Read Rejang MATIUS 6 Bible Online

MATIUS 6 - Rejang bible

MATIUS 6

¹“Ingetba jibeak udi menea periteak agamo neak adep dau tun utuk keneliak tun. Udi coa bakea dapet upeak (amal) kunei Baknu neak surgo, amen udi menea awei'o.

²Amen udi melei sedekeak ngen tun peset, jibeak melei namen tun dau tetang hal'o awei de tun munafik. Tobo'o menea neak umeak semyang ngen dalen lai utuk nujai tun. Ingetba tobo'o dapet upeakne.

³Tapi amen udi melei sedekeak, keleiba seca'o diem-diem, jibeak sapei tun namen.

⁴Kunyauba tun luyen coa namen pelep nu'o, seluyen Baknu neak surgo'o Si kemliak plepnu de coa keten, ngen Si bakea melei upeak ngen ko.”

⁵ “Amen udi bedu'o, jibeakba bedu'o awei tun munafik, tobo'o galok bedu'o je neak lem umeak semyang ngen sipang-sipang dalen lai, kunyau tun namen, ingetba do'o upeak de bi temimo.

⁶Tapi amen udi bedu'o, moiba lem biliknu, katubba bang ngen bedu'oba ngen Baknu de coa keten'o. Baknu de kemliak plepnu coa keten bakea melei upeak ngennu.

⁷Amen udi bedu'o jibeakba miling ngen awei tun-tun de coa kenal Tuhan. Tobo'o sako, amen du'one panjang mako jano de tobo'o minoi bakea teni'uk.

⁸Jibeakba udi awei tobo'o. Baknu bi namen jano de udi perlu, ayok udi minoine.

⁹Kerno'o bedu'oba awei yo: ‘Bak keme neak surgo: coa ade Allah seluyen ko. Kirone Ko senbeak ngen nehormat.

¹⁰Ko ba Rajo keme. Kirone Ko mriteak neak bumai ngen neak Surgo.

¹¹Keleiba bilai yo kembuk segenepne de keme perlu.

¹²Napunba keme kunei saleak keme, awei keme kulo sudo melei apun ngen tun de besaleak ngen keme.

¹³Jibeak muyau keme coa pecayo waktau keme cenuba. tapi ne'uakba keme kunei kuaso Iblis. [Koba Rajo de kuaso ngen mulio utuk selamone. Amin.]’

¹⁴ Amen udi mapun tun besaleak ngen ko, Baknu neak surgo bakea mapun udi kulo.

¹⁵Tapi amen udi coa melei apun ngen tun luyen, Baknu kulo coa bakea mapun saleaknu.”

¹⁶“Amen udi puaso, jibeakba papeanu murung awei tun munafik. Tobo'o sengajo kemten papea murung kunyau tun kemliak amen tobo'o dong puaso. Do'oba upeak de tobo'o bi temimo.

¹⁷Tapi amen udi puaso, nepukba papeanu ngen senikekba buknu,

¹⁸kunyau coa kemliak tun amen ko dong puaso, meluyen Baknu de coa keten'o bae. Si kemliak plepnu de coa keten ngen bakea melei upeak ngen ko.”

¹⁹ “Jibeakba udi melungguk harto utuk dirainu neak bumai; olok menget musakne ngen tukang maling teko utuk malingne.

²⁰Tapi melunggukba hartonu neak surgo; neak di olok menget coa nam musakne ngen tukang maling coa nam malingne.

²¹Kerno neak ipe hartonu ade, neak di kulo ateinu!”

²²“Matai adeba lapu de tem'ang awok. Amen matainu te'ang kute awoknu te'ang becayo.

²³Tap amen matainu pudea, kute awoknu kembiak gelep. Amen lapu neak lem awoknu gelep, padeak kembiak gelepne do'o!”

²⁴“Coa ade do tun dapet kerjo ngen duai tuan. Sebab si lebiak mengasiak de do kunei de luyen atau si lebiak setia ngen tuan de do kunei pado de luyen. Awei yo kulo ngen udi. Udi coa dapet kerjo utuk Allah ngen harto.

²⁵Kerno'o ingetba; jibeakba renyeng tetang idupne, jano de lok udi mbuk ngen menem atau jano de lok udi makei. Iso ka idup lebiak kunei kembuk ngen awok lebiak kunei keracok au coa?

²⁶Denongba burung-burung neak lenget, de coa tembea ngen manen, coa melungguk asea panen neak lem tuoa. Tapi Baknu jemago tobo'o! Udi lebiak bodong kunei burung-burung'o, au coa?

²⁷Api neak antaro udi de kerno kerenyengne dapet manjang omorne kunyau didik?

²⁸Getai udi renyeng tetang keracoknu? Kenliakba bungai bungai de baes idup liea neak kebun imbo. Bungai-bungai'o coa kerjo ngen coa menea keracokne dewek.

²⁹ Tapi Rajo Salomo de kembiak kayo, coa makeai keracok seba'es bungai-bungai'o!

³⁰Dukut neak imbo temuak tapi men nemben abis, tapi Allah merias dukut'o kembiak baes. Jano igai udi! Tapi udi coa pecayo!

³¹Kerno'o jibeakba udi renyeng, ngen madeak, ‘Jano de bakea ite mbuk’ atau ‘menem’, atau ‘jano de bakea ite makei’?

³²Hal-hal'oba de mesoa tun-tun de kemnal Allah. Tapi Baknu de neak Surgo namen, amen udi perlu kutene'o.

³³Tapi kesoaba kileak supayo Kerajaan Allah mriteak das idupnu ngen meneaba kelokne. Mako Allah bakea melei hal-hal de luyenne ngen ko.

³⁴Kerno'o jibeakba renyeng tetang bilai men, sebab bilai men ade.”