Read Rejang MARKUS 13 Bible Online

MARKUS 13 - Rejang bible

MARKUS 13

¹Ketiko Yesus keluea kunei Bait Allah, suang murid-Ne madeak ngen Si, “Gu'au, keliakba padeak kelaine butau-butau'o ngen padeak keba'esne gedung-gedung'o!”

²Lajau Yesus madeak ngen si, “Udi kemliak gedung-gedung de ba'es yo? Coa gen do butau kulo bakea nunyau teletok neak das butau de luyen, kutene bakea temben.”

³Ketiko Yesus temot neak Tebo Zaitun, sekadep ngen Bait Allah, Petrus, Yakobus, Yohanes ngen Adreas betanye seca'o pribadi ngen-Si:

⁴“Nadeak ba ngen keme, tengen do'o bakea tejijai, ngen jano tandone, amen kutene'o bakea sapei ngen kesudone.”

⁵Mako muloiba Yesus madeak ngen tobo'o, “Atei-ateiba supayo jibeak de sapei udi keno pike!

⁶Bakea teko dau tun ngen makei gen-Ku ngen madeak: ‘Uku ba Si,’ ngen tobo'o bakea mike dau tun.

⁷Amen udi temi'uk sa'ei perang atau bito-bito tetang perang, jibeakba udi liseak. Kutene'o harus tejijai, tetapi do'o ati kesudone.

⁸Sebab bangso bakea perang melawen bangso kerajaan melawen kerajaan. Bakea tejijai gepo bumai neak macem penan, ngen bakea ade kenyemen. Kutene'o tembei ba mulone derito jemlang zaman belau.

⁹ Tapi udi yo, atei-ateiba! Udi bakea senereak ngen majelis agamo ngen udi bakea nokoa neak umeak semyang. Ngen bakea nadep ngen tobo gubernur ngen tobo rajo kerno Uku, sebagoi saksai bagiak tobo'o.

¹⁰Tapi Bito Baik harus melei namen kileak ngen kute bangso.

¹¹Amen udi ni'ing ngen senerak, jibeakba udi renyeng jano de harus udi nadeak. Tapi nadeak ba jano de udi nelei ngen ko pado saat o kulo, sebab iso udi de kemecek, meluyen Roh Sucai.

¹²Suang pasuak bakea senereak pasuakne utuk nunuak. Awei'o kulo suang tieak teadep anok ne. Anok-anok bakea berutak teadep tun tuaine ngen bakea munuak tobo'o.

¹³ Udi bakea jenngik kute tun kerno gen-Ku. Tapi tun de betaen sapei ade sudone bakea selamat.”

¹⁴ “Amen udi kemliak kejahatan de membinaso je neak penan de coa patutne — paro pembaco kelokne paham — mako tun-tun de neak Yudea harusba melilai dirai moi tebo-tebo.

¹⁵ Tun de dong berade neak das umeak jibeakba tu'un ngen masuk utuk mok sesuaktau kunei umeakne.

¹⁶Ngen tun de neak kebun jibeakba belek utuk mok keracokne.

¹⁷Celakoba embei-embei de tenei lai atau de banok titik pado maso'o.

¹⁸Bedu'oba, supayo kutene'o coa tejijai pado musim sengok.

¹⁹ Sebab pado maso'o bakea tejijai sikso awei de ati perneak tejijai sejok mulone dunio, de cenipto Allah, sapei uyo ngen de coa bakea tejijai igai.

²⁰Sekirone Tuhan coa gemacang waktaune, mako coa suang tun bakea senlamat; tapi kerno tun-tun piliak de sudo niliak-Ne, Tuhan gemacang waktaune.

²¹Pado waktau'o amen tun madeak ngen udi: ‘Keliak, Rajo Penyelamat ade neak yo,’ atau: ‘Keliak, Rajo Penyelamat ade neak di,’ jibeak udi masai.

²²Sebab Rajo-rajo Penyelamat palsu ngen nebai-nebai palsu bakea timboa ngen tobo'o bakea menea tando-tando, mujizat-mujizat ngen maksud, sekirone mukin, mike tun-tun pilihan.

²³Atei-ateiba udi! Uku bi lebiak dute madeak kutene yo ngen udi.”

²⁴ “Tapi pado maso o, sesudo sikso o, matai bilai bakea jijai kelem ngen bulen coa becahayo.

²⁵ Ngen bitang-bitang bakea us kunei lenget, ngen kuaso-kuaso lenget bakea gucang.

²⁶ Pado waktau'o tun bakea kemliak anok manusio teko lem mbun-mbun ngen kute kuaso ngen kemulioan-Ne.

²⁷Pado waktau'o kulo si bakea meluak keluea malaikat-malaikat ngen bakea melungguk tun-tun de sudo niliakne kunei kepat penjuru bumai, kunei ujung bumai sapei ujung lenget.

²⁸Mokba pelajaran kunei perumpamo tetang pun ara amen dan-danne luyek ngen muloi tunes, udi namen bahwo musim panes bi pa'ok.

²⁹Awei yo kulo, amen udi kemliak hal-hal'o tejijai, namenba bahwo waktaune bi pa'ok, sudo neak adep bang.

³⁰Sesungguakne uku madeak ngen udi: tun-tun zaman yo coa bakea lalau, ayok kutene'o tejijai.

³¹Lenget ngen bumai bakea berakher, tapi kecek-Ku yo coa bakea berakher.

³² “Tapi tetang bilai atau saat'o coa suang tun de namen, malaikat-malaikat neak surgo coa ngen anok kulo coa, hanyo Bapa bae.

³³Atei-ateiba ngen bejago-jagoba! Sebab udi coa namen tengen waktaune sapei.

³⁴ Keadaanne awei suang de lalau, de teminggea umeakne ngen semrak tanggung jawab ngen pelayan-pelayanne. Masing-masing ngen tugasne, ngen periteak penjago bang supayo berjago-jago.

³⁵Kerno'o bejago-jagoba, sebab udi coa namen tengen Tuan umeak'o belek, ayok kelemen, atau uak malem, atau kekabuk.

³⁶Supayo amen si tibo-tibo teko, jibeak sapei si kemliak udi dong tidua.

³⁷Jano de Kunadeak ngen udi, Uku madeak ngen kute tun: bejago-jagoba!”