Read Rejang LUKAS 8 Bible Online

LUKAS 8 - Rejang bible

LUKAS 8

¹Coa an sesudo o, Yesus lalau moi kota-kota ngen sadei-sadei, utuk melei namen Bito Baik bahwo Allah muloi meriteak sebagai Rajo. Duai belas murid-murid-Ne sesamo Si.

² Awei o kulo kekedau selawei de sudo kena'en kunei roh kidek ngen olon. Tobo'o siba Maria de senbut Magdalena, de bi nebebas kunei tujuak roh kidek,

³Yohana ngenyan Khuza pegawai istana Herodes, Susana ngen dau selawei-selawei luyen. Ngen biaya suang, tobo'o temulung Yesus ngen murid-murid-Ne.

⁴Tun-tun terus bae teko ngen Yesus kunei bebagoi kota. Pado waktau sudo dau tun teko, Yesus cemrito ngen tobo'o perumpamo awei yo,

⁵“Suang petani lalau tembea biniak. Ketiko pasuakne gidong tembea, ade biniak de us neak dalen. Pa'o nelat tun ngen de luyenne nembuk burung.

⁶Ade kulo de us neak penan bebutau. Pado waktau tunes-tunesne keluea tanem o lew sebab taneakne ke'ing.

⁷Ade kulo biniak de us neak tengeak sakea betebok. Sakea betebok o temuak besamo biniak o, ngen mipitne sehinggo matei.

⁸Tapi ade kulo biniak de us neak taneak de subur, lajau temuak ngen masea buak sotos kilai lipet.” Sesudo miling awei yo Yesus madeak, “Api temuan ti'uk utuk temi'uk, lokba si temi'uk!”

⁹Murid-murid Yesus temnai ngen Yesus tetang maksud perumpamo o.

¹⁰ Lajau Yesus jemawab, “Ngen ko nelei karunio utuk namen resio Allah meriteak sebagai Rajo, tapi ngen tun-tun luyen hal o nelei namen lem perumpamo, supayo kunyau kulo demnong, tobo'o coa kemliak ngen kunyau kulo temi'uk, tobo'o coa ngertai.”

¹¹“Dioba tai perumpamo o: Biniak o adeba firman Allah.

¹²De us neak biding dalen o siba tun-tun de bi temi'ukne; sesudo'o Iblis teko lajau mok firman o kunei lem atei tobo'o, supayo tobo'o jibeak masai ngen senlamat.

¹³De us neak taneak de bebutau o siba tun-tun de sesudo temi'uk firman o, temimone ngen riang, tapi tobo'o o coa balet, tobo'o masai tegoa bae ngen lem maso pencobaan tobo'o murtad.

¹⁴Biniak de us neak tengeak sakea betebok ibarat tun de temi'uk bito o, tapi khawatir tetang idup tobo'o serto lok idup mewah ngen senang neak lem dunio yo. Kutene o mipit tobo'o sehinggo coa masea buak de mesok.

¹⁵Biniak de us neak taneak de subur ibarat tun de temi'uk Bito Baik o, lajau maikne neak lem atei de baik ngen jujur. Tobo'o beta'en sapei masea buak.”

¹⁶ “Coa ade tun de midup lapu lajau kematupne ngen teleng, atau meletokne neak beak penan tidua. Si bakea mpek lapu o pado kekea lapu, supayo tun de masuk dapet kemliak te'angne.

¹⁷ Coa ade de kelimbang de coa bakea keten; ngen coa ade de neresio de coa bakea tukea ngen namen.

¹⁸ Sebab o kenliakba bebaik jano de ko temi'uk. Sebab tun de sudo temuan, bakea dapet lebiak dau igai; tapi tun de coa temuan, didik de masiak ade padone bakea nemok kulo.”

¹⁹Indok ngen pasuak-pasuak Yesus teko ngen Yesus, tapi tobo'o coa dapet sapei ngen-Si kerno tun kembiak dau.

²⁰Mako ade suang de madeak ngen Yesus, “Bak, indok ngen pepasuak Bak ade neak luea. Tobo'o lok betemau ngen Bak.”

²¹Tapi Yesus madeak ngen tobo'o, “Tun-tun de temi'uk kecek Allah ngen maneune, tobo'oba indok ngen pepasuak-Ku.”

²²Pado waktau Yesus ngen murid-murid-Ne kenek biduk. “Maro ite lalau moi dipoa daneu,” nadeak Yesus ngen tobo'o. Mako pasuak tobo'o kulo berakat.

²³Pado waktau tobo'o gidong belayea, Yesus tetidua. Tetibo ibut lai teko moi daneu o. Bioa muloi masuk moi lem biduk, sehinggo mbahayo tobo'o kutene.

²⁴Murid-murid Yesus lalau ngen-Si ngen geminggut Yesus. Tobo'o madeak, “Gu'au, Gu'au, ite celako!” Yesus klongon lajau semgok ibut ngen umbok de gidong lai o. Ibut ngen umbok o kulo bedan lajau daneu jijai kembiak tenong.

²⁵Lajau Yesus madeak ngen murid-murid-Ne, “Getai udi coa masai ngen-ku?” Tobo'o jijai sele ngen saben. Ngen madeakba tobo'o do ngen de luyen, “Api sebeneane tun yo sapei melei periteak ngen ibut, umbok, tobo'o kulo taat ngen-Si!”

²⁶Yesus ngen murid-murid-Ne terus belayea sapei moi daerah Gerasa moi dipoa Daneu Galilea.

