Read Rejang MATIUS 5 Bible Online

MATIUS 5 - Rejang bible

MATIUS 5

¹Tiko Yesus kemliak tun dau'o, Si kenek neak das tebo, sesudo Yesus temot, penotoa-Ne teko ngen-Si.

²Yesus muloi ngajea tobo'o:

³“Allah melei rahmat ngen tun de coa bedayo ngen de begatung ngen Tuhan bae; tobo'o adeba anggota umat Allah!

⁴ Allah melei rahmat ngen tun de beduko Allah bakea mibur tobo'o!

⁵ Allah melei rahmat ngen tun de tembeak ateine; Allah bakea tempat janjaine ngen tobo'o!

⁶ Allah melei rahmat tun de taat ngen Si; Allah bakea jemawab jano de tobo'o!

⁷Allah melei rahmat ngen tun kemlok de semayang tun luyen. Allah bakea semayang tobo'o kulo.

⁸ Allah melei rahmat ngen tun de sucai ateine; tobo'o bakea kemliak Allah.

⁹Allah melei rahmat ngen tun de mbin damai neak antaro manusio; Allah bakea makau tobo'o adeba anok-anok-Ne!

¹⁰ Allah melei rahmat ngen tun de senikso kerno kemerjo priteak Allah; tobo'o adeba anggota umat Allah!

¹¹ Allah melei rahmat ngen udi amen tun luyen madeak ko jahat, senikso ngen de pitneak kerno Uku.

¹² Ko harus benea-benea riang, kerno upeaknu lai neak surgo. Nebai-nebai de idup ayok udi kulo bi senikso.”

¹³ “Udi adeba silai dunio. Amen silai'o ijai ambea, nam coa udi nesienne igai? Coa de ade gunone igai. Seluyen nuang ngen nelat tun.

¹⁴ Udi adeba te'ang dunio. Kota neak das tebo coa nggea coa keten.

¹⁵ Coa gen tun midup lapu, sudo'o munyinne neak beak talam, tapi neak das kekea lapu sehinggo melei te'ang kute tun neak dasei'o.

¹⁶ Awei'o kulo seharusne te'angnu becayo neak muko tun, supayo tun'o kemliak plepnu de baik ngen mujai Allah de adeba Baknu neak surgo.”

¹⁷“Jibeakba ko mengiro Uku teko utuk mapus ukum Musa ngen ajaran para nebai. Uku teko iso utuk mapusne tapi utuk temunjuk tai de sebeneane.

¹⁸ Ingetba! Selamo lenget ngen bumai gi ade, do hurup atau titik de kembiak titik neak lem ukum Musa mestai tejijai!

¹⁹Kerno'o api de melanggea saleak do periteak-periteak'o sekilai kulo de kembiak titik ngen majea tun luyen utuk menea awei'o, si bakea jijai de kembiak titik neak antaro umat Allah. Tapi api de kemerjo priteak-priteak'o ngen majea tun luyen awei'o kulo, si bakea jijai lai neak antaro umat Allah.

²⁰Jijai ingetba: Amen udi coa kemerjo periteak Allah lebiak kunei gu'au-gu'au agamo ngen tun-tun Farisi, udi coa bakea jijai umat Allah!”

²¹ “Udi bi temi'uk, ninik puyang ite temuan ajaran de awei yo: Jibeak munuak; api de munuak harus senidang.

²²Tapi Uku madeak ngen udi, tiep tun de mengiak ngen tun luyen, bakea senidang; api de mino tun luyen bakea de senidang neak pengadilan agamo Yahudi. Api de madeak, ‘Coa blu'at ngen kidek plepne,’ patut nuang moi opoi nerako.

²³Oleh kerno'o amen saleak su'ang kunei antaro udi gi dong melei kurban ngen Allah ngen lajau tinget ade tun de gis atei teadepne,

²⁴kelokne si teminggea kileak kurbanne neak muko penan kurban neak umeak semyang tun Yahudi, lajau lalau bedamoi ngen tun'o. Sesudo'o dapetba si belek igai melei kurbanne ngen Allah.

