Read Rejang MARKUS 12 Bible Online

MARKUS 12 - Rejang bible

MARKUS 12

¹ Lajau Yesus muloi miling ngen tobo'o lem perumpamo, “Ade su'ang tun mukok kebun anggur ngen nea kandang sekelilingne. Si menea lubang penan miyuak anggur ngen temgok menara jago. Sesudo'o Si semiwo kebun'o ngen pekerjo-pekerjo lajau berakat moi negrai luyen.

²Ngen waktau bi sapei musim ne, Si meluak su'ang pelayan ngen pekerjo-pekerjo'o utuk temimo pao kunei asea kebun'o kunei tobo'o.

³Tapi tobo'o temakep pelayan'o ngen mokoane, lajau meluakne lalau ngen tangen kosong.

⁴Sesudo'o Si melueak igai su'ang pelayan luyen ngen tobo'o. Tun yo tobo'o nokoa sapei sileak ulaune ngen tobo'o kebiak semelekne.

⁵Lajau Si meluak su'ang pelayan de luyen igai, tun yo tobo'o nunuak. Ngen dau igai de luyen, ade de tobo'o mokoa, ade de tobo'o nunuak.

⁶Uyo tinggea do tun anokne su'ang. Akherne si meluak si ngen tobo'o, nadeakne: anokku suang bakea tobo'o semgan.”

⁷Tapi pekerjo-pekerjo'o madeak su'ang ngen de luyen: “Si adeba ahli waris, maro ite munuak si mako warisan yo jijai milik ite.”

⁸Tobo'o temakepne ngen munuakne, lajau nuang moi luea kebun anggur'o.

⁹Uyo jano de bakea nea ngen temuan kebun anggur'o? Si bakea teko ngen munuak pekerjo-pekerjo'o, lajau melei kepercayaan kebun'o ngen tun-tun luyen.

¹⁰ Coa perneak udi mbaco ayatyo: “Butau de nuang ngen tukang-tukang bangunan bi jijai butau de utamo.

¹¹Hal'o te jijai kunei pihak Tuhan, sesuaktau hal ajaib neak matai te.”

¹²Lajau tobo'o berusaho utuk temakep Yesus, kerno tobo'o namen, bahwo tobo'o ba de maksud-Ne ngen perumpamo'o. Tapi tobo'o saben ngen tun dau, jijai tobo'o lalau ngen munyau Si.

¹³Sesudo'o neluak kekedau tun Farisi ngen tun Herodian ngen Yesus utuk jembak Si ngen pertanyaan.

¹⁴Tun-tun'o teko madeak ngen Si, “Gu'au, keme namen, Ko adeba su'ang de jujur, Ko coa saben ngen api bae, sebab Ko coa mesoa papea, seluyen ngen jujur majea dalen Allah ngen kute kejujuran. Jano buliak masen pajak ngen Kaisar jano coa? Harus keme masen jano coa?”

¹⁵Tapi Yesus namen tobo'o munafik, lajau madeak ngen tobo'o getai udi cemubo Uku? “Mbin ba miyo do dinar supayo Uku kemliak!”

¹⁶Lajau tobo'o mbin. Mako Si betanye ngen tobo'o, “Gambar ngen tulisan api dio?” Jawab tobo'o, “Gambar ngen tulisan Kaisar.”

¹⁷Lajau nadeak Yesus ngen tobo'o, “Neleiba ngen Kaisar jano de wajib udi melei ngen Kaisar, ngen Allah jano de wajib udi melei ngen Allah!” Tobo'o kembiak sele temi'uk Si.

¹⁸ Tekoba ngen Yesus kekedau tun Saduki, bi bependapet, bahwo coa ade tun idup igai kunei matei. Tobo'o betanye ngen-Si:

¹⁹ “Gu'au, Musa temulis periteak yo utuk ite: ‘Amen su'ang tun de temuan pasuak semanei, matei ngen teminggea suang ngenyan tapi coa temuan anok, pasuakne harus nikeak ngen ngenyan ne'o ngen melei anok utuk pasuakne o.’

²⁰Adeba tujuak tun pasuak. De pertamo nikeak ngen su'ang selawei ngen matei coa temuan anok.

²¹Lajau de keduai kulo nikeak ngen si ngen matei coa temuan anok awei'o kulo ngen de ketelau.

²²Awei'oba seterusne, ketujuakne coa temuan anok. Akherne, sesudo tobo'o kute, selawei'o kulo matei.

