Read Rejang MARKUS 1 Bible Online

MARKUS 1 - Rejang bible

MARKUS 1

¹Dioba Bito Baik tetang Yesus Kristus, Anok Allah.

² Awei ade tetulis lem Kiteb Nebai Yesaya: “Keliakba, ‘Uku meluak utusan-Ku demute Ko, si bakea semiap dalen bagiak-Nu.’

³ Ade sa'ei tun de menggang neak benei libea, ‘Semiapba dalen utuk Tuhan, nelu'usba dalen utuk-Ne.’ ”

⁴Awei yo ba Yohanes Pembaptis teko neak benei libea ngen madeak, “Betobatba ngen neleiba dirainu dibaptis ngen Allah bakea mapun dusonu.”

⁵Lajau tekoba mageane tun-tun kunei kute daerah Yudea ngen kute penduduk Yerusalem, ngen samo makau dusone tobo'o baptis neak Bioa Yordan.

⁶ Yohanes makei jubah bulau unto ngen peket pinggang babok, ngen kembukne belalang ngen medau imbo.

⁷Si melei namen awei yo, “Sesudo uku bakea teko Si de lebiak bekuaso kunei padoku. Utuk nunduk mukok tilai sepatu-Ne kulo, uku coa patas.

⁸Uku baptis ko ngen bioa, tapi Si bakea baptis ko ngen Roh Sucai.”

⁹Pado waktau'o tekoba Yesus kunei Nazaret neak taneak Galilea, ngen Si dibaptis neak Bioa Yordan ngen Yohanes.

¹⁰Waktau Si keluea kunei bioa, Si kemliak lenget tukok ngen Roh Sucai awei burung daro tu'un moi das-Ne.

¹¹ Lajau teni'ukba sa'ei kunei surgo, “Ko ba Anok-Ku de Uku kemasiak, ngen Ko ba semnang atei-Ku.”

¹²Segro sesudo'o Roh Sucai mipin Si moi benei libea

¹³Neak benei libea'o selamo pat puluak bilai Si tinggea ngen cenubo Iblis. Si tinggea besamo ngen benatang-benatang liea ngen malaikat-malaikat melayan Si.

¹⁴Sesudo Yohanes tenakep tekoba Yesus moi Galilea semiar Bito Baik kunei Allah.

¹⁵ Nadeak-Ne, “Waktaune bi genep; Allah segro meriteak sebagai Rajo. Betobatba ngen pecayoba ngen Bito Baik!”

¹⁶Ketiko Yesus dong paneu moi Daneu Galilea, Si kemliak Simon ngen Adreas, pasuak Simon. Tobo'o dong mambua jalai neak daneu, karno tobo'o tukang jalai kan.

¹⁷Yesus madeak ngen tobo'o, “Maro, totoaba Uku ngen udi bakea jijai tukang jalai tun.”

¹⁸Lajau tobo'o segro teminggea jalaine ngen temotoa Si.

¹⁹Sesudo Yesus temrus pemaneu-Ne didik igai, Si-kemliak Yakobus, anok Zabedeus, ngen Yohanes, pasuakne, dong penyep jalai neak lem biduk.

²⁰Yesus segro menok tobo'o ngen tobo'o teminggea bakne, Zabedeus, neak lem biduk besamo anok bueakne lajau temotoa Si.

²¹Yesus ngen murid-murid-Ne sapei nak Kapernaum. Sesudo bilai Sabat muloi, Yesus segro masuk moi umeak semyang ngen mengajea.

²² Tun-tun de ade neak umeak semyang kembiak tujau temi'uk ca'o ajaran-Ne kerno Si majea tobo'o awei tun gi temuan kuaso, coa awei gu'au-gu'au agamo.

²³Pado waktau'o neak lem umeak semyang tobo'o ade tun de pasuk roh kidek tun'o menggang,

²⁴“Jano Kelok-Nu ngen keme, Yesus tun Nazaret? Jano Ko teko utuk munuak keme? Uku namen api Ko: De Sucai kunei Allah.”

²⁵Tapi Yesus tema'ok-Ne, nadeak-Si, “Diem, kelueaba kunei awokne!”

²⁶Roh kidek o gemuyang tun'o, samo menggang ngen saei kebiak lek roh kidek keluea kunei awokne.

²⁷Tobo'o kutene kembiak tujau, sehinggo tobo'o bogoa, madeakne, “Jano dio? Do ajaran belau. Si miling ngen kuaso. Melei periteak ngen roh-roh kidek ngen tobo'o taat ngen-Si.”

²⁸Lajau segro tesebeaba bito tetang Si neak kute Galilea.

²⁹Sesudo keluea kunei umeak semyang'o Yesus besamo Yakobus ngen Yohanes lalau moi umeak Simon ngen Adreas.

³⁰Stuang Selawei Simon tegulek kerno bolon. Tobo'o segro melei namen keadaanne ngen Yesus.

³¹Yesus lalau moi penan selawei'o samo megong tangenne Si gemingut ne. Lajau nyep olonne, sesudo'o selawei o melayan tobo'o.

³²Ayok kelmen, sesudo matai bilei tebenem, nembinba ngen Yesus kute tun gi bolon ngen pasuk semat.

³³Kute penduduk neak kota o dong bekopoa nak adep bang.

³⁴Yesus kema'en dau tun de dau mecem olon ngen musir dau semat; Si coa melueak semat-semat'o miling, karno semat'o namen ngen Si.

³⁵Kekabuk nien, waktau bilei masiak kelem, Yesus kelongon sesudo'o lalau moi luea. Si lalau moi penen sunyai ngen bedu'o neak di.

³⁶Tapi Simon ngen kekuatne mesoa Yesus.

³⁷Waktau tobo'o temau ngen Si, tobo'o madeak ngen Si, “Kute tun mesoa ko.”

³⁸Jawab-Ne, “Maroba ite lalau moi penan luyen, moi kota rogok yo, supayo neak di kulo Uku melei namen Bito Baik, kerno utuk o Uku teko.”

³⁹ Lajau lalauba Si moi kute kota Galilea melei namen Bito Baik neak lem umeak semyang tobo'o ngen musir semat-semat.

⁴⁰Suang tun de bolon kidek teko ngen Yesus, ngen sembeak sujud neak adep-Ne Si minoi tulung, nadeakne, “Amen ko lok, Ko nam kema'en uku.”

⁴¹Lajau tegerokba atei-Ne ngen raso ibo, Si mulua tangen-Ne, Si gemindoa tun'o madeak ngen Si, “Uku lok, ka'enba ko.”

⁴²Seketiko o kulo nyepba olon kidekne ka'enba si.

⁴³Segro Si muluak tun'o lalau samo Si madeak:

⁴⁴ “Inget, jibeak ko madeak hal yo ngen api bae, tapi lalauba, kemten dirainu ngen imem ngen meleiba utuk upacara persembahan, de neriteak Musa, sebagai bukti bagiak tobo'o.”

⁴⁵Tapi tun'o lalau melei namen hal'o serto semiar neak ipe bae, sehinggo Yesus coa dapet igai tete'ang masuk moi lem kuta. Si tinggea nak luea nak penan sunyai; tapi tun te'us kulo teko ngen-Si kunei kute penan.