme ngen udi? Do'o urusannu dewek!”

⁵Yudas meluk caci'o moi lem Umeak Semyang lajau lalau ngen gematung dirai.

⁶Pemipin imem-imem kemopoa caci'o ngen madeak, “Caci yo caci daleak (haram). Menurut Hukum Agamo, caci yo coa buliak nasuk moi lem penan ma'ik caci neak Umeak Semyang.”

⁷Sesudo basen, tobo'o makei caci'o utuk mukua taneak de senbut taneak tukang koon, taneak'o nakei utuk penan kubua tun asing.

⁸Do'oba sebabne taneak'o sapei bilai yo desenbut, “Taneak Daleak.”

⁹ Ngen'o, tejijaiba jano de nadeak oleh Nebai Yeremia, “Tobo'o temimo telau puluak caci pirok go de bi tentep ngen Israel utuk bayaran-Ne.

¹⁰Ngen cacio tobo'o pakei utuk temukua taneak tukang ko'on, awei de periteak Tuhan ngen uku.”

¹¹Waktau Yesus madep Pilatus, Gubernur negrai'o, Pilatus betanye, “Jano Ko Rajo tun Yahudi?” “Awei'oba nadeaknu,” Yesus jemawab.

¹²Tapi waktau pemipin imem-imem ngen pemipin-pemipin Yahudi temuduak Yesus menea saleak, Si coa jemawab samo sekilai.

¹³Kerno'o Pilatus ngen-Si, “Jano Ko coa temi'uk kute de tobo'o temuduak ngen Ko'o?”

¹⁴Tapi Yesus coa jemawab jano-jano sehinggo Gubernur'o kembiak heran nien.

¹⁵Pado setiep Bilai Rayo Paskah, gubernur biasone mlepas suang tun tahanan temurut piliak tun dau.

¹⁶Pado waktau'o ade suang tun tahanan de tekenal. Genne Yesus Barabas.

¹⁷Ijai, waktau dau tun sudo bekopoa, Pilatus betanye ngen tobo'o, “Api de udi lok uku mbebas utuk udi? Yesus Barabas atau Yesus desenbut Kristus?”

¹⁸Pilatus madeak awei'o sebab si namen bahwa pemipin-pemipin Yahudi semreak Yesus ngen si kerno tobo'o kidek atei.

¹⁹Ketiko Pilatus gidong madeak Yesus, ngenyanne kemirim pesen ngen si, “Jibeakba ko cemapua pekaro tun benea'o, sebab kerno Si uku kembiak tesikso lem mipai klemen nano.”

²⁰Tapi pemipin imem-imem ngen pemipin-pemipin Yahudi masut tun dau'o utuk minoi ngen Pilatus supayo Barabas nebebas ngen Yesus de nukum matei.

²¹Lajau Gubernur'o betanye igai ngen tobo'o, “Kunei keduai tun'o, api de udi lok uku mbebas utuk udi?” “Barabas,” tobo'o jemawab.

²²“Amen awei'o uku harus menea jano ngen Yesus de senbut Kristus?” tanye Pilatus ngen tobo'o. Tobo'o kute jemawab, “Senalib Si!”

²³“Tapi jano de jahat de menea?” tanye Pilatus. Lajau tobo'o mekik lebiak lek igai, “Senalib Si!”

²⁴ Akhirne Pilatus semadar amen si coa nam menea jano-jano igai, ngen tun-tun'o mukin bakea kemacau. Si mok bioa lajau mpuk tangenne. “Uku coa tanggung jawab das matei-Ne tun yo! Do'o urusan udi dewek!”

²⁵Kute tun dau'o jemawab, “Au, kunyauba keme ngen anok-anok keme temanggung hukuman das matei-Ne tun'o!”

²⁶Lajau Pilatus mlepas Barabas utuk tobo'o, ngen mluak tun cemambuk Yesus. Lajau Pilatus semreak Si utuk senalib.

²⁷Sudo'o prajurit-prajurit Pilatus mbin Yesus masuk moi umeak Gubernur ngen kute pasukan tentra bekopoa neak kliling Yesus.

²⁸Tobo'o mukok keracok Yesus, ngen masang ngen-Si jubah ungu.

²⁹Tobo'o nganem de buaek tudung rajo kunei tebok ngen meletokne neak das ulau Yesus, lajau tobo'o mlei Si de pun tokot neak tangen kanen-Ne, sesudo'o tobo'o sujud neak adep-Ne ngen cemimet Si, “Salam hoi Rajo tun Yahudi!” Nadeak tobo'o.

³⁰Tobo'o temkek Si ngen mok tokot'o, lajau mokoa Si neak ulau-Ne.

³¹Sesudo mliyam Si, tobo'o muko jubah ungu'o lajau masang igai keracok-Ne dewek, sesudo'o Si nembin moi luea utuk senalib.

³²Neak tengeak dalen, tobo'o temau ngen suang tun kunei Kirene genne adeba Simon. Tobo'o makso tun'o musung salib Yesus.

³³Sudo'o tobo'o sapeiba neak do penan de genne Golgota, taine “Penan Tengkorak”.

³⁴ Lajau tobo'o melei Yesus menem anggur becapua pegau. Tapi sudo'o Yesus kemcep anggur'o, Si coa lok menemne.

