Read Rejang LUKAS 4 Bible Online

LUKAS 4 - Rejang bible

LUKAS 4

¹Yesus, de penuak ngen Roh Allah, belek kunei Bioa Yordan. Roh Allah mbin Si moi benei libea.

²Neak di Yesus tinggea pat puluak bilai ke'anne ngen cenubo Iblis. Seke'an neak di Yesus coa mbuk jejano ngen sesudo'o Yesus nyemen.

³Lajau madeakba Iblis ngen Yesus, “Amen Ko Anok Allah, neluakba butau yo jijai ruti.”

⁴ Jawab Yesus ngen si, “Ade tetulis: Manusio idup iso kunei ruti bae.”

⁵Sesudo'o Iblis mbin Yesus moi penan de lekat ngen dekejeb matai Iblis kemten ngen Yesus kute kerajaan dunio.

⁶Nadeak Iblis ngen Yesus, “Kute kekuasaan serto kemuliaan bakea nelei ngen-Ko, sebab kutene o bi senreak ngenku ngen uku meleine ngen api bae de kelokku.

⁷Jijai amen Ko nyembeak uku, kutene o bakea jijai hok-Nu.”

⁸ Tapi Yesus madeak ngen si, “Ade tetulis: Ko harus nyembeak Tuhan, Allahnu, ngen layanba Si bae!”

⁹Sesudo'o Iblis mbin Yesus moi Yerusalem ngen mpek Yesus neak bubung Umeak Tuhan, lajau madeak ngen Yesus, “Amen Ko Anok Allah, ne'usba dirai-Nu kunei yo moi mimbeak.

¹⁰ Sebab ade tetulis: ‘Tetang Ko, Si bakea meriteak malaikat-malaikat-Ne utuk jemago Ko.’

¹¹Ngen tobo'o bakea semambut Ko neak das tangenne, supayo kekea-Ko jibeak tatuk butau.”

¹² Yesus jemawabne, nadeak Si, “Ade firman: ‘Jibeak ko cemubo Tuhan, Allahnu!’ ”

¹³Sesudo Iblis selsei cemubo Yesus ngen kute mecem ca'o, Iblis teminggea Yesus ngen mbot waktau de baik.

¹⁴Lem kuaso Roh belekba Yesus moi Galilea. Ngen tesebeaba bito tetang Yesus neak kute daerah o.

¹⁵Yesus majea neak umeak-umeak semyang neak di ngen kute tun mujai Yesus.

¹⁶Yesus teko moi Nazaret penan Si lai, ngen temurut biaso-Ne pado bilai Sabat Yesus masuk moi umeak semyang. Lajau Si je utuk baco kiteb.

¹⁷Ngen Yesus nelei kiteb Nebai Yesaya. Sesudo nukok-Ne, Yesus temau ayat, neak ipe ade tetulis:

¹⁸ “Roh Tuhan ade pado-Ku, ngen sebab Si bi melatik Uku, utuk semapei Bito Baik ngen tun-tun peset. Ngen Si bi mutus Uku utuk melei bito tetang bebas tun-tun tahanan, ngen pengeliak bagiak tun-tun sutai, utuk mbebas tun-tun de jijai budok,

¹⁹utuk melei bito taun rahmat Tuhan bi teko.”

²⁰Sesudo'o Yesus temutup kiteb o, meleine ngen petugas, lajau temot; ngen kute matai lem umeak semyang o kemliak Yesus.

²¹Lajau Yesus muloi majea tobo'o, nadeak Yesus, “Pado bilai yo genepba ayat yo sewaktau udi temi'ukne.”

²²Ngen kute tun o demukung Yesus, tobo'o sele ngen kecek-kecek de ba'es de nucep Yesus, lajau nadeak tobo'o, “Iso Yesus yo anok Yusuf?”

