Read Rejang MARKUS 6 Bible Online

MARKUS 6 - Rejang bible

MARKUS 6

¹Sesudo'o Yesus berakat kunei di ngen sapei neak penan asal-Ne, gidong murid-murid-Ne temotoa Si.

²Waktau bilai sabat si muloi majea neak umeak semyang ngen dau tun takjub temi'uk-Ne ngen madeak, “Kunei ipe Si dapet hal-hal'o? Hikmat jano de nelei ngen-Si? Awei ipe Si dapet menea mujizat-mujizat?

³Si dio anok tukang kieu, anok Maria, ngen pasuak Yakobus, Yoses, Yudas ngen Simon? Iso pasuak-pasuak-Ne de selawei ade neak yo besamo ite?” Lajau tobo'o coa temimo Si.

⁴ Sudo'o Yesus madeak ngen tobo'o, “Suang nebai nego neak ipe bae, kecuali neak penanne suang, neak antaro keluargone ngen neak umeakne.”

⁵Si coa dapet menea mujizat neak di, kecuali kema'en kekedaw tun bolon ngen meletok tangen-Ne neak das tobo'o.

⁶Si meraso sele kerno tobo'o coa masai. Lajau Yesus paneu keliling kunei sadei moi sadei samo ngajea.

⁷Si menok keduai belas murid o ngen muloi mbo tobo'o de duai. Si melei tobo'o kuaso das roh-roh kidek.

⁸ Ngen pesen ngen tobo'o jibeak mbin jano-jano neak lem pemanew tobo'o, kecuali tobo'o bae, ruti jibeak, katung ibet kulo jibeak, caci lem katung jibeak kulo nembin,

⁹buliak makei alas kekea, tapi jibeak mbin duai bajau.

¹⁰Nadeak-Ne igai ngen tobo'o, “Amen neak do penan udi masuk moi lem do umeak, tinggea ba neak di sapei udi berakat kunei penan'o.

¹¹Amen ade do penan de coa lok temimo udi ngen coa lok temi'uk udi, kelueaba kunei di ngen kenibasba debu de neak kekeanu sebagai peringatan utuk tobo'o.”

¹²Lajau lalauba tobo'o melei namen bahwo tun harus tobat,

¹³ Ngen tobo, o musir dau roh kidek, ngen melomok dau tun bolon ngen minyok ngen kema'en tobo'o.

¹⁴ Rajo Herodes kulo temi'uk tetang Yesus, sebab genne bi tenamo ngen tun madeak, “Yohanes Pembaptis bi idup igai kunei antaro tun matei ngen do'oba sebabne kuaso-kuaso'o bekerjo neak lem Si.”

¹⁵Tun luyen igai madeak, “Si'o Elia!” De luyen igai madeak, “Si'o suang nebai samo awei nebai-nebai bel'o.”

¹⁶Waktau Herodes temi'uk hal'o, Si madeak, “Iso, Si'o Yohanes gi sudo Uku motongulau ne, ngen de idup igai.”

¹⁷ Sebab Herodes ba gi meluak tun temakep Yohanes ngen mbelenggaune neak penjaro berhubung ngen peristiwo Herodias, ngenyan Filifus pasuakne, kerno Herodes de ngemok si sebagoi ngenyan.

¹⁸Kerno Yohanes berkilai-kilai temgua Herodes, “Coa buliak ko mok ngenyan pasuaknu!”

¹⁹Kerno, o Herodias dendem ngen Yohanes ngen beniat utuk munuak si, tapi coa dapet,

²⁰Kerno Herodes segan ngen Yohanes kerno si namen, bahwo Yohanes tun de benea ngen sucai, jijai si ngelindungne. Tiep kilai si temi'uk Yohanes, ateine jijai ragau, tapi si masai riang kulo temi'uk'o.

²¹Akherne ade kulo kesepatan de baik utuk Herodias, waktau Herodes ulang tahunne made pesta utuk pejabet-pejabetne, perwira-perwirane ngen tun-tun terkenal neak Galilea.

²²Waktau'o anok selawei Herodias lalau moi muko lajau na'ai, ngen si semnang atei Herodes ngen tamu-tamune. Herodes madeak ngen semulen'o, “Minoiba jano bae de kenloknu, mako bakea nelei ngen ko!”

²³Lajau Herodes bejanjai ngen si, “Jano bae de ko minoi bakea uku melei ngen ko, kunyau tengeak kunei kerajaanku!”

²⁴Anok'o lalau ngen temnai indokne, “Jano de harus uku minoi?” Jawab indokne, “Ulau Yohanes Pembabtis!”

²⁵Lajau si gegulut masuk madep rajo ngen minoi, “Uku lok, supayo uyo kulo ko melei ngen uku ulau Yohanes Pembatis neak das talam!”

²⁶Lajau kembiak ibo ba atei rajo, tapi kerno janjaine ngen kerno tamu-tamune si coa lok temulok.

²⁷Rajo segro meluak suang tun algojo ngen periteak supayo mok ulau Yohanes Pembaptis. Tun'o lalau ngen motong ulau Yohanes Pembaptis neak penjaro.