²³Pado bilai tun matei'o idup igai, amen si idup igai, api de jijai maten selawei'o? Kerno ke tujuakne bi nikeak ngen si.”

²⁴Yesus jemawab ngen tobo'o, “Udi seset, kerno udi coa ngertai Kiteb Sucai atau kuaso Allah.

²⁵Sebab amen tun idup igai kunei antaro tun matei, tobo'o coa bakea nikeak igai, seluyen tobo'o bakea idup awei malaikat neak surgo.

²⁶ Tetang tun matei idup igai, ati perneak udi mbaco lem kiteb Musa, lem cerito tetang sakea tebok? Neak di Allah befirman ngen Musa: ‘Ukuba Allah Abraham, Allah Ishak ngen Allah Yakub?’

²⁷Si iso Allah tun matei, seluyen Allah tun idup. Udi benea-benea seset!”

²⁸Lajau su'ang gu'au agamo temi'uk Yesus ngen tun-tun Saduki tanye jawab. Gu'au agamo o namen, bahwo Yesus melei jawaban de tepat ngen tun-tun'o. Lajau gu'au agamo o temnai ngen Yesus: “Hukum ipe de paling utamo?”

²⁹ Yesus jemawab, “Hukum de utamo adeba: ‘Teni'uk ba, Hoi tun Israel, Tuhan Allah te, Tuhan'o Esa.

³⁰Kemasiak ba Tuhan, Allahnu, Ngen segenep ateinu Ngen segenep jiwonu Ngen segenep akea budimu Ngen segenep kekuatannu.’

³¹ Hukum de keduai adeba kemasiak ba sesamonu manusio awei dirainu su'ang. Coa ade hukum luyen de lebiak utamo kunei pado keduai hukum yo.”

³² Lajau nadeak Gu'au agamo o ngen Yesus, “Tepat nien, gu'au, benea nadeak-Nu'o bahwo Si esa, bahwo coa ade de luyen kecuali Si.

³³ Memang kemasiak Si ngen segenep atei ngen segenep akeane ngen segenep kekuatan, ngen kulo kemasiak sesamo manusio awei dirai su'ang adeba uak lebiak utamo kunei pado kute kurban de nembem ngen kurban-kurban de sembeliak luyenne.”

³⁴Yesus kemliak, bahwo gu'au agamo o bi jemawab ngen baik sekilai. Ngen Yesus madeak ngen si, “Ko coa uak kunei dunio blau Allah!” Su'ang tun kulo coa binai igai temanye sesuatau ngen Yesus.

³⁵Sementaro Yesus majea neak Umeak Tuhan, Yesus madeak, “Awei ipe gu'au-gu'au agamo dapet madeak, bahwo Rajo Penyelamat adeba Anok Daud?

³⁶ Daud su'ang ngen pemipin Roh Sucai madeak: ‘Tuhan bi befirman ngen Tuan-Ku: Temot ba neak depeak kanen-Ku, sapei musuak-musuak-Nu nyereak ngen-Ko.’

³⁷Daud su'ang sembut ‘Si Tuanne,’ awei ipe mungkin si anokne kulo?” Tun dedau jumlahne teni'uk Si ngen penuak pecayo.

³⁸ Lem ajaran-Ne Yesus madeak, “Teatei ba te'adep gu'au-gu'au agamo de galok paneu makei jubah panjang ngen galok temimo hormat neak pasar.

³⁹De galok temot neak penan paling muko neak umeak semyang ngen neak penan terhormat lem pesta.

⁴⁰Tobo'o mike jando-jando, dong tobo'o temutup kejahatanne ngen du'o de panjang. Tobo'o yo paset bakea temimo hukuman de lebiak benek.”

⁴¹Pado waktau Yesus temot madep kutak persembahan ngen kemliak awei ipe tun dau mpek caci moi lem kutak'o. Dau tun kayo melei ngen jumlah de lai.

⁴²Lajau tekoba su'ang jando peset ngen si melei duai caci tembago de paling titik nilaine.

⁴³Mako Si menok murid-murid-Ne ngen madeak ngen tobo'o, “Uku madeak ngen udi, sesungguakne jando peset yo melei lebiak dau kunei pado kute tun de mpek caci moi lem kutak persembahan.

⁴⁴Sebab tobo'o kute melei kunei lebiak hartone, tapi jando yo nelei kunei kekuranganne, kute de ade ngen si, kute nafkahne.”