Read Rejang LUKAS 24 Bible Online

LUKAS 24 - Rejang bible

LUKAS 24

¹Tapi pepueng nien pado bilai pertamo Mnggau o tobo'o lalau moi kubua mbin repeak-repeak de bi sendio tobo'o.

²Tobo'o dapet butau bi teguling kunei kubua o,

³ngen sesudo masuk tobo'o coa temau mayit Tuhan Yesus.

⁴Sementaro tobo'o je temenung kerno hal o, tetibo ade duai tun je pa'ok tobo'o makei bajau de becahayo.

⁵Tobo'o kembiak saben ngen temunduk ulau, tapi keduai tun o madeak ngen tobo'o, “Getai udi mesoa Si de idup, neak antaro tun matei?

⁶ Si coa ade neak piyo, Si bi idup igai. Tingetba jano de nadeak-Ne ngen udi, ketiko Si masiak neak Galilea,

⁷adeba bahwo ‘Anok Manusio arus senreak moi tangen tun-tun beduso ngen senalib, ngen bakea idup igai pado bilai de ketelau.’ ”

⁸Mako tingetba tobo'o bakea kecek-kecek Yesus.

⁹Sesudo tobo'o belek kunei kubua, tobo'o cemrito kutene o ngen kesebelas penotoa ngen kute pasuak de luyen.

¹⁰Selawei-selawei o adeba Maria kunei Magdala, ngen Yohana, ngen Maria indok Yakobus. Ngen selawei-selawei luyen kulo de sesamo ngen tobo'o melei namen ngen rasul-rasul.

¹¹Tapi bagiak rasul-rasul kecek-kecek selawei-selawei'o adeba ngike, ngen coa masai.

¹²Kunyau awei'o Petrus klongon, lajau gegacang lalau moi kubua o. Ketiko si cemungok moi lem, si kemliak cuma kain kefan bae. Lajau si lalau, ngen si temnai lem ateine jano de kirone bi tejijai.

¹³ Pado bilai o kulo duai kunei penotoa-penotoa Yesus lalau moi debuak sadei de genne Emaus, de teletok kekiro sebelas kilometer uakne kunei Yerusalem.

¹⁴Ngen tobo'o miling tetang kute sesuaktau de bi tejijai.

¹⁵Waktau tobo'o miling ngen tukar pekeran, tekoba Yesus suang ma'ok tobo'o, lajau paneu sesamo ngen tobo'o.

¹⁶Tapi ade sesuaktau de menea tobo'o coa kemnal Si.

¹⁷Lajau Yesus madeak, “Jano de udi miling neak tengeak dalen yo?” Tobo'o bedan ngen papea ibo.

¹⁸Suang kunei tobo'o, genne Kleopas, jemawab-Ne, “Ade Ko do'o tun asing neak Yerusalem, de coa namen jano de tejijai neak di pado bilai-bilai kekedong yo?”

¹⁹Nadeak-Ne ngen tobo'o, “Jano do'o.” Lajau jawab tobo'o, “Yesus tun Nazaret. Si adeba suang nebai, de bekuaso lem kerjo ngen kecek neak adep Allah ngen neak muko kute bangso keme.

²⁰Tapi imem-imem kepalo ngen pemipin-pemipin keme bi semreak Si utuk nukum matei, ngen tobo'o semalib-Ne.

²¹Padohal keme bel'o ma'ep, bahwo Siba de teko utuk mbebas bangso Israel. Tapi sementaro o bi liwet telau bilai, ayok kutene o tejijai.

²²Tapi kekedau selawei kunei klopok keme bi kemjut keme: Kekabuk akap tobo'o bi lalau moi kubua,

²³ngen coa temau mayit Yesus. Lajau tobo'o teko ngen bito, bahwo bi keten ngen tobo'o malaikat-malaikat, de madeak, bahwo Si idup.

²⁴Ngen kekedau kuat keme bi lalau moi kubua o ngen dapet, bahwo memang benea de nadeak selawei o, tapi tobo'o coa keten.”

²⁵Lajau Si madeak ngen tobo'o, “Hoi udi tun bodong, kembiak an atei nu utuk masai kute de sudo nadeak tobo nebai!

²⁶Mesias arus malami saro kutene o utuk masuk moi lem kemulio-Ne.”