²³Mako madeakba Si ngen tobo'o, “Paset ko bakea madeak pateak yo ngen-Ku: Hoi dokter, kena'enba dirai-Nu suang. Meneaba neak yo kulo, neak penan asal Ko yo, kute de keme temi'uk de bi tejijai neak Kapernaum!”

²⁴ Ngen Si madeak igai, “Uku madeak ngen udi, sesungguakne coa ade nebai de nego neak penan asalne.

²⁵ Ngen Uku madeak ngen udi, ngen kecek-Ku yo benea: Pado zaman Elia ade dau selawei jando neak Israel ketiko lenget katup seke'an telau taun ngen num bulen ngen ketiko bahayo nyemen de luea biaso tejijai neak kute negrai.

²⁶Tapi Elia nembo iso ngen saleak suang kunei tobo'o, tapi ngen suang selawei jando neak Sarfat, neak taneak Sidon.

²⁷ Ngen pado zaman Nebai Elisa dau tun olon kidek neak Israel ngen coa ade suang kulo kunei tobo'o de kena'en, seluyen Naaman, tun Siria o.”

²⁸Kute tun neak umeak semyang temi'uk do'o kembiak mengiak.

²⁹Tobo'o klongon, lajau musir Yesus moi luea kota ngen mbin Yesus moi tebing tebo, neak penan kota o ade, utuk meluk Yesus kunei tebing o.

³⁰Tapi Yesus paneu liwet kunei tengek-tengeak tobo'o, lajau lalau.

³¹Sesudo'o Yesus lalau moi Kapernaum, do kota neak Galilea. Neak di Si majea pado bilai-bilai Sabat.

³² Tobo'o kembiak kagum kemliak ca'o Yesus majea, sebab Yesus miling ngen penuak kuaso.

³³Neak lem umeak semyang o ade suang de pasuk semat ngen si menggang kembiak lek,

³⁴“Hoi Ko, Yesus tun Nazaret, jano urusan Ko ngen keme? Ko teko lok majua keme? Uku namen api Ko: De Sucai kunei Allah.”

³⁵Tapi Yesus semgokne, Si madeak, “Diem, kelueaba kunei si!” Ngen semat o kulo meting tun o moi tengeak-tengeak tun dau, lajau keluea kunei si ngen samo sekilai coa megis ne.

³⁶Ngen kute tun sele, lajau madeak suang ngen de luyen, “Luea biaso kecek-kecek Yesus. Ngen wibawa ngen kuaso, Yesus meriteak roh-roh kidek keluea, ngen tobo'o keluea kulo!”

³⁷Mako bito tetang Yesus tesebea neak kute daerah o.

³⁸Yesus teminggea umeak semyang o, lajau lalau moi umeak Simon. Setuang selawei Simon gidong demem, ngen tun-tun melei namen hal o ngen Yesus.

³⁹Yesus lalau moi penan tidua o, lajau musir olon o. Olon o nyep, ngen indok setuang Simon lajau klongon ngen melayan tobo'o.

⁴⁰Waktau matai bilai tebenem, kute tun mbin ngen si tun-tun bolon, de bolon memecem olon. Si kulo meletok tangen-Ne das tetiep tobo'o ngen kema'en tobo'o.

⁴¹Kunei dau tun keluea kulo semat-semat samo menggang, “Ko adeba Anok Allah.” Tapi Yesus semgok tobo'o ngen coa mizin tobo'o miling, sebab tobo'o namen Siba Rajo Penyelamat.

⁴²Waktau kebilai, Yesus berakat ngen lalau moi do penan de sunyai. Tapi tun dau mesoa Si, lajau temau Si ngen berusaho tema'en Si supayo jibeak teminggea tobo'o.

⁴³Tapi Si madeak ngen tobo'o, “Neak kota-kota luyen Uku harus melei namen Bito Baik tetang Allah meriteak sebagai Rajo sebab utuk do'oba Uku nutus.”

⁴⁴Yesus bekhotbah Bito Baik lem umeak-umeak semyang neak Yudea.