Read Rejang MARKUS 15 Bible Online

MARKUS 15 - Rejang bible

MARKUS 15

¹Kekabuk nien imem-imem kepalo besamo tetuai ngen gu'au-gu'au agamo serto paro anggota Mahkamah Agamo luyenne, made pertemuan. Sesudo'o tobo'o meket Yesus lajau mbin Si ngen semrak Si ngen Pilatus.

²Pilatus betanye ngen Yesus, “Ko Rajo tun Yahudi?” Jawab Yesus, “Ko suang madeak ne.”

³Lajau imem-imem kepalo melei dau tuduhan teadep Si.

⁴Pilatus betanye igai ngen Si, “Coa Ko jenawab samo sekilai? Keliak ba padeak daune tuduhan tobo'o teadep Ko!”

⁵Tapi Yesus samo sekilai coa jemawab igai, sehinggo Pilatus meraso sele.

⁶Pado tiep bilai rayo'o Pilatus biasone mlepas suang tun tahanan temurut minoi tun dau o.

⁷Pado waktau'o ade suang genne Barabas gidong masuk penjara besamo kekedau tun pembrutak luyen ne. Tobo'o bi munuak dau tun neak lem bruntak.

⁸Lajau tekoba tun dau ngen minoi supayo menea hal'o utuk tobo'o awei biasone.

⁹Pilatus temnai ngen tobo'o, “Janokah udi kemlok supayo uku mbebas Rajo tun Yahudi yo?”

¹⁰Si memang namen, bahwo imem-imem kepalo bi semrak Yesus kerno iri.

¹¹Tapi imem-imem kepalo majung tun dau utuk minoi supayo Barabas ba de mbebasne bagiak tobo'o.

¹²Pilatus debat igai betanye ngen tobo'o, “Amen awei'o, jano de harus uku menea ngen tun de ko madeak Rajo tun Yahudi yo?”

¹³Tobo'o menggang igai, nadeakne, “Semalib Si!”

¹⁴Lajau Pilatus madeak ngen tobo'o, “Tapi kejahatan jano de nea ne?” Tapi tobo'o tambeak lek menggang, “Senalib Si!”

¹⁵Kerno Pilatus lok semnang atei tun dau'o, si mbebas Barabas utuk semreak ngen tobo'o. Dong Yesus cenambukne lajau semreak Si utuk senalib.

¹⁶Sesudo'o tentra-tentra mbin Yesus neak latet istana, de adeba penan tinggea Gubernur, ngen menok kute pasukan bekopoa.

¹⁷Tobo'o makei jubah ungu ngen Yesus, nganem debuak mahkota tebok ngen mpekne neak das ulau Yesus.

¹⁸Sesudo'o tobo'o muloi melei hormat ngen-Si, nadeakne, “Salam, hoi Rajo tun Yahudi!”

¹⁹Tobo'o mokoa ulau-Ne ngen buluak, ngen temkek-Ne ngen sujud nyembeak Si.

²⁰Sesudo gemurek Si tobo'o temagea jubah ungu de makei-Ne ngen makei igai keracokne ngen Si. Sesudo'o Yesus nembin moi luea utuk senalib.

²¹ Pado waktau'o liwet suang tun genne Simon, tun Kirene, bak Aleksander ngen Rufus, de pei teko kunei luea kuta, ngen tun'o tobo'o pakso utuk mikua Salib Yesus.

²²Tobo'o mbin Yesus moi penan genne Golgota, taine: “Penan Tengkorak”.

²³Lajau tobo'o melei anggur capua mur ngen-Si, tapi Si temulokne.

²⁴ Sesudo'o tobo'o senalib Si, lajau tobo'o magiak keracok-Ne ngen muang undi dasne utuk temenep pagiak saleak suang.

²⁵Pado jam sembilan pueng tobo'o semalib Si.

²⁶Alasan getai Si nukum senbut neak tulisan de nasang neak di, “Rajo Tun Yahudi.”

²⁷Besamo ngen Si, senalib duai tun perapok, suang neak depeak kanen-Ne ngen suang neak depeak kideu-Ne. [

²⁸Ngen awei yo tejijaiba ayat alkiteb de sa'eine, “Si bakea teitung neak antaro tun-tun kidek.”]

²⁹ Tun-tun de liwet neak di mino Yesus, ngen samo giling ulau tobo'o madeak, “Hoi, Ko de lok mubuak Bait Sucai ngen lok temgok igai lem telau bilai.

³⁰Tu'un ba kunei salib'o ngen semlamat ba dirai-Nu!”

³¹Awei'o kulo imem-imem kepalo besamo-samo gu'au-gu'au agamo kemurek Si neak antaro tobo'o suang ngen tobo'o madeak, “Tun luyen Si semlamet, tapi diraine suang coa dapet Si semlamat!

³²Baikba Rajo Penyelamat, Rajo Israel o, tu'un kunei salib'o uyo supayo ite kemliak ngen masai.” Keduai tun o kulo de senalib besamo-samo ngen-Si mino Si kulo.

³³Pado jam duai belas, kelem kute daerah'o ngen belangsung sapei jam telau pelbea.

³⁴ Pado jam telau menggang ba Yesus ngen sa'ei nya'ing, “Eloi, Eloi, lema sabakhtani?” taine, “Allahku, Allahku, getai Ko teminggea Uku?”

³⁵Temi'uk'o kekedau tun de je neak di madeak, “Keliak, Si menok Elia.”

³⁶ Mako tekoba suang tun ngen sobot, cemlupne moi lem anggur pi'iak lajau cemcukne moi depun buluak ngen melei Yesus menem samo madeak, “Baik ba ite mbot ngen kemliak jano Elia teko utuk temu'un-Ne.”

³⁷Lajau menggangba Yesus ngen suaro lek ngen semreak nyabai-Ne.

³⁸ Ketiko o tabir Bait Sucai pegit jijai duai kunei das sapei beak.

³⁹Waktau pemipin pasukan de je sekadep ngen Si kemliak-Ne mok nyabai terakhir awei'o madeak ba si, “Sungguak, tun yo Anok Allah!”

⁴⁰ Ade kulo kekedau selawei de kemliak kunei ku'uak, antarone Maria Magdalena, Maria indok Yakobus u'ai ngen Yoses, serto Salome.

⁴¹Tobo'o kutene bi temotoa Yesus ngen ngelayan-Ne waktau Si neak Galilea. Ade kulo neak di dau selawei luyen de sudo teko neak Yerusalem besamo-samo ngen Yesus.

⁴²Sementaro'o bilai muloi kelemen ngen bilai'o bilai persiapan, adeba bilai ayok Sabat.

⁴³Kerno'o Yusuf, tun Arimatea, suang anggota majelis lai de kayo kulo mbot waktaune Allah meriteak sebagai Rajo, minoi dirai madep Pilatus ngen minoi mayit Yesus.

⁴⁴Pilatus sele waktau temi'uk bahwo Yesus bi matei. Lajau si menok pemipin pasukan, ngen betanye ngen si jano Yesus bi matei.

⁴⁵Sesudo temi'ukne keterangan pemipin pasukan, si mizin melei mayit'o ngen Yusuf.

⁴⁶Yusuf kulo mukua kain lenan, sudo'o si temu'un mayit Yesus kunei salib ngen kempanne ngen kain lenan'o lajau si gemulingne lem kubua de ade neak lem tebo butau. Sudo'o genulingne debuak butau moi bang kubua'o.

⁴⁷Maria Magdalena ngen Maria indok Yoses kemliak neak ipe Yesus genulek.