²⁷Lajau Si jemlas ngen tobo'o jano de tetulis tetang Si lem kute Kiteb Sucai, muloi kunei kiteb-kiteb Musa ngen kute kiteb nebai-nebai.

²⁸Tobo'o ma'ok sadei de tobo'o temujau, lajau Si menea awei lok temrus paneu-Ne.

²⁹Tapi tobo'o kembiak demsok Si, nadeakne, “Tinggeaba sesamo ngen keme, sebab bilai bi gesea kelmen ngen mataibilai gesea tebenem.” Lajau masukba Si utuk tinggea sesamo ngen tobo'o.

³⁰Waktau Si temot mukmei ngen tobo'o, Si mok ruti, mucep berkat, lajau memecuakne ngen meleine ngen tobo'o.

³¹Ketiko o sadarba tobo'o bahwo do'o Yesus, tapi Si nyep kunei tengeak-tengeak tobo'o.

³²Nadeak tobo'o suang ngen de luyen, “Ateiku memang denyam-denyam ketiko Si miling ngen ite neak tengeak dalen ngen ketiko Si tem'ang Kiteb Sucai ngen ite?”

³³ Lajau klongonba tobo'o ngen terus belek moi Yerusalem. Neak di tobo'o dapet kesebelas penotoa o. Tobo'o gidong bekopoa sesamo ngen kuat-kuat tobo'o.

³⁴Nadeak tobo'o o, “Sesungguakne Tuhan bi idup igai ngen bi kemten dirai ngen Simon!”

³⁵Lajau keduai tun o kulo cemrito jano de tejijai neak tengeak dalen ngen awei ipe tobo'o kemnal Si pado waktau Si memecuak ruti.

³⁶Ngen sementaro tobo'o miling tetang hal-hal o, Yesus tetibo je neak tengeak-tengeak tobo'o ngen madeak ngen tobo'o, “Damoi sejahtera bagiak udi!”

³⁷Tobo'o tekanjet ngen saben sebab tobo'o sako bahwo tobo'o kemliak atau.

³⁸Tapi Si madeak ngen tobo'o, “Getai udi tekanjet ngen jano sebabne timboa reragau neak lem atei udi?

³⁹Keliakba tangen-Ku ngen kekea-Ku: Uku suangba dio; naboba Uku ngen keliakba, kerno atau coa ade daging ngen telanne, awei de udi keliak ade pado-Ku.”

⁴⁰Samo madeak awei'o, Si kemten tangen ngen kekea-Ne ngen tobo'o.

⁴¹Ngen ketiko tobo'o ati masai kerno riangne ngen masiak selle, madeakba Si ngen tobo'o, “Ade padonu kembuk neak yo?”

⁴²Lajau tobo'o melei ngen Si detok kan gureng.

⁴³Si mokne ngen embuk neak muko matai tobo'o.

⁴⁴Si madeak ngen tobo'o, “Dioba padeak-Ku, de bi Kunadeak ngen udi ketiko Uku masiak sesamo ngen udi, adeba bahwo arus genep kute de ade tetulis tetang Uku lem kiteb Taurat Musa ngen kiteb nebai-nebai ngen kiteb Mazmur.”

⁴⁵Lajau Si mukok pekeran tobo'o, sehinggo tobo'o ngertai Kiteb Sucai.

⁴⁶Nadeak-Ne ngen tobo'o, “Ade tetulis awei yo: Mesias arus saro ngen idup igai kunei antaro tun matei pado bilai de ketelau.

⁴⁷Ngen igai: Lem gen-Mesias bito tetang betobat ngen ngapun duso arus senapei ngen kute bangso, muloi kunei Yerusalem.

⁴⁸Ko adeba saksai kunei kutene yo.

⁴⁹ Ngen Uku bakea mbo ngen udi jano de jenanjai Bapa-Ku. Tapi udi arus tinggea neak lem kota yo sapei pasuak nelekep ngen kuaso kunei penan de lekat.”

⁵⁰ Lajau Yesus mbin tobo'o moi luea kota sapei pa'ok Betania. Neak di Si maket tangen-Ne melei berkat tobo'o.

⁵¹Ngen ketiko Si gidong melei berkat'o, Si ce'ei kunei tobo'o ngen taket moi surgo.

⁵²Tobo'o sujud nyembeak ngen Si, lajau tobo'o belek moi Yerusalem ngen kembiak besukocito.

⁵³Tobo'o bogoa mujai Allah neak Umeak Tuhan.