Read Rejang LUKAS 21 Bible Online

LUKAS 21 - Rejang bible

LUKAS 21

¹Neak Umeak Tuhan, Yesus kemliak tun-tun kayo misai caci moi lem kutak sedekeak.

²Si kulo kemliak suang jando de kembiak peset, misai duai keping caci tembaga.

³Lajau Yesus madeak, “Ti'uk: jando yo misai lebiak dau caci kunei kute de luyen.

⁴Sebab tobo'o kute melei sedekeakne kunei kelebiakne, tapi jando yo melei kunei kekuangne, kerno si melei kute de ade padone.”

⁵Ade tun-tun de miling tetang awei ipe ba'esne Umeak Tuhan de nirias ngen butau de ba'es-ba'es ngen barang-barang de nelei ngen Allah. Mako Yesus madeak ngen tobo'o,

⁶“Konyo ade waktaune, kute de udi keliak yo bakea nubuak; coa ade do butau kulo neak yo de bakea tinggea te'susun pado penanne!”

⁷Penotoa-penotoa temnai ngen Yesus, nadeakne, “Gu'au, tengen do'o bakea tejijai? Ngen jano tandone, amen do'o bakea tejijai?”

⁸Yesus madeak, “Waspadaba, supayo udi jibeak limau. Sebab dau tun bakea teko ngen makei gen-Ku ngen madeak, ‘Ukuba Si.’ Ngen: ‘Saatne sudo pa'ok.’ Jibeakba udi temotoa tobo'o.

⁹Jibeakba kulo saben amen udi temi'uk bito tetang peperangan ngen pembrontakan. Kutene o harus tejijai kileak. Tapi do'o coa be'artai bahwo sudo waktaune kiamat.”

¹⁰Si madeak ngen tobo'o, “Bangso de do bakea melawen bangso luyen ngen kerajaan melawen kerajaan.

¹¹Ngen bakea tejijai gepo de lai ngen memecem penan bakea ade olon ngen kenyemen, ngen bakea tejijai kulo hal-hal de kemjut ngen tando-tando de luea biaso kunei lenget.

¹²Tapi ayok kutene o udi bakea tenakep ngen senikso; udi bakea senreak moi umeak-umeak semyang ngen penjara-penjara, ngen udi bakea nadep ngen rajo-rajo ngen penguaso-penguaso kerno gen-Ku.

¹³Hal o bakea jijai kesempatan bagiaknu utuk semapei Bito Baik kunei Allah.

¹⁴ Sebab o tentepba neak lem ateinu, supayo udi jibeak muker lebiak denno tetang belaannu.

¹⁵Sebab Uku suang bakea melei ngen udi kecek-kecek bijaksana, sehinggo udi coa dapet nelawen ngen nebantah lawen-lawennu.

¹⁶Tun tuainu, pasuak-pasuaknu, pasuak keluargonu, kekuatnu, bakea semreak udi. Pa'ok kunei udi bakea nunuak.

¹⁷Udi bakea jenngik kute tun ngen kerno gen-Ku.

¹⁸Tapi coa delambea kulo kunei buk ulau nu bakea nyep.

¹⁹Amen udi tep betaen, udi bakea dapet idupnu.”

²⁰“Amen udi kemliak Yerusalem kenpung tentra-tentra, namenba, bahwo ubuakne kota'o bi pa'ok.

²¹Pado waktau o tun-tun de ade neak Yudea arus melilai moi tebo, ngen tun-tun de ade neak lem kota arus nyikir, ngen tun-tun de ade neak sadei jibeak masuk igai moi lem kota.

²² Sebab do'oba maso pembalasan neak ipe bakea genep kute de ade tetulis.

²³Celakoba indok-indok de gidong tenei lai ngen de masiak gep cupik! Negrai yo bakea meding kesaro de lai, ngen Tuhan bakea mukum bangso yo.

²⁴Ade de bakea nunuak ngen pedang, ade kulo de bakea nembin awei tahanan moi negrai-negrai tun, ngen tun-tun de coa kemnal Allah bakea melat Yerusalem sapei abis waktau de sudo tentau Tuhan utuk tobo'o.”

²⁵ “Ngen bakea ade tando-tando pado matai bilai ngen bulen ngen bitang-bitang, ngen neak bumai bangso-bangso bakea saben ngen bingung madep sa'ei umbok laut.

²⁶Manusio bakea saben setengeak matei madep jano de bakea tejijai neak kute dunio yo, sebab tobo penguaso angkasa rayo bakea jijai kacau.

²⁷ Pado waktau o ba Anok Manusio bakea teko neak lem mbun ngen kuaso ngen kemuliaan de lai.

²⁸Amen hal-hal o muloi tejijai, klongonba ngen naketba ulaunu, sebab tegoa igai udi bakea selamat.”

²⁹Lajau Yesus cemrito ngen tobo'o perumpamo awei yo, “Kenliakba pun ara ngen kute pun de luyen.

³⁰Amen pucuk-pucukne muloi keten, udi namen bahwo sudo gesea musim panes.

³¹Awei o kulo amen udi kemliak hal-hal o tejijai, udi bakea namen bahwo Allah segro bakea meriteak awei Rajo.

³²Namenba! Hal-hal o bakea tejijai ayok tun-tun de idup uyo yo matei kutene.

³³Lenget ngen bumai bakea nyep, tapi kecek-Ku tep seke'an-ke'anne.”

³⁴“Jagoba dirainu, jibeak sapei udi kembiak sibuk bepesta ngen mabuk menem, atau kembiak meker soal-soal idupnu, sehinggo udi coa siap ketiko bilai o teko ngen tetibo.

³⁵Sebab Bilai o bakea teko awei tinjo pado kute tun neak muko bumai yo.

³⁶Bejago-jagoba, ngen bedu'oba bogoa supayo udi kuet matasi kute hal de bakea tejijai ngen udi dapet madep Anok Manusio.”

³⁷ Yesus ngajea neak Umeak Tuhan pado kebilai, ngen kelmen billaine Si lalau moi Tebo Zaitun ngen tinggea neak di.

³⁸Tetiep pueng kute tun teko moi Umeak Tuhan utuk temi'uk Yesus ngajea.