Read Rejang MATIUS 4 Bible Online

MATIUS 4 - Rejang bible

MATIUS 4

¹ Roh sucai kunei Allah mbin Yesus moi padang pasir utuk cenubo Iblis.

²Sesudo puaso pat puluak bilai pat puluak malem. Yesus meraso nyemen.

³Iblis teko ngen madeak ngen Yesus, “Amen Ko Anok Allah, keluakba butau-butau yo jijai ruti.”

⁴ Tapi Yesus jemawab, “Neak lem Kiteb Ade tetulis awei yo: Manusio coa idup kunei ruti bae, tapi kulo Firman de nucep Allah.”

⁵Sesudo'o Iblis mbin Yesus moi kota Yerusalem, Kota Sucai. Iblis mbin Yesus neak bubung umeak Bait Allah.

⁶ Lajau Iblis madeak ngen Yesus, “Amen Ko Anok Allah? Tejunba moi mimbeak, kerno neak lem Kiteb Ade tetulis awei yo, ‘Allah bakea meriteak malaikat-malaikat-Ne utuk semido Ko, ngen megong tangen-Nu kunyau kekea-Nu coa tatuk butau.’ ”

⁷ Yesus jemawab, “Tapi lem Kiteb Ade tetulis: ‘Jibeak ko cemubo Tuhan Allahnu.’ ”

⁸Sesudo'o Iblis mbin Yesus moi das tebo de lekat sekilai, Iblis kemten ngen Yesus kute negrai neak dunio serto kekayaanne.

⁹“Kutene yo bakea uku semreak ngen-Ko, amen Ko sembeak uku, nadeak Iblis ngen Yesus.”

¹⁰ Lajau Yesus jemawab, “Lalauba ko, Iblis! Kerno neak lem Kiteb Ade tetulis awei yo: Sembeakba Tuhan Allah ngen layanba Si bae!”

¹¹Akhirne Iblis teminggea Yesus, ngen malaikat-malaikat teko mlayan Si.

¹² Waktau Yesus temi'uk bahwo Yohanes nasuk moi lem sel, nyikirba Si moi daerah Galilea.

¹³ Li lalau kunei kota Nazaret, lajau tinggea neak kota Kapernaun neak biding Daneu Galilea daerah Zebulon ngen Naftali.

¹⁴Kerno Yesus menea awei'o jijaiba jano de nadeak Nebai Yesaya.

¹⁵ “Daerah sukau Zebulon ngen daerah sukau Naftali, neak dalen moi daneu sebe'ang Bioa Yordan, Galilea, daerah iso tun Yahudi.

¹⁶Bangso de idup neak lem kegelapan, bi kemliak te'ang de kemliak te'ang! Bagi tobo'o de diem neak negrai tun-tun matei de kegelapan, be besinea cahayo te'ang!”

¹⁷ Muloi waktau'o Yesus semapei pesen yo, “Be tobatba kunei duso-dusonu, kerno Allah bakea segro meriteak jijai Rajo!”

¹⁸Tiko Yesus dong melitas Daneu Galilea, Si kemliak ade duai penjalai kan, Simon (de senbut Petrus), ngen pasuakne Andreas. Tobo'o dong mambua jalai neak daneu.

¹⁹Yesus madeak ngen tobo'o, “Maro milau ngen Uku, udi Uku majea jijai penjalai manusio.”

²⁰Tobo'o segro teminggea jalaine, lajau temotoa Yesus.

²¹Sesudo Yesus lalau kunei di, Si kemliak duai pasuak de luyen, adeba Yakobus ngen Yohanes anok-anok Zebedeus. Tobo'o besamo-samo ngen bakne Zebedeus dong menea jalai neak lem biduk. Yesus menok tobo'o kulo,

²²tobo'o lajau teminggea biduk ngen bakne, lajau temotoa Yesus.

²³ Yesus lalau moi kute penan neak daerah Galilea. Si ngajea tun dau tetang Allah de bakea mriteak ngen-Si kulo kemaen tun-tun kunei olonne ngen cacet.

²⁴Tun-tun dau muloi temi'uk tetang Yesus. Neak kute negrai Syria. Tobo'o nembin tun-tun de derito kute mecem olon, Yesus kemaen kute tun de pasuk semat, gilo bukei ngen de pakuak.

²⁵Dau tun temotoa Yesus. Tobo'o teko kunei Galilea, kunei puluak kota, kunei Dekapolis, Yerusalem, Yudea ade kulo kunei daerah sebe'ang Bioa Yordan.