³⁵ Sudo'o tobo'o senalib Si ngen magiak-magiak keracok-Ne ngen ca'o suten.

³⁶Lajau tobo'o temot jemagai Si neak di.

³⁷Neak das ulau-Ne tobo'o masang tando getai Si nukum de isaine, “Dioba Yesus Rajo tun Yahudi”.

³⁸Berpok ngen Si tobo'o senalib kulo duai tun prapok; suang neak depak kanen, suang igai neak de peak kideu-Ne.

³⁹ Tun-tun de liwet neak di gemeleng ulau ngen mino Yesus.

⁴⁰ Tobo'o madeak, “Ko de lok mubuak Umeak Semyang ngen mbangunne lem telau bilai! Amen Ko Anok Allah, tuunba kunei salib'o, ngen semlamat dirai-Nu!”

⁴¹Awei'o kulo pemipin imem-imem ngen gu'au-gu'au agamo ngen pemipin-pemipin cemimet Yesus. Tobo'o madeak,

⁴²“Si semlamat tun luyen, padohal Si coa dapet semlamat dirai-Ne dewek! Amen Si rajo Israel, baikba Si uyo tuun kunei salib'o, mako kemelok pecayo ngen-Si.

⁴³ Si pecayo ngen Allah, ngen madeak bahwa Si Anok Allah. Nah, maro ite kemliak janokah Allah lok semlamat Si uyo.”

⁴⁴Prapok-prapok de senalib ngen Si'o, kulo mino Si kulo awei'o.

⁴⁵Pado tengeak bilai, selamo telau jam, kute negerai'o jijai gelep.

⁴⁶ Jam telau pelbeak, Yesus menggang ngen suaro lek, “Eli, Eli, lama sabakhtani?” de beartai, “Au Allah-Ku, au Allah-Ku, getai Ko teminggea Uku?”

⁴⁷Temi'uk o kekedau tun madeak, “Si menok Elia!”

⁴⁸ Ngen segero tekoba su'ang tun kunei tobo'o, si gegulut lalau mok bungai karang, cemlupne moi lem anggur pi'iak. Lajau cemcuk pado ujung de pun kieu ngen mulua moi bibia Yesus.

⁴⁹Tapi tun-tun luyen madeak, “Mbot, maro ite kemliak janoka Elia teko semlamat Si!”

⁵⁰Sudo'o Yesus menggang igai ngen suaro nya'ing, lajau Si matei.

⁵¹ Tabir de tegatung lem Umeak Semyang pegit duai kunei das sapei moi beak ngen tejijaiba gepo, ngen tebo-tebo butau pegit.

⁵²Kubua-kubua tukok, ngen dau umat de bi ninggea idup igai.

⁵³Tobo'o keluea kunei kubua-kubua sesudo Yesus idup igai kunei mateine, ngen tobo'o masuk moi Yerusalem. Neak di dau tun kemliak tobo'o.

⁵⁴Pemipin tentra serpok ngen tentra-tentrane de gidong jemagai Yesus jijai saben nien waktau kemliak gepo, ngen kute de tejijai'o. Tobo'o madeak, “Sungguak Si yo Anok Allah!”

⁵⁵ Neak di ade kulo dau selawei de gidong kemliak kunei uak. Tobo'oba de bi temotoa Yesus utuk temulung Si sejok kunei Galilea.

⁵⁶Neak antarone adeba Mariam Magdalena, Mariam mak Yakobus ngen Yusuf, ngen mak anok-anok Zebedeus.

⁵⁷Malem'o tekoba su'ang tun kayo kunei Arimatea, genne Yusuf. Si kulo penotoa Yesus.

⁵⁸Si lalau ngen Pilatus, ngen minoi mayit Yesus. Lajau Pilatus meriteak supayo mayit Yesus senreak ngen si.

⁵⁹Mako Yusuf mok mayit'o, ngen mukusne ngen kain kafan de blau.

⁶⁰Lajau si meletok mayit Yesus neak lem kubuane dewek, de menea neak lem tebo butau, ngen sesudo gemuling debueak butau lai moi utuk temutup bang kubua'o, lajau lalau.

⁶¹Mariam Magdalena ngen Mariam de luyen tinggea temot neak di madep kubua'o.

⁶²Bilai menne, pado bilai Sabat tun Yahudi, pemipin imem-imem ngen tun-tun Farisi lalau serpok madep Pilatus.

⁶³ Ngen madeak, “Tuan, keme tinget waktau tukang nike'o masiak idup, Si pernea madeak, ‘Sesudo telau bilai Uku bakea idup igai.’

⁶⁴Kerno'o, melueakba tun njago kubua'o baik-baik sapei bilai de ke telau, supayo penotoa-penotoa-Ne coa dapet maling mayit-Ne lajau madeak ngen tun-tun bahwo Si bi nidup igai kunei matei-Ne. Ngen nike de kedong yo bakea lebiak kidek kunei de pertamo.”

⁶⁵“Udi temuan tentra penjago,” nadeak Pilatus ngen tobo'o, “lalauba jago kubuak'o de baik-baikne.”

⁶⁶Lajau tobo'o lalau moi kubua, semegel butau penutupne ngen teminggea penjago-penjago neak mukone, kunyau coa gen de ngurek kubua'o.