Read Rejang MARKUS 8 Bible Online

MARKUS 8 - Rejang bible

MARKUS 8

¹Pado waktau'o ade igai tun dau sekilai jumlahne, kerno tobo'o coa temuan kembuk, Yesus medeu murid-murid-Ne ngen madeak:

²“Atei-Ku tegerok ngen selen ngen tun dau yo. Kerno bi telau bilai tobo'o temotoa Uku ngen tobo'o co a temuan kembuk.

³Amen Uku meluak tobo'o belek moi umeakne ngen kenyemen, tobo'o bakea ubuak neak dalen, sebab ade de teko kunei ku'uak.”

⁴Murid-murid-Ne jemawab, “Awei ipe neak penan de sunyai yo tun dapet melei tobo'o ruti sapei kenyang?”

⁵Yesus betanye ngen tobo'o, “Kedau ruti de ade ngen udi?” Tobo'o jemawab, “Tujuak.”

⁶Lajau Si meluak tun dau'o temot neak pitok. Sesudo'o Si mok tujuak ruti'o, mucep syukur, megit ruti'o ngen tangen-Ne magiakne ngen murid-murid-Ne utuk nagiakne, tobo'o meleine ngen tundau.

⁷Tobo'o kulo temuan kekedau kan, sesudo mucep syukur ngen Allah Si meluak supayo kan'o kulo nagiak ngen tun dau'o.

⁸Ngen tobo'o mbuk ruti sapei kenyang. Sesudo'o tun melungguk tieak-tieak ruti, sekedau tujuak bokoa.

⁹Tobo'o ade kekiro patribau tun. Lajau Yesus meluak tobo'o belek.

¹⁰Si segro kenek moi biduk ngen murid-murid-Ne lalau moi daerah Dalmanuta.

¹¹ Lajau timboa ba tun-tun Farisi ngen muloi bedebat ngen Yesus. Utuk cemubo Si tobo'o minoi kunei-Si do tando kunei surgo.

¹²Mako ngeluhba Si lem ateine ngen madeak, “Getai tun-tun jaman yo minoi tando? Uku madeak ngen udi, sesungguakne ngen tun jaman yo dedebat coa bakea nelei tando.”

¹³Si teminggea tobo'o; Si kenek kulo moi biduk ngen lalau moi dipoa.

¹⁴Murid-murid Yesus coa tinget mbin ruti, kecuali do ruti bae de ade ngen tobo'o lem biduk.

¹⁵ Lajau Yesus melei peringatan ngen tobo'o, nadeak-Ne, “Bejago-jagoba ngen teatei te adep agai tun Farisi ngen agai Herodes.”

¹⁶Mako tobo'o bepeker-peker ngen suang madeak, “Neak antaro tobo'o bahwo tobo'o coa temuan ruti.”

¹⁷Waktau Yesus namen jano de tobo'o madeak, Si madeak, “Getai udi madeak sual coa ade ruti? Ati kulo udi namen ngen ngertai? Bi katubba otoknu?

¹⁸ Udi temuan matai, coaba udi kemliak ngen udi temuan ti'uk, coaba udi temi'uk? Coaba udi coa inget igai.

¹⁹Pado waktau Uku megit lemo ruti utuk lemo ribau tun'o, kedau bokoa penuak tieak-tieak ruti udi nelungguk?” Tobo'o jemawab, “Duai belas bokoa.”

²⁰“Pado waktau tujuak ruti utuk pat ribau tun'o, kedau bokoa penuak tieak-tieak ruti udi nelungguk?” Tobo'o janawab, “Tujuak bokoa.”

²¹Lajau nadeak Yesus ngen tobo'o, “Masiak udi ati ngertai?”

²²Sesudo'o sapei ba Yesus ngen murid-murid-Ne neak Betsaida. Neak di tun mbin ngen Yesus su'ang tun sutai ngen tobo'o minoi ngen-Si supayo Si gemindoane.

²³Yesus megong tangen tun sutai'o ngen mbin si moi luea sadei. Lajau Si temkek matai tun'o ngen mpek tangen-Ne dasne, ngen betanye, “Sudoba ko kemliak sesuaktau?”

²⁴Tun'o kemliak moi muko, lajau madeak, “Uku kemliak tun kerno kemliak tobo'o paneu, tapi ketenne awei pun-pun.”

²⁵Yesus mpek igai tangen-Ne moi matai tun, o, mako tun'o benea-benea ngeliak ngen bika'en, sehinggo si dapet ngeliak kute sesuatau ngen jelas.

²⁶Sesudo'o Yesus meluak si belek moi umeakne ngen madeak, “Jibeak masuk moi sadei!”

²⁷Sesudo'o Yesus ngen murid-muridne berakat moi sadei-sadei neak rogok Kaisarea Filifi. Neak tengeak dalen Si temnai ngen murid-murid-Ne, nadeak-Ne, “Nadeak tun, api Uku yo?”

²⁸ Tobo'o jemewab, “Ade de madeak: Yohanes Pembaptis, ade kulo de madeak: Elia, ade kulo de madeak: Suang kunei paro nebai.”

²⁹ Yesus temnai ngen tobo'o, “Tapi temurut ko, api Uku yo?” Mako Petrus jamawab, “Ko adeba Mesias!”

³⁰Lajau Yesus temgeak tobo'o ngen tegas supayo jibeak melei namen ngen api bae tetang Si.

³¹Sesudo'o muloiba Yesus majea ngen tobo'o bahwo Anok Manusio harus temanggung dau derito ngen tenulok ngen tetuai, imem-imem kepalo ngen gu'au-gu'au agamo, lajau nunuak ngen idup igai sesudo telau bilai.

³²Hal yo de nadeak-Ne ngen terus te'ang. Tapi Petrus seme'et Yesus moi biding ngen temgua Si.

³³Mako muang papeaba Yesus ngen samo kemliak murid-murid-Ne Si mengiak Petrus, nadeak-Ne, “Lalauba Iblis, sebab ko iso meker jano de neker Allah, seluyen jano de neker manusio.”

³⁴ Lajau Yesus menok tun dau ngen murid-murid-Ne, madeak ngen tobo'o, “Ti'ep tun de lok motoa Uku, si harus coa makau diraine, musung salibne ngen motoa Uku.

³⁵ Kerno api de lok semlamat nyabaine, sibakea nyep nyabaine; tapi api bae nyep nyabaine kerno Uku ngen kerno Bito Baik, si bakea semlamatne.

³⁶Jano gunone su'ang tun dapet kute dunio, tapi nyabaine nyep.

³⁷Kerno jano de dapet neleine sebagoi gitei nyabaine?

³⁸Kerno api bae selek kerno Uku ngen kerno kecek-Ku neak tengeak-tengeak jaman tun-tun uyo de coa setia ngen beduso yo, Anok Manusio kulo bakea selek kerno tun'o amen Si teko be lem kemulioan Bapa-Ne besamo malaikat-malaikat sucai.”