²⁸Si mbin ulau'o neak debueak talam lai ngen neleine ngen semulen'o ngen semulen o melei kulo ngen indokne.

²⁹Ketiko murid-murid Yohanes temi'uk hal'o tobo'o teko mok mayitne, lajau gemuling neak lem kubua.

³⁰Sesudo'o rasul-rasul'o belek igai belungguk ngen Yesus ngen melai namen ngen-Si kute de tobo'o kemerjo ngen tobo'o najea.

³¹Lajau Yesus madeak ngen tobo'o, “Maroba ite moi penan de sunyai, supayo ite suang, ngen bedan tegoa!” Sebab awei'o daune tun teko ngen lalau, sehinggo mukmei bae tobo'o coa telalau.

³²Mako tobo'o berakat ngen biduk moi penan de sunyai.

³³Tapi waktau tobo'o berakat dau tun kemliak tobo'o ngen namen maksud tobo'o. Ngen mok dalen da'et segroba teko tun kunei kute kota moi penan'o sehinggo de mute tobo'o.

³⁴Ketiko Yesus tu'un kunei biduk, Si kemliak tun dau belugguk, mako tegerokba ateine ngen asai ibo ngen tobo'o. Kerno tobo'o awei bebirai de coa temuan gembala. Lajau muloiba Si majea dau hal ngen tobo'o.

³⁵Pado waktau mulei kelmen, tekoba murid-murid-Ne ngen-Si madeak, “Penan yo sunyai ngen bilai muloi kelemen.

³⁶Meluakba tobo'o lalau moi kapung-kapung ngen sadei rogok yo kunyau tobo'o dapet temukua kembuk utuk tobo'o.”

³⁷Tapi Yesus jemawab-Ne, “Udi harus melei tobo'o mukmei!” Nadeak tobo'o ngen-Si, “Jijai harusba keme lalau temukua ruti gone duai otos dinar utuk melei tobo'o mukmei?”

³⁸Tapi Si madeak ngen tobo'o, “Kedau ruti de ade ngen udi? Cuboba perikso!” Sesudo Si namen tobo'o madeak, “Lemo ruti ngen duai kan.”

³⁹Lajau Yesus meluak tun-tun'o, supayo kute temot bekelopok-kelopok neak das dukut ijo.

⁴⁰Tobo'o lajau temot bekelopok-kelopok, ade de sotos, ade de lemo puluak tun.

⁴¹Sesudo mok lemo ruti ngen duai kan'o, Yesus nanggeak moi lenget ngen mucep syukur, lajau mecuak ruti'o ngen magiakne ngen murid-murid-Ne, supayo nagiak ngen kute tun o; sesudo'o Si magiak ke duai kan'o ngen tobo'o kute.

⁴²Lajau tobo'o kutene mbuk sapei kenyang.

⁴³Sudo'o tun melungguk tieak-tieak ruti sekedau duai belas bokoa penuak ngen tieak-tieak kan.

⁴⁴De milau mbuk ruti'o ade lemo ribau tun semanei.

⁴⁵Sesudo'o Yesus segro demsok murid-murid-Ne kemnek moi biduk ngen berakat lebiak dute moi dipoa, moi Betsaida, sementaro'o Si meluak tun dau'o belek.

⁴⁶Sesudo Si ce'ei kunei tobo'o, Si lalau moi tebo utuk bedu'o.

⁴⁷Waktau bilai bi kelemen biduk'o sudo neak tengeak daneu, gidong Yesus tinggea suang neak daet.

⁴⁸Waktau Si kemliak kebiak sarone tobo'o ngayuak kerno ibut lai mako kekiro jam telau kelmen Si teko ngen tobo'o paneu neak das bioa ngen Si lok melitas tobo'o.

⁴⁹Waktau tobo'o kemliak Si paneu neak das bioa, tobo'o sako bahwo Si adeba atau, lajau tobo'o menggang.

⁵⁰Sebab tobo'o kute kemliak Si ngen tobo'o kulo kembiak kanjet. Tapi segro Si madeak ngen tobo'o, “Tenangba! Uku yo, jibeak saben!”

⁵¹Lajau Si kenek moi biduk magea tobo'o, ngen ibut kulo bedan. Tobo'o kembiak cengang ngen bingung,

⁵²tobo'o ati kulo ngertai kunyau ayokne bi kemliak mujizat tetang ruti, atei tobo'o coa masai.

⁵³Sapeine neak dipoa Yesus ngen murid-murid-Ne bedan neak Genesaret.

⁵⁴Waktau tobo'o keluea kunei biduk, tun segro kemnal Yesus.

⁵⁵Lajau ngacapba tobo'o moi kute daerah'o ngen muloi musung tun-tun bolon neak das tikeane moi ipe bae tobo'o temi'uk Yesus berade.

⁵⁶Moi ipe bae Si lalau, moi sadei-sadei, moi kota-kota ngen moi kapung-kapung, tun meletok tun-tun bolon neak pasar minoi ngen Si, supayo tobo'o buliak gemindoa kunyau ujung jubahne bae. Kute tun de gemindoane jijai ka'en.