Read Rejang MARKUS 4 Bible Online

MARKUS 4 - Rejang bible

MARKUS 4

¹ Yesus majea igea nak patoi Daneu Galilea. Mako tekoba tun dau gi dau jumlahne gemlumbung Si. Sehinggo Si kemnek moi debeuak biduk gidong singgeak lajau temot nak di, dong kute tun dau'o nak da'et, nak biding daneu'o.

²Ngen Si majea dau hal lem perumpamo ngen tobo'o. Neak lem ajaran-Ne'o Si madeak ngen tobo'o:

³“Teni'ukba! Adeba suang peneba keluea utuk menebea.

⁴Pada waktau Si menebea pa'o semlan'o cucia nak pengger dalen, lajau tekoba burung ngen mbukne sapei abis.

⁵Pa'o cucia nak pitok de bebutau, lajau semlan'o segro idup, karno pitokne nipis.

⁶Tapi sesudo matai bilai timboa, lewba ngen jijai ke'ing kerno coa balet.

⁷Pa'o igai cucia neak tengeak sakea betebok, lajau tambeak laiba sakea o ngen mipitne sapei matei, sehinggo coa bebuak.

⁸Ngen pao cucia nak pitok de baik, si idup subur ngen bebuak, haseane ade de telau puluak kilai lipet, ade de num puluak kilai lipet, ade de sotos kilai lipet.”

⁹Ngen nadeak-Ne, “Api temuan tiuk utuk temi'uk, lokba si temi'uk!”

¹⁰Waktau Si suang dirai, murid-murid-Ne ngen keduei belas murid o temnai Si tetang perumpamo'o.

¹¹Si-jemawab, “Udi bi nelei resio tetang awei ipe Allah meriteak sebagai Rajo, tapi ngen tun-tun luyen kute sesuatau de senapei lem perumpamo,

¹² supayo: Kunyau tobo'o kemliak, tobo'o coa maham, kunyau tobo'o temi'uk, tobo'o coa ngertai, supayo tobo'o jibeak belek igai ngen dapet apun.”

¹³Lajau Yesus madeak ngen tobo'o, “Coa ka ade udi ngertai perumpamo yo? Amen awei yo awei ipe udi dapet maham kute perumpamo de luyen?

¹⁴Penebea'o adeba tun de menebea firman.

¹⁵Biniak de cucia neak dalen awei tun-tun de temi'uk bito tetang awei ipe Allah meriteak. Awei o temi'uk, Iblis teko ngen mok jano de sudo tenbea lem atei tobo'o.

¹⁶Awei'o kulo de senirok neak pitok de penuak butau, adeba de tun-tun temi'uk firman'o ngen segro nimone ngen senang.

¹⁷Tapi tobo'o coa ade balet ngen ta'en tegoa bae. Amen sudo'o tobo'o senikso kerno firman'o, tobo'o segro murtad.

¹⁸De luyen adeba de tenbea neak tengeak sakea tebok, do'oba de temi'uk firman'o.

¹⁹Tapi kwatir tetang idup tobo'o ngen lok idup senang. Nafsu utuk memecem hal masuk moi lem atei tobo'o. Kerno o bito kunei Allah telipit neak lem atei tobo'o, sehinggo coa bebuak.

²⁰Ngen akhirne de tenbea neak pitok de baik, adeba tun temi'uk ngen semambut firman'o lajau bebuak, ade de telau puluak kilai lipet, ade de num puluak lipet, ngen ade de sotos kilei lipet.”

²¹ Lajau Yesus madeak ngen tobo'o, “Tun mbin lapu jibeak supayo nepek neak beak talam atau neak beak penan tidua, seluyen nepek das kekea lapu?

²² Karno coa ade sesuatau gi tekunyin de coa bakea keten, ngen coa ade sesuatau de resio de coa bakea namen.

²³Api de temuan ti'uk utuk temi'uk, lokba si temi'uk!”

²⁴ Lajau Si madeak igai, “Peker bebaik jano de udi teni'uk! Awei ipe udi menea tun luyen, awei o kulo tun nea te'adep udi malah lebiak kunei o.

²⁵ Karno api de temuan, ngen Si bakea nelei, tapi api de coa temuan, jano bae de ade ngen Si bakea nemok.”

²⁶Lajau nadeak Yesus, “Awei yo ba hal Allah meriteak sebagai Rajo'o: seumpamo tun de tenbea biniak neak pitok,

²⁷lajau pado bilai kelemen Si tidua ngen pado kebilai Si kelongon, ngen biniak o kemluea tunes lajau timboa, awei ipe tejijaine coa tun namen.

²⁸Taneak ngen su'angne kemluea buak, mulo-mulo tukeine, lajau gumbangne, sudo'o buakne.

²⁹ Amen Buak'o de sudo mesok, tun'o segro mopoa, kerno musim mopoa bi teko.”

³⁰Yesus madeak igai, “Ngen jano ite lok mbanding Allah meriteak sebagai Rajo'o, ngen perumpamo jano ite lok melei gemambarne?

³¹Hal kerajaan'o seumpamo soa sawi tenbea neak pitok. Soa sawi de paling titik kunei kute jenis biniak de ade neak bumai.

³²Tapi amen tenbea, biniak'o idup ngen jijai lebiak lai kunei kute pucuk de luyen ngen kemluea dan-dan de lai, sehinggo burung-burung neak udaro dapet besa'ang neak lem sawi o.”

³³Ngen dau perumpamo de awei'o, Yesus semiar firman ngen tobo'o sesuoi ngen kemampuan tobo'o utuk ngertai.

³⁴Si bogoa majea ngen tobo'o ngen makei perumpamo. Tapi ngen murid-muridne, Yesus tem'ang ngen jelas.

³⁵Pado bilai'o, ayok kelmen Yesus madeak ngen tobo'o, “Maroba ite alau moi dipoa.”

³⁶Tobo'o teminggea tun dau'o lajau alau ngen mbin Yesus serto ngen tobo'o lem biduk neak ipe Yesus bi temot, ngen biduk-biduk de luyen temotoa Si.

³⁷Lajau ngamukba ibut de kembiak lai ngen umbok nyembua masuk moi lembiduk, sehinggo biduk'o muloi penuak ngen bioa.

³⁸Pado waktau'o Yesus dong tidua neak belakang makei tikea, lajau murid-murid-Ne geminggut Si ngen madeak ngen Si, “Gu'au, Ko coa dulai amen ite binaso?”

³⁹Si lajau kelongon, semgok ibut'o ngen madeak ngen daneu'o, “Diem! Bedanba!” Lajau ibut'o bedan ngen daneu'o jijai tenang.

⁴⁰Lajau Yesus madeak ngen tobo'o, “Getai udi kebiak saben? Getai udi coa masai?”

⁴¹Tobo'o jijai kembiak saben ngen madeak suang tun ngen de luyen, “Api sebeneane tun yo, sehinggo ibut ngen daneu taat ngen-Si?”