Read Rejang MARKUS 2 Bible Online

MARKUS 2 - Rejang bible

MARKUS 2

¹Sesudo liwet kekedau bilai, waktau Yesus teko igai moi Kapernaum, tesebeaba bito, Si ade neak dasei.

²Lajau tekoba tun dau bekopoa sehinggo cigai gen igai penan, bahkan neak adep bang kulo coa gen. Sementaro Si melei namen firman Tuhan ngen tobo'o.

³Ade tun teko magea Si mbin tun pakuak, musung ngen tun pat.

⁴Tapi tobo'o coa dapet mbin Si karno tun dau'o, lajau tobo'o mukok atep neak das Yesus; sesudo tukok tobo'o metang tikea penan tun bolon'o tegulek.

⁵Ketiko Yesus kemliak imen tobo'o milingba Si ngen tun pakuak'o, “Hoi anok-Ku duso-dusonu sudo napun.”

⁶Tapi kekedau gu'au agamo de gidong temot neak di, tobo'o meker lem ateine:

⁷“Getai tun yo miling awei'o? Si mino Allah. Api de dapet mapun duso seluyen Allah suang?”

⁸Tapi Yesus segro namen lem ateine bahwo tobo'o meker awei yo. Lajau Si madeak ngen tobo'o, “Getai udi meker awei'o lem ateinu?

⁹Ipe de lebiak mudeak, madeak ngentun pakuak yo: ‘Duso-dusonu napun’, atau madeak: ‘Kelongonba, naketba tikeanu ngen paneu ba’?

¹⁰Tapi supayo Udi namen, bahwo Anok Manusio temuan kuaso mapun duso neak lem dunio yo.” Lajau madeakba Si ngen tun pakuak'o:

¹¹“Uku madeak ngen ko kelongonba, naket tikea nu ngen belekba moi dasei nu!”

¹²Tun'o kulo klongon, segro Si naket tikea'o ngen lalau moi luea kunei adep tun-tun o, sehinggo tobo'o kembiak tujau lajau mulia Allah, nadeak tobo'o, “De awei yo ati perneak ite kemliak.”

¹³Sesudo'o Yesus lalau igai moi Daneu Galilea. Ngen kute tun teko ngen-Si, lajau Si majea tobo'o.

¹⁴Sesudo'o ketiko Si liwet neak di, Si kemliak Lewi anok Alfeus temot neak penan mungut pajak. Lajau Yesus madeak ngen-Si, “Toto'aba Uku!” Lewi lajau temotoa Yesus.

¹⁵Sesudo'o ketiko Yesus mukmei neak umeak tun'o, dau tukang pajak ngen tun beduso mukmei berpok ngen Si ngen murid-muridne, kerno dau tun temotoa Si.

¹⁶Pado waktau gu'au-gu'au agamo kunei kelopok Farisi kemliak bahwo Si mukmei ngen tukang pajak ngen tun beduso'o, madeak ba tobo'o ngen murid-murid Yesus, “Getai Si mukmei berpok ngen tukang pajak ngen tun beduso'o?”

¹⁷Yesus temi'ukne ngen madeak ngen tobo'o, “Iso tun sehat de perlu dokter, tapi tun bolon. Uku teko iso utuk menok tun benea, tapi tun beduso.”

¹⁸Pado suatu kilai ketiko murid-murid Yohanes Pembaptis ngen tun-tun Farisi gidong puaso, tekoba tun-tun madeak ngen Yesus, “Getai murid-murid Yohanes Pembaptis ngen murid-murid tun Farisi puaso, tapi murid-murid nu coa?”

¹⁹Yesus madeak ngen tobo'o, “Dapetkah kekuat sematen puaso gidong sematen o sesamo tobo'o? Selamo sematen o sesamo tobo'o, tobo'o coa dapet puaso.

²⁰Tapi waktaune bakal teko sematen'o nemok kunei tobo'o, waktau'oba tobo'o bakea puaso.

²¹Coa suang tun temepek delembea kain de belau ngen delembea kain de kidek, kerno amen awei yo kain penepek'o bakea cena'ikne, de belau cena'ik de kidek, lajau tambeak laiba segitne.

²²Awei'o kulo coa suang tun me'eng anggur gi belau nak lem katung babok gi tuai, kerno amen awei yo anggur'o bakea cemaik kantung'o, sehinggo anggur'o ngen katungne duai-duaine tekuang. Tapi anggur gi belau kelokne naik lem katung gi belau kulo.”

²³ Pado do bilai Sabat, Yesus paneu nak lem kebun gendum, sementaro Si paneu murid-murid-Ne mopoa soa gendum.

²⁴Mako padeak tun-tun Farisi ngen Si, “Getai tobo'o menea de tengeak neak bilai Sabat?”

²⁵ Jawab-Ne ngen tobo'o, “Ati perneak udi mbaco jano de kenerjo Daud, ketiko Si ngen tun-tun de penotoane de coa temuan kembuk ngen kenyemen,

²⁶ Awei ipe Si masuk neak Bait Allah waktau Abyatar jijai imem lai lajau mbuk ruti de senaji'o — de coa buliak mbuk kecuali imem-imem — ngen melei kulo ngen murid-muridne?”

²⁷Lajau nadeak Yesus ngen tobo'o, “Bilai Sabat'o nade utuk manusio; ngen iso manusio utuk bilai Sabat.

²⁸Jijai anok manusio adeba kulo Tuhan nak bilai Sabat.”