Read Rejang MATIUS 9 Bible Online

MATIUS 9 - Rejang bible

MATIUS 9

¹Yesus kenek neak lem biduk lajau nyeb'ang daneu, belek moi sadei-Ne.

²Neak di tun mbin ngen-Si suang tun pakuak de teguling neak tikea. Waktau Yesus kemliak lai imen tobo'o, Si madeak ngen tun de pakuak'o, “Tabahba anok-Ku! Duso-dusonu bi napun.”

³Kekedau gu'au agamo neak di madeak lem atei, “Tun yo mino Allah!”

⁴Tapi Yesus namen pekeran tobo'o, lajau madeak, “Getai pekerannu jahat?

⁵Ipe de lebiak mudeak: madeak, ‘Duso-dusonu bi napun’, atau madeak, ‘Klongonba ngen paneuba’?

⁶Tapi uyo Uku bakea melei tando ngen ko bahwo neak bumai yo Anok Manusia temuan kuaso utuk mapun duso.” Lajau Yesus madeak ngen tun lupuak'o, “Klongonba, naket tikeanu ngen belekba!”

⁷Tun pakuak'o klongon ngen belek moi daseine.

⁸Waktau tun-tun kemliak hal'o, tobo'o saben lajau mujai Allah, sebab Allah bi melei kuaso kembiak lai ngen manusio.

⁹Sesudo Yesus teminggea penan'o. Waktau paneu, Si kemliak suang tun penagiak pajak de genne Matius, gidong temot neak kantor pajakne. Yesus madeak ngen si, “Maro totoa Uku!” Lajau Matius je ngen temotoa Yesus.

¹⁰ Waktau Yesus dong mukmei neak umeak Matius, tekoba kekedau tun penagiak pajak ngen tun-tun de nanggep coa baik neak masyarakat, milem mukmei besamo Yesus ngen penotoa-penotoa-Ne.

¹¹Ade tun-tun Farisi kemliak hal'o tobo'o madeak ngen penotoa-penotoa Yesus, “Getai gu'aunu mukmei sepok penagiak pajak ngen tun-tun coa baik?”

¹²Yesus temi'uk jano de tobo'o temanye ngen jemawab, “Tun sehat coa perlu dokter tapi tun bolon bae.

¹³ Senlidikba jano tai ayat lem Kiteb Ade senbut: ‘Uku kemlok atei de baik, ngen coa kurban binatang’. Sebab Uku teko coa utuk menok tun de bi baik meluyen tun de nanggep hino.”

¹⁴Sudo'o penotoa-penotoa Yohanes Pembaptis teko ngen Yesus. Lajau tobo'o betanye, “Getai keme ngen tun-tun Farisi puaso, tapi penotoa Bak coa?”

¹⁵Yesus jemawab, “Kero pendapet udi? Nam coa! Tamu-tamu neak pesta nikeak besedi atei amen pengaten semanei besamo tobo'o? Sahe coa! Tapi bakea teko waktaune penganten semanei nemok kunei tobo'o. Waktau'oba tobo'o puaso.

¹⁶Coa ade tun menet bajau de bian ngen de lambea kainde gi blau. Sebab kain penapit'o bakea semgit bajau'o sehinggo segitne tambea lai.

¹⁷Awei'o kulo coa ade tun de temuang anggur blau moi lem katung babok de an. Sebab katung bakea pecuak ngen usak sehinggo anggurne tupeak. Anggur blau harus ne'eng moi lem katung de blau kulo. Supayo keduai-duaine tep baik.”

¹⁸Sementaro Yesus madeak ngen penotoa-penotoa Yohanes Pembaptis, tekoba dikup tun ketuai Umeak Semyang tun Yahudi. Si sujud neak adep Yesus ngen madeak, “Anok selaweiku pei ninggea. Tapi minoi tulung nien, Ko teko igai utuk megongne supayo si idup.”

¹⁹Yesus kelongon temotoa tun'o sesamo ngen penotoa-penotoa-Ne.

²⁰Neak tengeak dalen suang selawei bi duai belas taun ke'anne bolon teko ma'ok Yesus kunei belakang. Si meker, “Amen uku megong jubah-Ne, uku bakea ka'en.” Lajau si megong ujung jubah Yesus.

²¹Kerno nadeakne neak lem atei, “Negong kubae jubah-Ne, uku bakea ka'en.”

²²Tiko'o Yesus jemling ngen dem'nong selawei'o lajau madeak ngen si, “Tabahba anok-Ku! Kerno udi percayo ngen-Ku, udi ka'en!” Pado waktau'o kulo selawei'o ka'en.

²³Sesudo'o Yesus sapei neak umeak pemipin Umeak Semyang. Tiko Yesus keliak pemain-pemain musik utuk tun ninggea ngen dau tun gu'ok.

²⁴Si madeak ngen tobo'o, “Kelueaba udi kutene! Anok yo coa matei, tapi tidua.” Tobo'o kute temawai Yesus.

²⁵Sudo tun dau'o keluea, Yesus masuk moi lem bilik anok'o ngen megong tangenne. Lajau klongonba anok selawei'o.

²⁶Mako senbeaba kabar tetang hal'o sapei kute daerah.

²⁷Yesus lalau kunei di ngen neak tengeak dalen duai tun buto temotoa-Ne. Tobo'o menggang, “Anok Daud, semlenba keme!”

²⁸Tiko Yesus masuk moi lem umeak, ke duai tun buto'o teko ngen-Si. Yesus betanye ngen tobo'o, “Jano udi pecayo amen Uku nam kema'en udi?” “Pecayo, Bak!” tobo'o jemawab.

²⁹Lajau Yesus megong matai tobo'o samo madeak, “Kerno udi pecayo, jijai jano de udi kemlok.”

³⁰Mako tobo'o nam ngeliak. Yesus minget ngen tobo'o ngen teges supayo jibeak madeak hal'o ngen api bae.

³¹Tapi tobo'o lalau ngen semiar berita tetang Yesus, moi kute daerah'o.

³²Waktau keduai tun keluea, suang bisau de nasuk Iblis mbin ngen Yesus.

³³Yesus musir roh jahat'o ngen waktau'o kulo tun bisau nam miling igai. Tun dau heran ngen madeak, “Ati perneak keme kemliak hal de awei'o neak Israel.”

³⁴ Tapi tun-tun Farisi madeak, “Pemipin roh-roh jahatba de melei Si kuaso utuk musir roh jahat'o.”

³⁵ Yesus kliling kunei do kota moi kota de luyen kunei do sadei moi sadei de luyen. Si ngajea lem umeak-umeak semyang, ngen semiar Bito Baik tetang awei ipe Allah mriteak awei Rajo. Si kema'en tun-tun de saro ngen kute olon ngen cacet.

³⁶ Waktau Yesus kemliak tun dau'o, Si selen ngen tobo'o, renyeng ngen coa bedayo, awei domba coa gen pengangon.

³⁷ Lajau Yesus madeak ngen penotoa-penotoa-Ne, “Panenne dau tapi tukang panenne didik.

³⁸Kerno'o minoiba ngen tun temuan kebun, supayo nembo tukang panen utuk manenne.”