Read Rejang LUKAS 12 Bible Online

LUKAS 12 - Rejang bible

LUKAS 12

¹ Beribau tun dedesok sapei ade de tekelat kekeane. Sementaro tun-tun o belungguk, Yesus madeak ngen penotoa-penotoa-Ne, “Atei-ateiba te'adep agai tun Farisi, maksud-Ku, tobo'o munafik.

² Coa ade de coa keten, ngen coa ade de resio de coa bakea nukea.

³Kerno o jano de udi nadeak lem kelem bakea teti'uk lem te'ang, ngen jano de udi misik moi ti'uk neak lem kamar bakea nelei namen kunei das atep umeak.”

⁴“Uku madeak ngen udi, hoi kekuat-Ku, jibeakba udi saben te'adep tobo'o de dapet munuak awok ngen sesudo'o coa dapet menea jejano igai.

⁵Uku bakea temunjuk ngen udi api de harus udi saben. Sabenba Si, de sesudo munuak, temuan kuaso utuk mbin tun moi lem nerako. Sesungguakne Uku madeak ngen udi, sabenba Si!

⁶Lemo likup burung pipit jenuoa, go duai matai caci de kembiak titik. Kunyau awei o coa dikup kulo de coa tinget Allah.

⁷Buk neak ulau nu sudo nitung kutene, sebab o jibeakba saben; udi uak lebiak bego kunei burung-burung pipit!”

⁸“Uku madeak ngen udi: Tetiep tun de makau Uku neak muko manusio, Anok Manusio kulo bakea makau si neak adep malaikat-malaikat Allah.

⁹Tapi api muker Uku neak adep manusio, si bakea mukerne neak adep malaikat-malaikat Allah.

¹⁰ Tetiep tun de miling melawen Anok Manusio, si bakea napun; tapi barang api mino Roh Allah, si coa bakea napun.

¹¹ Amen udi nembin moi umeak-umeak semyang utuk nadea neak adep pemeriteak atau penguaso, jibeakba kuatir tetang awei ipe udi harus mbela dirai atau tetang jano de harus udi madeak.

¹²Sebab waktau'o kulo Roh Allah bakea majea udi jano de harus udi madeak.”

¹³Suang kunei tun dau o madeak ngen Yesus, “Gu'au, nadeakba ngen pasuakku supayo si magiak warisan ngen uku.”

¹⁴Tapi Yesus madeak ngen si, “Hoi udi, api de bi maket Uku jijai hakim atau tukang magiak warisan antaro udi beduai?”

¹⁵Sesudo'o, ngen kute tun de ade neak di Yesus madeak, “Atei-ateiba ngen waspadaba, jibeak sapei udi tamak. Sebab idup manusio coa tegatung kunei hokne, kunyau hokne kembiak dau.”

¹⁶Sesudo'o Yesus madeak ngen tobo'o do perumpamo, Si madeak, “Ade suang kayo, taneakne kembiak dau asea ne.

¹⁷Si temnai lem ateine: ‘Jano de harus uku menea, sebab uku coa temuan penan neak ipe uku dapet ma'ik asea taneakku.’

¹⁸Lajau nadeakne: ‘Uku bakea melu'at tuoa-tuoaku ngen uku bakea temje de lebiak lai ngen uku bakea ma'ik neak lemne kute gelpung ngen barang-barangku.

¹⁹Sesudo'o uku bakea madeak ngen diraiku suang, ko ade dau barang, tetimbun utuk beta'un-ta'un anne; istirahatba, mukmeiba, menemba ngen beriang-riangba!’

²⁰Tapi firman Allah ngen si: ‘Hoi udi tun bodong, pado kelmen yo kulo jiwonu bakea nemok kunei ko, ngen jano de bi ko seniap, utuk api?’

²¹Awei o kulo jijaine ngen tun de kemopoa hok bagiak diraine suang, amen si coa kayo neak adep Allah.”

²²Yesus madeak ngen penotoa-penotoa-Ne, “Kerno o Uku madeak ngen ko, ‘Jibeakba kuatir ngen idupnu, bakea jano de lok udi mbuk, ngen jibeakba kuatir kulo ngen awoknu, bakea jano de lok udi makei.’

²³Sebab idup o lebiak peting kunei pado kembuk ngen awok o lebiak peting kunei pado bajau.

²⁴Kenliakba burung-burung gagak! Tobo'o coa temanem, coa panen, coa kulo temuan gudang atau tuoa. Tapi Allah semido tobo'o! Ko uak lebiak bego kunei burung-burung!

²⁵Api neak antaro udi de kerno kuatirne dapet temambeak omor panjang lem idupne?

²⁶Jijai, amen udi coa sanggup menea barang de kembiak titik, getai udi kuatir ngen hal-hal luyen?

²⁷ Kenliakba bungai-bungai bakung idup; bungai-bungai o coa bekerjo, coa kulo menea kain. Tapi Rajo Salomo de kembiak kayo kulo coa makei bajau de ba'esne serai ngen bungai-bungai o.

²⁸Jijai, amen dukut, de bilai yo ade ngen men nuang moi lem opoi awei o kulo nerias Allah, jano igai udi, hoi tun de ku'ang pecayo!

