Read Rejang MARKUS 5 Bible Online

MARKUS 5 - Rejang bible

MARKUS 5

¹Lajau sapei ba tobo'o moi dipoa Daneu Galilea, neak daerah tun Gerasa.

²Tembei bae Yesus tu'un kunei biduk tekoba tun de pasuk roh kidek kunei kubua magea Si.

³Tun'o tinggea neak rogok kubua o ngen coa ade dikup tun igai de sanggup meketne, walaupun ngen ratoi,

⁴kerno bi awit Si neket ngen ratoi, tapi ratoi'o nutusne peketne o de natiakne, sehinggo coa ade tun de cukup kuet utuk jeminokne.

⁵Lueng kelmen Si rundo neak kubua ngen neak tebo-tebo samo menggang ngen mokoa diraine ngen butau.

⁶Waktau si kemliak Yesus kunei uak, melilai ba si teko mageane lajau nyembeak-Ne.

⁷Ngen lek si menggang, “Jano urusannu ngen uku, hoi Yesus, Anok Allah gi maho lekat? Demi Allah, jibeak sikso uku!”

⁸Kerno ayokne Yesus madeak ngen si, “Hoi ko roh kidek, kulea kunei awok tun'o!”

⁹Sudo'o Yesus temnai ngen tun o, madeak ngen tun'o, “Api ngen nu?” Jawabne, “Legion, kerno keme dau.”

¹⁰Si minoi ngen Yesus supayo jibeak musir tobo'o keluea kunei daerah'o.

¹¹Neak li'ing tebo'o dau nien jauak gidong mesoa upan.

¹²Lajau Roh-roh'o minoi ngen Si, nadeak tobo'o, “Meluakba keme baliak moi lem jauak-jauak'o, kunyauba keme masukne.”

¹³Yesus kemabul kinoi tobo'o. Lajau, kelueaba roh-roh kidek'o ngen masuk moi lem awok jauak-jauak'o. Kaben jauak de kiro-kiro dua ribau jumlahne'o, tejun kunei tebing moi lem daneu ngen matei.

¹⁴Mako ngacapba Penjago-penjago jauak'o ngen cemrito hal'o neak kota ngen neak sadei-sadei sekelilingne lajau kelueaba tun utuk kemliak jano de jijai.

¹⁵Tobo'o teko ngen Yesus ngen kemliak tun de pasuk roh kidek o temot. Si bi makei keracok ngen waras, tobo'o kutene saben.

¹⁶Tun-tun de kemliak suang hal'o cemrito ngen tobo'o tetang jano de tejijai ngen tun de pasuk roh kidek o ngen tetang jauak-jauak'o.

¹⁷Lajau tun-tun o muloi demsok Yesus supayo Si teminggea daerah tobo'o.

¹⁸Waktau Yesus Kemnek igai neak lem biduk, tun de nanone pasuk roh kidek o minoi, supayo Si nlueak temotoa-Ne.

¹⁹Yesus coa mizinne, tapi Si madeak magea tun'o, “Belekba moi dasei nu, ngen tun-tun do sadei nu, ngen melei namenba ngen tobo'o kute de nea Tuhan ngen ko ngen awei ipe Si bi mengasihi ko!”

²⁰Tun'o kulo lalau ngen muloi melei namen neak daerah puluak kota kute de nea Yesus das diraine ngen tobo'o kutene jijai kanjet.

²¹Sesudo Yesus nyebe'ang igai ngen biduk, tun dedau teko lajau ngelumbung Si. Sementaro Si neak biding daneu.

²²Tekoba su'ang pemipin umeak semyang genne Yairus. Ketiko si kemliak Yesus, sujud ba si neak adep kekea-Ne.

²³Ngen minoi ngen Si, “Anok selaweiku dong bolon, gesea ninggea, tekoba kirone ngen mpekba tangen-Nu dasne, supayo si selamat ngen tetep idup.”

²⁴Lajau lalauba Yesus ngen tun'o. Tun dau beroron temotoa Si ngen dedesok neak pa'ok-Ne.

²⁵Adeba neak di suang selawei bi duai belas taun bolon. Olon pendarahan.

²⁶Si bi awit nubet ngen dau dokter de luyen, sehinggo bi abis kute de ade ngen si, tapi samo sekilai coa ka'en, tapi sebelekne keadaanne tambeak bea.

²⁷Si bi temi'uk bito tetang Yesus, mako neak tengeak-tengeak tun dau'o si ma'ok Yesus kunei belakang ngen megong jubah-Ne.

²⁸Sebab nadeakne, “Asal kumegong bae jubah-Ne, uku bakea ka'en.”

²⁹Seketiko o kulo ka'enba olonne o ngen Si meding bahwo awokne bi ka'en kunei olonne.

³⁰Waktau'o kulo Yesus namen bahwo awei ade tenago de keluea kunei dirain-Ne, lajau Si belek igai neak tengeak tun dau ngen temnai, “Api de gemindoa jubah-Ku?”

³¹Murid-murid-Ne jmawab, “Ko kemliak awei ipe tun-tun yo dedesok pa'ok-Nu, ngen Ko temnai: Api de gembindoa Uku?”

³²Lajau Si demnong rogok-Ne utuk kemliak api de menea hal'o.

³³Selawei o, de jijai saben ngen gemtea waktau namen jano de tejijai ngen diraine, teko ngen sujud neak adep Yesus, melei namen ngen Si kute de tejijai.

³⁴Lajau Yesus madeak ngen selawei'o, “Hoi anok-Ku, imennu bi semlamatko. Lalauba ngen damoi ngen ka'en kunei olonne!”

³⁵Ketiko Yesus masiak miling tekoba tun kunei keluargo pemimpin umeak semyang'o ngen madeak, “Anoknu bi ninggea, utuk janoko masiak semaro gu'au?”

³⁶Tapi Yesus coa dulai kecek tobo'o madeak ngen pemipin umeak semyang, “Jibeak saben cayo bae!”

³⁷Lajau Yesus coa meluak dikup tun milau, kecuali Petrus, Yakobus ngen Yohanes, pasuak Yakobus.

³⁸Tobo'o sapei neak umeak pemimpin umeak semyang, neak di kenliakne tun-tun gu'ok, ngindoi ngen sedingen ngen saei nyaing.

³⁹Sesudo'o masuk Si madeak ngen tun-tun'o, “Genne udi gu'ok ngen ngindoi? Anok yo coa matei, tapi tidua!”

⁴⁰Tapi tobo'o temawai Si. Mako kute tun'o neluakne keluea lajau mbin-Ne bapok ngen indok anok'o serto tobo'o de samo ngen Si masuk moi bilik anok'o.

⁴¹Lajau negong-Ne tangen anok'o. Nadeak-Ne, “Talita Kum,” taine, “Hoi anok selawei, Uku madeak ngen ko, kelongonba!”

⁴²Seketiko o kulo anok'o kelongon ngen paneu kerno omorne bi duai belas taun. Kute tun de ade neak di kembiak kanjet.

⁴³Ngen Yesus pesen ngen tobo'o supayo jibeak dikup tun namen hal'o. Lajau Si meluak tobo'o melei anok'o mukmei.