Read Rejang MARKUS 7 Bible Online

MARKUS 7 - Rejang bible

MARKUS 7

¹Pado suatau kilai tun-tun Farisi ngen kekedau gu'au-gu'au agamo kunei Yerusalem teko magea Yesus.

²Tobo'o kemliak bahwo kekedau tun murid-Ne mukmei ngen tangen de najis, adeba tangen de coa nepuk.

³Sebab tun-tun Farisi awei tun-tun Yahudi luyenne coa mukmei amen coa mpuk tangen ngen cao tertentu, kerno tobo'o bepegang pado adat istiadat ninik puyang tobo'o.

⁴Ngen amen belek kunei pasar tobo'o kulo coa mukmei amen coa lebiak dute mpuk diraine. Dau adat istiadat luyen igai de tobo'o pegong, umpamone hal mpuk caker, ngen pekakas-pekakas tembago.

⁵Kerno o tun-tun Farisi ngen gu'au-gu'au agamo'o betanye ngen Yesus, “Getai murid-murid-Nu coa idup temotoa adat istiadat ninik puyang te, tapi mukmei ngen tangen najis?”

⁶ Jawab-Ne ngen tobo'o, “Tepat nien de nea Yesaya tetang udi, hoi tun-tun munafik! Awei ade tetulis: Bangso yo mujai Uku ngen bibiane, padohal ateine uak kunei-Ku.

⁷Percuma tobo'o semyang ngen-Ku. Kerno ajaran de tobo'o najea adeba periteak manusio.

⁸Periteak Allah udi coa demulai, ngen adat istiadat manusio udi pegong.”

⁹“Yesus madeak kulo ngen tobo'o kembiak pacok udi teminggea periteak Allah, kunyau udi dapet miaro adat istiadat suang.

¹⁰ Kerno Musa bi madeak: ‘Hormatba ngen tiak nu ngen indok nu,’ ngen: ‘Api de kemutuk tieakne atau indokne harus matei.’

¹¹Tapi udi madeak: Amen suang tun medeak ngen tieakne atau indokne: ‘Jano de ade padoku, de dapet genuno utuk murusnu, sudo genuno utuk kurban adeba persembahan ngen Allah,’

¹²mako udi coa munyaune igai nea sesuaktau utuk tieak ngen indokne.

¹³Ngen awei yo firman Allah udi madeak coa belakau utuk adat istiadat de udi temotoa o. Masiak dau igai hal luyen de udi nea.”

¹⁴Lajau Yesus manggea igai tun dau ngen madeak ngen tobo'o, “Udi kute, teni'uk ba kunyau ngertai.

¹⁵Jano bae kunei luea de masuk moi lem awok suang tun, coa dapet menea tun'o najis, tapi jano de keluea kunei awokne, do'oba de jijai najis. [

¹⁶Api temuan ti'uk utuk temi'uk kenlok ba si temi'uk.]”

¹⁷Sesudo Si masuk moi debuak umeak utuk nyikir kunei tun dau, murid-murid-Ne temnai ngen-Si tetang tai perumpamo'o.

¹⁸Mako jawab-Ne, “Jano udi kulo coa dapet paham? Coa namenba udi bahwo kute sesuatau kunei luea de masuk moi lem awok suang tun coa dapet nea najis?

¹⁹Kerno iso masuk moi lem atei tapi moi lem teneine, lajau nuang neak kakus.” Ngen aweiyo Si madeak kute kembuk halal.

²⁰Nadeak-Ne igai, “Jano de keluea kunei awok suang tun do'oba de jijai najis.

²¹Sebab kunei lem, kunei atei tun, timboa kute pekeran kidek, perzinahan, maling, pembunuhan,

²²Perzinahan, tamak, kajahatan, licik, ngike, coa sopan, iri atei, ombong, saro najea.

²³Kute hal-hal kidek yo tiboa kunei lem de jijai tun najis.”

²⁴Lajau Yesus berakat kunei di ngen lalau moi daerah Tirus. Si masuak moi debuak umeak ngen coa lok bahwo ade tun de namen, tapi Tekone Si coa dapet nunyin.

²⁵Su'ang mbei, de anokne selawei pasuk roh kidek, segro temi'uk tetang Si, lajau teko ngen sujud neak adep kekea-Ne.

²⁶Selawei'o su'ang tun Yunani bangso Siro-Fenisia. Si minoi ngen Yesus utuk musir semat'o kunei anokne.

²⁷Lajau Yesus madeak ngen si, “Kunyau ba anok-anok keyang kileak, sebab coa patut mok ruti de semiyap utuk anok-anok ngen melukne ngen kuyuk.”

²⁸Tapi selawei'o jemawab, “Benea, Tuhan. Tapi kuyuk de neak beak mija kulo mbuk tieak-tieak kembuk de cenucia anok-anok.”

²⁹Mako Yesus madeak ngen selawei'o, “Kerno kecek-kecek nu'o, lalauba uyo sebab semat'o bi keluea kunei anok nu.”

³⁰Selawei, o belek moi umeak ne, lajau temaune anok'o teguling neak penan tidua, ngen semat'o bi keluea.

³¹Sesudo'o Yesus teminggea igai daerah Tirus ngen melitas Sidon lalau moi Daneu Galilea, melitas daerah puluak kota.

³²Neak di tun mbin ngen-Si suang tun de sti'uk ngen de setagea minoi ngen Si, supayo mpek tangen-Ne neak das tun'o.

³³Sesudo Yesus cem'ei Si kunei tun dau, sehinggo tobo'o suang, Si mpek jiai-Ne moi ti'uk tun'o, lajau Si temkek ngen mabo dileak tun'o.

³⁴Sesudo'o samo nanggea moi lenget Yesus mok nyabai madeak ngen Si, “Efata,” taine, “Tukokba!”

³⁵Mako tukokba ti'uk tun'o ngen seketiko o dileakne jijai ka'en, lajau Si miling ngen baik.

³⁶Yesus pesen ngen tun-tun de ade neak di supayo jibeak cemrito ngen api bae. Tapi tambeak temgeak, tambeak tobo'o cemritone.

³⁷Tobo'o kebiak takjub ngen madeak, “Si jemijai kekutene baik, de seti'uk neane temi'uk, de bisau neane miling.”