Read Rejang MARKUS 3 Bible Online

MARKUS 3 - Rejang bible

MARKUS 3

¹Lajau Yesus masuk igai neak lem umeak semyang. Neak di ade tun de tangenne matei depeak.

²Tobo'o bogoa kemliak Yesus, amen Si kema'en tun'o pado bilai Sabat, supayo tobo'o dapet semaleak-Si.

³Nadeak Yesus ngen tun de tangenne matei depeak'o, “Maro, je ba neak donok!”

⁴Sesudo'o nadeak-Ne ngen tobo'o, “Ipe debuliak pado bilai Sabat? Menea baik jano menea kidek? Semlamat nyabai tun jano de munuak tun?” Tapi tobo'o diem bae.

⁵Si kembiak duko kerno telo atei tobo'o ngen Si lebiak mengiak kemliak tun-tun neak le'etne lajau Si madeak ngen tobo'o, “Nuluaba tangennu!” Lajau tun mulua tangenne, mako ka'enba tangenne o.

⁶Lajau kelueaba tun-tun Farisi ngen segro menea rencano besamo tun-tun Herodian utuk munuak Si.

⁷Sesudo'o Yesus ngen murid-murid-Ne nyikir moi Daneu Galilea, ngen dau tun kunei Galilea temotoa Si. Kulo kunei Yudea,

⁸kunei Yerusalem, kunei Idumea, kunei dipoa Bioa Yordan, ngen kunei daerah Tirus ngen Sidon teko kute ngen-Si, sesudo tobo'o temi'uk kute hal de nea-Ne.

⁹ Si meluak murid-murid-Ne semiap debuak biduk utuk-Ne kerno tun dau'o, supayo tobo'o jibeak sapei menyet-Ne.

¹⁰Sebab Si kema'en dau tun, sehinggo kute tun bolon dedesok ngen-Si lok megong Yesus.

¹¹Tiep kilai roh-roh kidek kemliak Si, tobo'o sujud neak adepne ngen menggang, “Ko ba Anok Allah.”

¹²Tapi Yesus temgeak tobo'o melei namen api Si

¹³Sesudo'o kenekba Yesus neak das tebo. Si manggea tun-tun de kenlok-Ne, tobo'o teko ngen-Si.

¹⁴Si temtep duai belas tun utuk semerto Si ngen utuk semayo melei namen Bito Baik.

¹⁵Ngen nelei-Ne kuaso utuk musir semat.

¹⁶Keduai belas tun de tentep-Ne adeba: Simon, de nelei genne Petrus,

¹⁷Yakobus anok Zebedeus, ngen Yohanes pasuak Yakobus, de keduaine nelei-Ne gen Boanerges, taine anok-anok gutua.

¹⁸Selanjutne Adreas, Filipus, Bartolomeus, Matius, Tomas, Yakobus anok Alfeus, Tadeus, Simon tun Zelot,

¹⁹ngen Yudas Iskariot, de muker Si.

²⁰Sesudo Yesus belek moi umeak. Tapi tun dau teko igai bekopoa, sapei Yesus ngen murid-murid-Ne coa sepet mukmei.

²¹Waktau keluargo-Ne temi'uk hal'o, tobo'o teko lok mok Si, sebab nadeak tobo'o Si gilo.

²² Ngen gu'au-gu'au agamo de teko kunei Yarusalem madeak, “Si pasuk roh Beelzebul! Pemipin roh-roh kidek o ba de melei kuaso ngen Yesus utuk musir roh kidek.”

²³Yesus menok tobo'o, lajau madeak ngen tobo'o lem perumpamo, “Awei ipe Iblis dapet musir Iblis?

²⁴Amen debuak kerajaan tepecuak-pecuak, kerajaan'o coa dapet beta'en,

²⁵ngen amen debuak umeak tanggo'o tepecuak-pecuak, umak tanggo'o coa dapet beta'en.

²⁶Awei'o kulo amen Iblis brutak melawen diraine suang ngen amen si tepecuak-pecuak, si coa dapet betaen, seluyen sudoba sapei kesudone.

²⁷Tapi coa suang kulo dapet masuk umeak suang do kuet utuk merapok hokne amen coa neket kileak tun kuet'o. Sesudo'o baruba dapet si merapok umeak'o.

²⁸Uku madeak ngen udi: sebenea menea duso ngen mino te'adep tun bakea napun.

²⁹ Tapi amen suang mengiak ngen Roh Sucai, si coa dapet napun sekeanne, seluyen besaleak kerno menea duso de kekal.”

³⁰Si madeak awei yo karno tobo'o madeak bahwo si pasuk roh kidek.

³¹Lajau tekoba indok ngen pasuak-pasuak Yesus. Sementaro tobo'o je neak luea, tobo'o meluak manggea Yesus.

³²Ade tun dau temot gemlung Si, tobo'o madeak ngen-Si, “Keliak, indok ngen pasuak-pasuak-Ne ade neak luea, ngen berusaho temau Kumu.”

³³Yesus jemawab ngen tobo'o, “Api indok-Ku ngen api pasuak-pasuak-Ku?”

³⁴Si kemliak ngen tun-tun de temot neak sekeliling-Ne'o ngen madeak, “Dio indok-Ku ngen pasuak-pasuak-Ku!

³⁵Api bae de menea kelok Allah, Siba pasuak-Ku semanei, Siba pasuak-Ku selawei, Siba Indok-Ku.”