Read Rejang LUKAS 2 Bible Online

LUKAS 2 - Rejang bible

LUKAS 2

¹Pado waktau o Kaisar Agustus kemluea do periteak, meluak sensus kute tun neak dunio.

²Dioba sensus de pertamo kilai nea waktau Kirenius jijai Gubernur neak negrai Siria.

³Mako lalauba kute tun daftar dirai, neak tiep kotane.

⁴Yusuf kulo lalau kunei kota Nazaret neak Galilea moi Yudea, neak kota Daud de genne Betlehem, — kerno si asalne kunei keluargo ngen royot Daud.

⁵Si daftar berpok ngen Maria, tunanganne, de gidong tenei lai.

⁶Ketiko tobo'o neak Betlehem sapeiba waktaune bagiak Maria utuk melaher.

⁷Si melaher suang anok semanei, anokne de tuai, lajau nukusne ngen kain ngen nulikne neak lem palungan, kerno coa ade penan temalem utuk tobo'o.

⁸Pado malem o ade gembala-gembala de gidong jemago bebiraine neak padang dukut neak daerah o.

⁹Tetibo malaikat Tuhan kemten diraine ngen tobo'o, ngen cahayo te'ang kunei Tuhan besinea tem'ang tobo'o. Tobo'o kembiak saben.

¹⁰Tapi malaikat o madeak, “Jibeak saben! Sebab uku teko mbin Bito Baik utuk udi — bito de bakea menea kute tun senang.

¹¹Bilai yo bi laher utuk udi juruselamat, adeba Kristus, Tuhan, neak kota Daud.

¹²Dioba tandone: Ko bakea temau suang cupik de nukus ngen kain ngen nulik neak lem palungan.”

¹³Tetibo malaikat o senerto dau malaikat luyen, de mujai Allah. Tobo'o madeak,

¹⁴“Tepujaiba Allah neak lenget de kembiak lekat! Ngen neak das bumai, sejahteraba manusio de semnang atei Tuhan!”

¹⁵Sesudo'o malaikat-malaikat o teminggea tobo'o ngen belek moi surgo. Gembala-gembala o madeak suang ngen de luyen, “Maroba ite lalau moi Betlehem utuk kemliak jano de tejijai neak di, awei de nelei namen Tuhan ngen ite.”

¹⁶Lajau tobo'o gegulut berakat temau Maria, Yusuf ngen cupik o, de gidong gulek neak lem palungan.

¹⁷Ketiko gembala-gembala kemliak cupik o, tobo'o melei namen jano de bi nadeak ngen tobo'o tetang Anok o.

¹⁸Ngen kute tun de temi'ukne sele tetang jano de nadeak gembala-gembala o ngen tobo'o.

¹⁹Tapi Maria ma'ik kute pekaro o neak lem ateine ngen mekerne.

²⁰Gembala-gembala o samo mujai ngen mulio Allah kerno kute de tobo'o teni'uk ngen tobo'o kemliak, kutene sesuai ngen jano de bi nadeak ngen tobo'o.

²¹ Waktau genep lapen bilai, Anok o senunat. Si nelei gen Yesus, gen de senbut malaikat ayok Maria ngandung.

²² Sapeiba waktaune Yusuf ngen Maria maneu adat semucai tumurut ukum Musa. Jijai tobo'o mbin Anok o moi Yerusalem utuk senreak ngen Tuhan.

²³ Sebab neak lem Ukum Tuhan ade tetulis awei yo, “Tetiep anok semanei de tuai, harus senreak ngen Tuhan.”

²⁴Tobo'o kulo ade maksud semreak kurban, adeba setakin burung tekukur atau duai likup burung daro de u'ai, awei de tentau neak lem Ukum Tuhan.

²⁵Pado waktau o neak Yerusalem ade suang de genne Simeon. Si tun baik, de saben ngen Allah ngen gidong mbot saatne Allah semlamat Israel. Roh Allah semerto si,

²⁶ngen Roh Allah sudo melei namen ngen si, si coa bakea matei ayok kemliak Rajo Penyelamat de jenanjai Tuhan.