²⁷Pado waktau Yesus tu'un moi da'et, suang semanei de pasuk roh kidek teko ngen Si. Tun o kunei kota. Sudo an si coa makei bajau ngen coa lok tinggea neak umeak. Si lok tinggea neak guo-guo penan kubua.

²⁸Ketiko kemliak Yesus, si menggang lajau sujud neak adep Yesus ngen madeak, “Yesus, Anok Allah De Kembiak Lekat! Bakea Ko menea jano uku yo? Uku bekinoi jibeak semikso uku!”

²⁹Si madeak awei yo sebab Yesus meriteak roh kidek o keluea kunei tun o. Kerno cet roh kidek o seme'et si. Lajau utuk jemagone, si neratoi ngen nelenggau, tapi si mutus kute peket o ngen si nembin semat o moi benei libea.

³⁰Lajau Yesus temnai ngensi, “Api gennu?” Jawabne, “Legion,” kerno si nasuk dau semat.

³¹Semat-semat o bekinoi ngen Yesus, supayo Si jibeak meriteak tobo'o masuk moi lem Jurang Maut.

³²Pa'ok penan o ade dau sekilai ja'uak de gidong mesoa upan neak li'ing tebo. Roh-roh kidek o minoi ngen kembiak ngen Yesus supayo nizin masuk moi lem ja'uak-ja'uak o. Yesus tujau.

³³Mako roh-roh kidek o keluea kunei tun o ngen masuk moi lem ja'uak-ja'uak o. Lajau ja'uak-ja'uak o melilai ngen tejun kunei biding jurang moi lem daneu, sesudo'o tendem.

³⁴Penjago-penjago ja'uak o kemliak jano de bi tejijai. Mako tobo'o melilai ngen semiar bito o neak kota ngen neak sadei rogok ne.

³⁵Lajau tun-tun keluea utuk kemliak jano de tejijai. Tobo'o teko ngen Yesus, neak di tobo'o temau tun de sudo telepas kunei roh-roh kidek o gidong temot pa'ok kekea Yesus. Si sudo makei bajau ngen pekeranne sudo ka'en. Tobo'o jijai saben.

³⁶Tobo'o de kemliak kejijai o cemrito ngen tun-tun awei ipe tun o kena'en.

³⁷Lajau kute penduduk daerah Gerasa o minoi ngen kembiak supayo Yesus teminggea penan o, sebab tobo'o kute saben sekilai. Jijai Yesus kenek biduk lok belek.

³⁸Tun de sudo telepas kunei roh-roh kidek o minoi ngen Yesus supayo si buliak milem. Tapi Yesus meluak si lalau, nadeak-Ne,

³⁹“Belekba ngen cenritoba jano de sudo Allah menea ngen udi.” Mako tun o lalau melei namen moi kute pelosok kota, jano de sudo Yesus menea ngensi.

⁴⁰Ketiko Yesus belek, tun dau semambut Si sebab tobo'o kute mbot Si.

⁴¹Lajau teko suang de genne Yairus. Si adeba kepalo umeak semyang. Samo sujud neak adep kekea Yesus si bekinoi ngen-Si, supayo Yesus teko moi umeakne,

⁴²kerno anokne selawei de do done, de omorne duai belas taun, gesea matei. Lem pemaneune moi mindi Yesus densok tun dau.

⁴³Neak antarone ade kulo suang selawei de sudo duai belas taun olon pendarahan de behubung ngen mbin bulenne. Si bi mabis kute hokne utuk bubet ngen dokter, tapi coa ade de dapet kema'enne.

⁴⁴Selawei o ma'ok Yesus kunei kedong, lajau megong jubah-Ne. Ketiko o kulo mbin bulen selawei o bedan.

⁴⁵Lajau nadeak Yesus, “Api de megong Uku?” Ngen kerno coa ade de makaune, madeakba Petrus, “Gu'au, tun dau gemlung ngen demsok Ko.”

⁴⁶Tapi Yesus madeak, “Ade suang de megong Uku, sebab Uku meding ade kuaso keluea kunei dirai-Ku.”

⁴⁷Ketiko selawei o kemliak, bahwo Yesus bi namen plepne, si teko ngen gemtea, sujud neak adep Yesus ngen cemrito ngen tun dau jano sebabne si megong Yesus, ngen bahwo olonne bi ka'en.

⁴⁸Lajau nadeak Yesus ngen selawei o, “Hoi anok-Ku, imennu bi semlamat udi, lalauba ngen damoi!”

⁴⁹Sementaro Yesus masiak miling, teko suang kunei keluargo Yairus, kepalo umeak semyang. Si madeak ngen Yairus, “Anoknu sudo matei, jibeak igai ko semaro Gu'au!”

⁵⁰Tapi Yesus temi'ukne ngen madeak ngen Yairus, “Jibeak saben, masai bae, anoknu bakea selamat.”

⁵¹Sesudo sapei neak umeak Yairus, Yesus coa mizin suang kulo masuk ngen Si kecuali Petrus, Yohanes, Yakobus ngen indok bak anok o bae.

⁵²Kute tun gidong ngindoi ngen ibo kerno anok o matei. Tapi Yesus madeak, “Jibeak ngindoi. Anok o coa matei, si cuma tidua!”

⁵³Tobo'o temawai Yesus, sebab tobo'o namen anok selawei o sudo matei.

⁵⁴Sesudo'o Yesus megong tangen anok o ngen madeak, “Klongonba, Nok!”

⁵⁵Nyabai anok o belek ngen anok o, seketiko o kulo si klongon. Sesudo'o Yesus meluak tobo'o melei kembuk ngen anok o.

⁵⁶Tun tuai anok o sele sekilai. Tapi Yesus temgeak tobo'o melei namen kejijai o ngen api bae.