²⁹Jijai, jibeakba udi semoal jano de bakea udi mbuk ngen menem ngen jibeakba ateinu temes.

³⁰Kute o nesoa bangso-bangso neak dunio de coa kemnal Allah. Tapi Bapanu namen, bahwo udi memang perlu kutene o.

³¹Tapi nesoa ba Kerajaan-Ne, mako kutene o bakea tenambeak kulo ngen udi.”

³²“Jibeakba saben, hoi udi jumlahnu titik! Kerno Bapanu bi senang melei udi Kerajaan o.

³³Jenuoba kute hoknu ngen neleiba sedekeak! Meneaba bagiaknu dupet de coa dapet jijai tuai, do hok neak surgo de coa bakea abis, de coa dapet risau mokne ngen coa usak nembuk get.

³⁴Kerno neak ipe hoknu ade, neak di kulo ateinu ade.”

³⁵ “Bejago-jagoba madep tiep hal. Ko harus bogoa siap makei bajau ngen lapu nidup.

³⁶ Lokba udi serai awei tun-tun de mbot tuanne de belek kunei pesta nikeak, supayo amen si belek ngen kemtuk bang, segro nukokba bang bagiakne.

³⁷Bahagiaba pelayan-pelayan de tuanne kemliak bejago-jago waktau si teko. Uku madeak ngen udi: sesungguakne si bakea meket pinggangne ngen meluak tobo'o temot mukmei, ngen si bakea teko mlayan tobo'o.

³⁸Sungguak butungne pelayan-pelayan o amen tuan tobo'o kemliak tobo'o gidong siap mbot, kunyau si teko tengeak malem atau lebiak cendok kunei o!

³⁹ Tapi namenba dio: Amen tuan umeak namen jam kedau risau bakea teko, si coa bakea munyau umeakne nukok.

⁴⁰Lokba udi kulo siap sedio, kerno Anok Manusio teko pado saat de coa udi sako.”

⁴¹Petrus madeak, “Tuhan, keme de Ko maksud ngen perumpamo o atau kute tun?”

⁴²Jawab Tuhan, “Jijai, api pelayan umeak de setia ngen bijaksana de bakea naket tuanne jijai pemipin das kute pelayanne utuk melei kembuk ngen tobo'o pado waktaune?

⁴³Bahagiaba pelayan, de tuanne kemliak gidong maneu tugasne o, ketiko tuanne o teko.

⁴⁴Uku madeak ngen udi: Sesungguakne tuanne o bakea maket si jijai pengawas kute hokne.

⁴⁵Tapi, amen pelayan o kidek ngen madeak neak lem ateine: Tuanku coa teko, lajau si muloi mokoa pelayan-pelayan semanei ngen selawei, ngen mbuk menem sapei mabuk,

⁴⁶mako tuan pelayan o bakea teko pado bilai de coa ite sako, ngen pado saat de coa ite namen, ngen bakea munuak si ngen menea si senasib ngen tun-tun de coa setia.

⁴⁷Pelayan de namen kelok tuanne, tapi coa sesiap ngen coa menea kelok tuanne o, bakea nimbet ngen yes.

⁴⁸Tapi pelayan de coa namen kelok tuanne, sesudo'o menea sesuaktau de saleak sehinggo harus nimbet, bakea nimbet ngen didik bae. Sebab tun de sudo nelei dau, kunei padone bakea tenuntut dau kulo. Ngen tun de sudo pecayo, kunei padone bakea tenuntut dau kulo.”

⁴⁹“Uku teko utuk meluk opoi moi bumai ngen Uku kembiak ma'ep, opoi o bi idup!

⁵⁰ Uku harus temimo saro ngen atei-Ku kembiak ragau ayok o tejijai.

⁵¹Jano udi sako Uku teko moi dunio mbin damoi? Coa, iso damoi, tapi belawen.

⁵²Kerno muloi kunei uyo bakea ade selisiak antaro lemo tun neak lem do umeak, telau lawen duai ngen duai lawen telau.

⁵³ Bapok bakea mlawen anokne de semanei ngen anok semanei bakea mlawen bapokne. Indok mlawen anokne de selawei ngen anok selawei mlawen indokne. Indok setuang bakea mlawen setamangne de selawei ngen setamang selawei bakea mlawen indok setuangne.”

⁵⁴ Yesus madeak kulo ngen tun dau, “Amen udi kemliak mbun kenek neak depeak barat, segro udi madeak: ‘Bakea teko ujen,’ ngen hal o memang tejijai.

⁵⁵Amen udi meding ibut teko kunei Selatan, udi madeak, ‘Bakea panes,’ ngen benea-benea panes.

⁵⁶Hoi tun-tun munafik, rupo bumai ngen lenget udi namen menilaine, getai udi coa dapet menilai zaman yo?”

⁵⁷ “Getai udi suang kulo coa temtep jano de benea?

⁵⁸Sebab, amen udi ngen lawennu lalau madep pemeriteak, berusahoba bedamoi ngen si selamo neak tengeak dalen, supayo jibeak udi sene'etne ngen hakim lajau semreak udi ngen pembantune ngen pembantu o meting ngen moi lem penjara.

⁵⁹Uku madeak ngen udi: Ko coa bakea keluea kunei di, ayok udi masen utangnu sapei lunas.”