²⁷Simeon teko moi Umeak Tuhan ngen napeak Roh Sucai. Pado waktau o Yusuf ngen Maria mbin masuk Yesus, de masiak titik o utuk menea upacara de neriteak ukum agamo.

²⁸Simeon semambut Anok o ngen mikut-Ne, samo mujai Allah, nadeakne:

²⁹“Uyo, Tuhan, kunyauba hamba-Nu yo lalau lem damai sejahtera, sesuai ngen firman-Nu.

³⁰Sebab mataiku bi kemliak keselamatan de kunei pado-Nu,

³¹de bi Ko semiap neak adep kute bangso,

³² awei te'ang de tem'ang dalen bagiak bangso-bangso de luyen, ngen jemijai mulio bagiak umat-Nu, Israel.”

³³Bak serto indok Anok o kembiak sele ngen kute jano de nadeak tetang Si.

³⁴Lajau Simeon melei berkat tobo'o ngen madeak ngen Maria, indok Anok o, “Anok yo sudo niliak Allah utuk mukum ngen semlamat dau tun Israel. Si bakea jijai tando kunei Allah, de bakea tentang dau tun.

³⁵Amen awei yo tukokba isai atei tobo'o. Asai Ibo bakea cemcuk atei udi awei pedang de tajem.”

³⁶Neak di kulo ade Hana, suang nebai selawei, anok Fanuel kunei sukau Asyer. Si sudo kembiak tuai omorne. Sesudo nikeak si idup tujuak taun anne sesamo matenne.

³⁷Uyo si jando ngen omorne lapen puluak pat taun. Si coa perneak teminggea Umeak Tuhan. Lueng kelmen si semyang, puaso ngen bedu'o.

³⁸Pado waktau o kulo Si teko moi umeak Allah. Si Mujai Allah ngen miling tetang Anok o ngen kute tun de mbot saatne Allah melepas utuk Yerusalem.

³⁹ Sesudo Yusuf ngen Maria menea kute de harus kunei Ukum Tuhan, tobo'o belek moi Nazaret neak Galilea.

⁴⁰Anok'o be tambeak lai ngen kuet, penuak hikmat, ngen anugrah Allah ade pado-Ne.

⁴¹ Tiep taun tun tuai Yesus lalau moi Yerusalem utuk merayo Bilai Rayo Paskah.

⁴²Ketiko Yesus beromor dua belas taun, tobo'o lalau moi Yerusalem awei de biaso pado bilai rayo o.

⁴³Sesudo pesta o tobo'o belek. Tapi Yesus, anok o, masiak tingea neak Yerusalem, ngen tun tuai-Ne coa namen.

⁴⁴Tobo'o sako Si milem lem roron. Sesudo paneu de bilai lutup lajau tobo'o mesoa Si neak antaro udi ngen kekuat tobo'o.

⁴⁵Tapi tobo'o o coa tammau-Ne. Jijai tobo'o belek moi Yerusalem mesoa Si.

⁴⁶Sesudo telau bilai mesoa, tobo'o temmau Si neak lem Umeak Tuhan. Si gidong temot temi'uk paro gu'au agamo temnai ngen tobo'o.

⁴⁷Kute tun de temi'uk Si sele kerno jawaban-jawaban-Ne de pacok.

⁴⁸Tun tuai-Ne indeak kemlik Si. Indok-Ne madeak ngen si, “Nok, getai ko menea yo ngen keme? Tiak-Nu ngen indok-Nu temes mesoa ko!”

⁴⁹Yesus jemawab, “Getai tiak ngen indok mesoa Uku? Jano tiak ngen indok coa namen Uku arus ade neak lem umeak Bak-Ku?”

⁵⁰Tapi tobo'o coa ngertai jawaban Yesus.

⁵¹Sesudo'o Yesus belek besamo tobo'o moi Nazaret, taat ngen tobo'o. Kute hal o naik indok-Ne neak lem ateine.

⁵² Yesus betambeak lai ngen betambeak bijaksana. Si mengasihi Allah ngen sennang tun.