²⁵Amen ade tun madau udi moi pengadilan, beda moi ngen si selamo gi ade waktau, ayok sapei moi pengadilan. Amen coa tun'o bakea semreak udi ngen hakim, de bakea semreak udi ngen plisi. Lajau plisi bakea mbin masuk udi moi lem sel.

²⁶Ngen ingetba: Ko coa bakea keluea kunei sel'o, ayok ko mbayar dendonu sapei lunas.”

²⁷ “Udi bi temi'uk ajaran awei'o: Jibeak menea zina.

²⁸Tapi uyo uku madeak ngen udi: api bae kemliak selawei ngen nafsu, tun'o bi menea zina ngen selawei'o lem ateine.

²⁹ Amen matai kanennu sembeb ko beduso cenukeaba ngen nuangba! Lebiak baik saleak do anggota awoknu nyep kunei kute awoknu nuang moi lem nerako.

³⁰ Amen tangen kanennu penyebab ko menea duso, tentok ngen muangba tangen'o! Lebiak baik nyep depeak tangennu kunei kute awoknu masuk lem nerako.”

³¹ “Ade ajaran awei'o kulo: Tiep tun de sema'ok ngenyane harus melei su'et sa'ok ngen si.

³² Tapi uyo Uku madeak ngen udi: Tiep tun de sema'ok ngenyanne, padahal selawei'o coa nyeleweng, tun'o sembeb ngenyanne zinah; amen ngenyanne nikeak igai. Tun de mikeak ngen selawei de sena'ok si menea zinah.”

³³ “Udi namen bahwo pado ninik puyang ite temuan ajaran de awei yo: Jibeak muker janjai. Jano de bi ko jemanjai ngen supeak neak adep Allah, harus ko meneane.

³⁴ Tapi uyo Uku madeak ngen udi: Jibeak perneak besupeak, baik kerno lenget jano bumai de adeba penan Allah.

³⁵ Sebab lenget adeba penan Allah temot mriteak dunio yo ngen bumai adeba penan Allah mpek kekeane. Ngen jibeak besupeak kerno Yerusalem, sebab Yerusalem adeba kota Allah, Rajo kunei kute Rajo.

³⁶Jibeak kulo udi besupeak demi ulaunu, kerno udi coa nam mubeak lambea buk, jijai meleu jano putiak.

³⁷Nadeak bae ‘Au’ jano ‘Coa’ — lebiak kunei'o asalne kunei Iblis.”

³⁸ “Udi ade ajaran awei'o: matai gitei matai, epen gitei epen.

³⁹Tapi uyo Uku madeak ngen udi: jibeak bales dendam teadep tun de menea de kidek ngen udi, api bae de tempok papea kanen nu, kunyauba si tempok kulo papea kideu nu.

⁴⁰Ngen tun de lok madau udi ngen hakim kerno si lok bajau nu, senreakba jubahnu.

⁴¹Amen su'ang penguaso makso udi musung barangne keuak de kilo meter, musungba keuak duai kilo meter.

⁴²Amen tun minoi kunei udi, neleiba ngen si. Jibeak temulok tun de lok minjem kunei udi.”

⁴³ “Udi kulo namen ade ajaran awei yo: kemasiakba kekuatnu, jengikba musuaknu.

⁴⁴Tapi uyo Uku madeak ngen udi; kemasiakba musuaknu ngen bedu'oba utuk tobo'o de senikso udi,

⁴⁵supayo udi jijai anok-anok Baknu neak surgo. Sebab Allah sinea matai bilai utuk tun de jahat ngen tun baik, Allah kulo temu'un ujen utuk de benea ngen tun de jahat kulo.

⁴⁶Sebab amen udi bae, utuk jano Allah harus males jano de udi kulo menea? Padahal tukang tagiak pajak menea awei yo kulo.

⁴⁷Amen udi cuma melei salam ngen kekuatnu bae, jano bedane udi ngen si? Tun de coa pecayo Allah menea hal awei'o!

⁴⁸ Kerno'o harusba udi sempurno serai ngen Allahnu de ade neak surgo.”