Read Rejang MARKUS 16 Bible Online

MARKUS 16 - Rejang bible

MARKUS 16

¹Sesudo'o liwet bilai Sabat, Maria Magdalena ngen Maria indok Yakobus, serto Salome nukua bungai rampai utuk lalau moi kubua ngen melomok Yesus.

²Kekabuk nien pado bilai pertamo minggau o, sesudo matai bilai timboa, lalauba tobo'o moi kubua.

³Tobo'o madeak suang ngen de luyen, “Api de bakea gemuling butau'o bagiak ite kunei bang kubua?”

⁴Tapi ketiko tobo'o kemliak kunei pa'ok, ketenba, butau'o sudo teguling. Butau'o memang kembiak lai.

⁵Lajau tobo'o masuk moi lem kubua ngen tobo'o kemliak tun u'ai de makei jubah putiak temot neak depeak kanen. Tobo'o kulo kembiak tekanjet.

⁶Tapi tun u'ai o madeak ngen tobo'o, “Jibeak saben! Udi mesoa Yesus tun Nazaret de senalib'o. Si sudo idup igai, Si coa ade neak yo. Keliak! Dioba penan tobo'o gemulek Yesus.

⁷ Tapi uyo lalauba, nadeakba ngen murid-murid-Ne ngen Petrus: Si de mute udi moi Galilea; neak di udi bakea kemliak Si, awei de sudo nadeak-Ne ngen udi.”

⁸Lajau tobo'o melilai teminggea kubua'o, kerno tekanjet ngen saben. Tobo'o coa madeak jejano ngen api bae kerno saben. Ngen siket tobo'o semapei kute pesen'o ngen Petrus ngen kekuatne. Sesudo'o Yesus suang ngen liwet murid-murid-Ne melei namen kunei Timur moi Barat Bito de Sucai ngen coa bakea abis tetang keselamatan de kekal'o. [

⁹Sesudo Yesus idup igai pepueng pado bilai pertamo minggau o, Si mulo-mulo kemten dirai-Ne ngen Maria Magdalena. Yesus perneak musir tujuak semat kunei si.

¹⁰Lajau selawei'o lalau melei namen ngen tobo'o de temotoa Yesus ayokne ngen pado waktau o, gidong beduko ngen ngindoi.

¹¹Tapi ketiko tobo'o temi'uk, bahwo Yesus idup ngen bi kemliakne tobo'o coa pecayo.

¹²Sesudo'o Si kemten dirai ngen betuk de luyen ngen duai tun kunei tobo'o, ketiko keduaine lem pemaneu moi luea kota.

¹³Lajau belekba tobo'o melei namen ngen de luyen, tapi tobo'o coa pecayo ngen keduai tun'o.

¹⁴Akhirne Si kemten dirai ngen sebelas tun'o ketiko tobo'o gidong mukmei, ngen Si coa masai ngen telo atei tobo'o, kerno tobo'o coa masai ngen tun-tun de sudo kemliak Si sesudo Si idup igai.

¹⁵ Lajau Si madeak ngen tobo'o, “Lalauba moi kute dunio melei namenba Bito Baik ngen kute makluk.

¹⁶Api de pecayo ngen dibabtis bakea senlamat, tapi api de coa pecayo bakea nukum.

¹⁷Tando-tandoyo bakea semerto tun-tun de pecayo; tobo'o bakea musir semat-semat utuk gen-Ku, tobo'o bakea miling lem bahaso-bahaso de belau bagiak tobo'o.

¹⁸Tobo'o bakea megong dung, ngen debat tobo'o menem acun de bahayo, tobo'o coa bakea dapet celako; tobo'o bakea meletok tangenne das tun bolon, ngen tun'o bakea ka'en.”

¹⁹ Sesudo Tuhan Yesus miling awei yo ngen tobo'o, taketba Si moi surgo, lajau temot depeak kanen Allah.

²⁰Tobo'o kulo lalau melei namen Bito Baik moi kute penjuru, ngen Tuhan milem kerjo ngen kemukuak firman o ngen tando-tando de semertone.] [AKHIR NASKAH KUNO DE LUYEN Selawei-selawei o lalau ngen Petrus ngen kekuatne, lajau cemrito ngen siket kute de sudo nelei namen ngen tobo'o ngen tun u'ai o. Sesudo'o, Yesus suang liwet murid-murid-Ne melei namen kunei Timur moi Barat Bito de Sucai ngen kekal tetang keselamatan de kekal.]