Read Rejang LUKAS 13 Bible Online

LUKAS 13 - Rejang bible

LUKAS 13

¹Pado waktau o tekoba ngen Yesus kekedau tun mbin bito tetang tun-tun Galilea, de daleakne cenapua Pilatus ngen daleak kurban de tobo'o sembeak.

²Yesus jemawab tobo'o, “Kerno tun-tun Galilea'o nunuak awei'o, udi sako do'o buktine tobo'o lebiak beduso kunei pado duso kute tun Galilea de luyen?

³Coa! Nadeak-Ku ngen udi. Tapi amen udi coa betobat, udi kute bakea benaso kulo, awei'o.

⁴Atauk delapen belas tun, de matei teninggang menara pa'ok Siloam, lebiak lai saleakne kunei saleak kute tun luyen de ade neak Yerusalem?

⁵Coa! Nadeak-Ku ngen udi. Tapi amen udi coa betobat, udi kute bakea benaso awei tobo'o.”

⁶Lajau Yesus madeak perumpamo yo, “Suang temuan pun ara de idup neak kebun anggurne, ngen si teko utuk mesoa bueak pun o, tapi si coa temau.

⁷Lajau si madeak ngen tukang kebun anggur o: ‘Sudo telau taun uku teko mesoa bueak pun ara yo ngen uku coa temau. Tembangba pun yo! Utuk jano si idup neak taneak yo ngen sesio!’

⁸Jawab tun o: ‘Tuan, kunyauba si idup taun yo igai, uku bakea makua taneak rogok yo ngen melei pupukne,

⁹mukin taun muko si bebuak; amen coa, tembangba pun o!’ ”

¹⁰Pado bilai Sabat Yesus ngajea lem saleak do umeak semyang.

¹¹Neak di ade suang selawei de bi lapen belas taun pasuk roh sehinggo si bolon sapei bukuk baune ngen coa dapet je igai ngen tegok.

¹²Ketiko Yesus kemliak selawei o, Yesus menok si, madeak ngen si, “Hoi indok, olonnu bi ka'en.”

¹³Lajau Si mpek tangen-Ne das selawei o, ngen ketiko o kulo je ba selawei o, ngen mujai Allah.

¹⁴ Tapi pemipin umeak semyang mengiak ngen Yesus kerno kema'en tun pado bilai Sabat, lajau si madeak ngen tun dau, “Ade num bilai utuk kerjo. Kerno o teko pado saleak do bilai o utuk kena'en ngen jibeak pado bilai Sabat.”

¹⁵Tapi Tuhan jemawab si, nadeak-Ne, “Hoi tun-tun munafik, iso tiep tun neak antaronu mpas sapaine atau keledaine pado bilai Sabat kunei kandangne ngen mbinne moi penan menem?

¹⁶Iso selawei yo, de sudo lapen belas taun neket Iblis, harus nelpas kunei peketne o, kerno si adeba royot Abraham?”

¹⁷Ngen waktau Si madeak awei yo, kute lawen-Ne meding selek ngen kute tun dau senang kerno kute pekaro mulio, de bi Si menea.

¹⁸Mako nadeak Yesus, “Umpamo jano hal Allah meriteak sebagai Rajo ngen jano Uku bakea mbandingne?

¹⁹Si umpamo soa sawi, de nemok ngen tembea tun neak kebunne; soa o idup ngen jijai pun ngen burung-burung neak lenget besa'ang pado dan-danne.”

²⁰Yesus madeak igai, “Ngen jano Uku bakea mbanding Allah meriteak sebagai Rajo?

²¹Si umpamo agai de nemok suang selawei lajau nulek moi lem pat puluak cupok gelpung, sapei kembang kutene.”

²²Sesudo'o Yesus paneu keliling kunei kota moi kota ngen kunei sadei moi sadei samo ngajea ngen temrus pemaneu-Ne moi Yerusalem.

²³Lajau ade tun temnai ngen Si, “Tuhan, jano tun de bakea senlamat didik?”

²⁴ Yesus jemawab ngen tun-tun neak di, “Berusahoba utuk masuk liwet bang de sepit. Sebab, inget! Dau tun berusaho masuk tapi coa dapet.

²⁵Amen tuan umeak bi klongon ngen bi kematup bang, udi bakea je neak luea ngen gemtuk bang samo madeak: ‘Tuan, nukokba keme bang!’ Ngen Si bakea jemawab ngen madeak ngen udi, ‘Uku coa namen kunei ipe udi teko.’

²⁶ Mako udi bakea madeak: ‘Keme bi mukmei ngen menem neak adep-Nu ngen Ko bi majea neak dalen-dalen kota keme.’

²⁷ Tapi Si bakea madeak ngen udi, ‘Uku coa namen kunei ipe udi teko. Lalauba kunei adep-Ku, hoi udi kutene de menea kejahatan!’

²⁸ Pado waktau udi kemliak Abraham, Ishak ngen Yakub serto kute nebai beriang neak lem Dunio blau Allah, udi bakea ngindoi ngen saro kerno udi suang nusir moi luea!

²⁹Tun-tun bakea teko kunei Timur ngen Barat, kunei Utara ngen Selatan, ngen bakea beriang neak lem Dunio Blau Allah.

³⁰ Sesungguakne, ade tun de kedong de bakea jijai tun dedute, ngen ade tun de dute de bakea jijai de kedong.”

³¹Pado waktau o teko kekedau tun Farisi ngen madeak ngen Yesus, “Lalauba, teninggeaba penan yo, kerno Herodes lok munuak Ko.”

³²Jawab Yesus ngen tobo'o, “Lalauba ngen nadeakba ngen tun de coa beguno o: Uku musir semat ngen kema'en tun, pado bilai yo ngen men, ngen pado bilai de ketelau Uku bakea selsei.

³³Tapi bilai yo ngen men ngen telang kedo Uku harus temrus pemaneu-Ku, sebab coa seharusne suang nebai nunuak amen coa neak Yerusalem.

³⁴Yerusalem, Yerusalem, udi de munuak nebai-nebai ngen meluk ngen butau tun-tun de nutus ngen udi! Belulang Uku indau kemopoa anok-anoknu, serai awei indok monok kemopoa anok-anokne neak beak sayepne, tapi udi coa lok.

³⁵ Sesungguakne umeaknu yo bakea teninggea ngen jijai sunyai. Tapi Uku madeak ngen udi: Ko coa bakea kemliak Uku igai sapei pado saat udi madeak, ‘Diberkatiba Si de teko lem gen Tuhan!’ ”